¹ Bai wakati uwo uwo, mufalume Herode achigoloza mikonoye, ili kuvahenda mai baadhi ya atu va kanisa. ² Achimolaga Jakobu, nduguye Johana, pka upanga. ³ Na ariho ona kukala vina vahamira Ayahudi, achenderera na achimubigwira Petero. Na siku zizo were ni siku za mikahe isiyo na hamira. ⁴ Ariho marigiza kumubgwira, achim'wika jela, mikononi m'wa vikundi vine vya shikari, ane ane, vamurinde, achimala baada ya Pasaka, amomboze na am'wike mbere za atu. ⁵ Bai Petero werindwa jela, naro kanisa richimuvoya Mulungu pka bidii pka ajili-ye. ⁶ Hata wakati Herode arihomala kumomboza, usiku uwo uwo Petero were yurere kahi kahi ya shikari airi, na yufungwa minyororo miri, na shikari mbere za muryango vachirinda jela. ⁷ Gafula malaika wa Bwana achema hehi naye, na m'wanga uchimirika mo chumbani, achimubiga Petero lwavuni, achimulamusa, achamba, "Uka upesi. Na yo minyororo-ye ichibgwa mo mikononi. ⁸ Malaika achim'wambira, " Dzifunge,na vwala virahuvyo. Achihenda vivyo. Kisha achim'wambira, dzivwike nguo-yo, na unitue. ⁹ Bai Petero achimutuo, ela kamanyire kukala ni jeri gago garigo hendwa ni iye malaika, ela weona kukala yunaona maono. ¹⁰ Na variho tsupa chizuizi cha pkanza na chahiri, vachidza hata muryango wa chuma wa pkenjirira mo mudzini, uchiva-fugukira wenye, vachombola konze, vachichira njira m'wenga, gafula ye malaika achimuricha. ¹¹ Hata Petero ariho ng'alwa ni matso, achamba "Sasa be ninamanya kukala Bwana yuhuma malaika-we, na kunomboza kahiza mukono wa Herode na kahiza kulolera kosini pka taifa ra Ayahudi. ¹² Na arihokala be yuna fikiria gaga, achifika nyumbani pka Mariamu, mameye Johana, ambaye dzinare rahiri ni Marko, na atu anji be vere va kusanyika mumo vachivoya. ¹³ Na ariho bisha muryango wa geti, musichana wa kazi,dzinare ni Roda, achidza sikiza. ¹⁴ Na ariho manya kukala ni sauti ya Petero, kafugurire yo geti, na pka raha nyinji, achikota malo na achenjira ndani, na achivaambira kukala Petero, be wemire muryango wa geti. ¹⁵ Bai vachim'wambira, "Uwe unavitswa. Ela iye achi sisitiza sana, achamba kukala be ni vivyo. Vachamba kukala labuda ni malaika-we. ¹⁶ Ela ye Petero be achenderera kubisha, hata variho mufugurira, vachimona, vachanga-lazika. 17 Nate Petero achiva-golozera mukono ili vanyamale, achivaeleza jinsi malaika adzivyo momboza kahiza jela. Achamba "Kam'wambireni Jakobu na vavo ndugu habari zizi. Petero achuka na achenda kutu kunjine. ¹⁸ Bai kuriho-cha madzacha, vo shikari vachenjirwa ni woga munji, yukaladze Petero. ¹⁹ Na Herode ariho mutafuta, asimone, we vauza uza vo shikari, achilagiza vo shikari vaolabgwe. Kisha Petero achiteremuka kula Uyahudi na achenda Kaisaria na achikala kuko. ²⁰ Na Herode were yudzi vatsukirirwa sana atu va Tito na Sidoni, vachi-m'wendera pka nia m'wenga, kuno vadzihenda usena na Blasto musaidizi wa ye mufalume, vachimala amani, maana itsi yao were inapata chakurya kula pka ye mufalume. ²¹ Bai Siku m'wenga Herode achidzi-vwika nguo za chifalume,na achisagala pkenye chihiche cha enzi na achomomboza hotuba mbere zao. ²² Vo atu vachibiga kululu, vachamba "Ni sauti ya Mulungu, ela so sauti ya m'wanadamu! ²³ Gafula malaika wa Bwana achimubiga, pkasababu kamupire Mulungu utukufu, achiriwa ni tsango na achifwa. ²⁴ Na neno ra Mulungu be richizidi pkenera. ²⁵ Bai Barnaba na Sauli variho marigiza huduma yao, vachuya kula Jerusalem, vachimuhala Johana aehe-waye Marko vachenda naye.