¹ Baada ya siku tsano, Anania, ye kuhani mubomu, achiteremuka Kaisaria na baadhi ya atumia ham'wenga naye, na mutafusiri mum'wenga, dzinare ni Tertulo, navo vachim'weleza gavana habari za Paulo. ² Naye ariho-ehewa, Tertulo achanza kumushitaki Paulo achamba, "Pkakukala hunapata amani nyinji fwi fwi pkako, Feliki mutukufu, na pka wemereri wa pkako, mambo mai ganatengezwa pka ajili ya taifa riri. ³ Bai hunaga-hochera chila wakati na chila hatu pka shukurani yosini, uwe muheshimiwa Feliki. ⁴ Ela siku-tsukiza zaidi, nakuvoya uhusikize pka maneno machache pka fadhili za pkako. ⁵ Pka kukala hudzimona mutu yuyu mukorofi, m'wanzilishi wa fitina kahiza Ayahudi vosini dunini, kisha iye neo chitswa cha dini ya Anazorayo. ⁶ Na kisha wejeza kurenjiza hekalu rehu unajisi, huchimubgwira, [huchimala kumuhukumu pka sharia yehu ⁷ Ela Lisia jemadari achifika na achimutivya m'wehu mikononi pka nguvu. ⁸ Achivalagiza vavo vario mushitaki be vadze pkako] uwe m'wenye pka kumuuza-uza undaweza kupata habari ya mambo gosi ambago fwi fwi huna-mushitaki. ⁹ Ayahudi vosini navo vanamushitaki, vachamba kukala ndo arivyo. ¹⁰ Naye liwali ariho-mugolozera Paulo agombe, Paulo weamba, "Pka kukala uwe be udzikala m'wamuli wa taifa riri pka miaka minji, be nadzi-hehera m'wenye pka moyo wa furaha. ¹¹ Maana unaweza kumanya kukala, kazidza chira siku zaidi ya kumi na mbiri hangu nirihopanda pkenda Jerusalemu ili kuabudu. ¹² Atu vava be kavanonere mimi ndani ya hekalu nichizozana na mutu, au be kuhenda fujo kahiza mukutano, au kahiza sinagogi au ndani ya wo mudzi. ¹³ Wala be kavaweza kuga-hakikisha mambo gaga vadzigo-nishitakira sasa. ¹⁴ Ela neno riri naungama pkako kukala, pka njira ii ambayo vanayeha ya uzushi, ndivyo mimi nim'wabuduvyo Mulungu wa baba zehu, nichi-gakubali gosini gabwiranago na torati na garivyo andipka kahiza vyuo vya manabii. ¹⁵ Mimi nina tumaini pka Mulungu ambaro hata vavo navo vanatazamia, kukala, kuna ufufulo wa nyufu, enye hachi na vasio na hachi pia. ¹⁶ Nami be nadzizoeza kahiza neno riri, nikale na dhamiri isiyo na ila here za Mulungu, na mbere za atu siku zosini. ¹⁷ Baada ya mika mini, nefika ili nivarehere atu va taifa rangu sadaka na matoleo. ¹⁸ Vachinona mo ndani ya hekalu, nichishuhulika na mambo gaga, ichikala nidzitakaswa, na sikarire na mukutano wala fujo, ela vekalako baadhi ya Ayahudi vario ombola Asia. ¹⁹ Ambavo, vavo idzikala ni lazima vakale haha ili kunishitaki, chikala vana neno rorosi dzulu yangu. ²⁰ Au atu vava be nivagombe, nikosa rani variro-rona pkangu niriho ema mbere za baraza. ²¹ Isihokala pka sauti ii m'wenga, niriho-rira kahikahi yao nichamba, "Pka ajili ya ufufulo wa nyufu be nina hukumiwa mbere zenu vivi rero. ²² Bai Feliki wesonjeza mbere, pka sababu were yunamanya tototo sana kuhusu Njira iyo, achamba, "Lisia jemadari achidza be nindakata maneno genu. ²³ Achimulagiza ye akida kukala ye Paulo arindwe, ela akale na nafasi na asimikahaze mutu yoyosi au musenawe kumushuhu-likira. ²⁴ Baada ya siku chache, Feliki achidza ham'wenga na Drusilla muchewe ariye-kala ni Muyahudi, achihuma, vam'wehe Paulo, amusikize imani ariyo nayo pka Jesu Masihi. ²⁵ Na Paulo arihokala arihokala yunaomboza hojaze, kahiza habari za hachi, na kukala na chiasi kahiza hukumu indiyo-kudza, Feliki achenjirwa ni woga, achamba, "Sasa,tua pkenenda, nami nichipata nafasi nindapkeha. ²⁶ Ham'wenga na gago, weona kukala be yundapewa pesa ni Paulo, pka vivyo be wem'weha mara nyinji achigomba naye. ²⁷ Ela miaka miri iriho-kamilika, Feliki achimuhochera Porkio Festo akale gavana ye achuka. Na Feliki achimala kuva-henzeza Ayahudi, achimuricha Paulo chifungoni.