¹ Mwe bakwane, kisinka syaalandile nenu nga ne walanda na bantu balombwelue na Mweo Muzuuke, inzi naalandile nenu nga ne walanda na bantu balombwelue na mibeeleya kimubili, pantu muli ngankeke mu Kristu. ² Mwe bakwane keebo kanaamyanine kaali kali nga mabeele a kumina. Te kaali kali nga bilio byumine, pantu temwaa kapokeleele kabili nilenu kumo temukapokeleele. ³ Pantu mukiikeele nga bantu balombwelue na mibeele ya kimubili. Lumukili ni bunkua pamo ni bikanza pakati kenu mulimwailangisia nangue mulibantu balombwelue na mibeeleya kimubili kabili ivimuli. ⁴ Umo pakati kenu lualiwalanda nangue, "Nene ndi wakua Paulo,' ni unge nangue, "Nene ndi wakua Apolo," mane nangue mulimu kukita nga bantu basizumiine. ⁵ Nmipuzyenke Apolo nani? Ni Paulo nani? mone fwefue tuli sie babombi bakua Leza baamilengele kuti muzumine kubalua muntu pakati ketu aliwabombamwilo uapeelue na Mulopue. ⁶ Nene naalimbile, ni Apolo waitiliile, inzi Leza bunke i aliwakuzia. ⁷ Kansi, olia aliwalimba ni olia aliwaitilila bo te kantu. Inzi Leza i aliwakuzia . ⁸ Pantu olia aliwalimba ni olia aliwaitilila balingi, Leza bunke i waakalambula kubalua muntu kukonkana ni mwilo wakue. ⁹ Mwe bakwetu, Leza aliwabomba ni fwefue tulitwabomba pamo nakue mwemue muli bukaba bwakua mwine Leza. Kabili muli bukuule bwakue. ¹⁰ Kukonkana ni buwame bwakua Leza bunaapeelue, naakuulile kiputa ngane muntu amanine kukuula bwino evi unge ni ye akuulepo. Inzi kubalua muntu amone vili bintu bya kukuulapo. ¹¹ Leza waakuulile kale kiputa, ni keki kiputai Yesu Kristu. Kabili tekuli muntu waakakuula kinge kipula. ¹² Bamo baakakuulapo na noro, bange baakakuulapo na mukuba, bange baakakuulapo na mabue a mutengo, bange baakakuulapo na bimuti, bange baakakuulapo na misonge ni bange baakakuulapo na lubamba. ¹³ Inzi bukuule bwa kubalua muntu bwaakamoneka busiku bwa bupinguzi. Pantu bwaakafyulua na mulilo, ni mulilo i waakapingula miilo ya bantu bonse. ¹⁴ Kine kintu kikuulilue na muntu kyaanda kuzia, ozo muntu waakalambulua. ¹⁵ Kine bukuule bwazia mwine wa bukuule takaba na kilambu. Inzi waakapusuka sie nga muntu wapanda mu mulilo. ¹⁶ Eba, tumanine nangue muli nghanda yakua Leza? Tumanine nangue Mweo Muzuuke ekeele mukati mwenu? ¹⁷ Kine muntu wainoona nghanda yakua Leza, Leza ni ye waakamwinoona, pantu nghanda yakua Leza ni izuukile. Mwemue i nghanda yakue. ¹⁸ Mwe bakwane, muntu tekuli ebeepe kine muntu umo pakati kenu walangakana nangue wene ni wa maano mu keno kyalo, ealule kilubi evi aye walini maano a kiine. ¹⁹ Pantu maano a mu keno kyalo amwenekele kubi bulubi ku menso akua Leza, malembo alialanda evi, "Leza bukengezi bwabo." ²⁰ Ni ange malembo alandile evi, "Leza amanine bwino nangue malanga a bantu bali ni maano ni a mpuni." ²¹ Mwe bakwane, kansi muntu tekuti atasiizie pa bintu bilibyakita muntu nakue, pantu bintu byonse ni byenu. ²² Paulo ni Apolo ni Petro ni benu, keno kyalo ni bukose pamo ni nfua, ni byenu bintu bilipo pamo ni bintu byaakeeza, byonse ni byenu. ²³ Inzi mwemue muli bantu bakua Kristu, Kristu ni ye ni wakua Leza.