¹ Mwe bakwane lunaizile kumisimikila keebo kakua Leza, nsyaali nalanda nenu twebo tukolele ni twa masambililo a pa muulu. ² Pantu lunaali pamonenu,nsyaatonene kulanda nenu pa binge bintu,inga sie palwakua Yesu Kristu waakonkomeenue pa musalaba. ³ Naizile kwenu nalia munake, kabili nali mu tutuma sana na mwezo. ⁴ Masambilizio ane pamo ni masimiko, te a kumibembia na maano a bumuntu, inzi wali kusininkizia maka a Mweo Muzuuke. ⁵ Naakitile evio pakuti kiketekelo kyenu tekuti kiye kyaimaniine pa maano a bumutu, inzi kiye kyaimaniine pa maano a bumuntu, inzi kiye kyaimaniine pa maka akua Leza. ⁶ Kulanda kisinka, nene lundinasimikila bantu bakosele mu kiketekelo, ndinabasimikila mpunda yamaano. Inzi te maano a keno kyalo, ao maka a baketeeka ba keno kyalo, pantu aza maka kasyaumiine kwinoonua. ⁷ Maano andinabombia pa kusimikila, i maano a kafiso kakua Leza a banga afiikiilue bantu, maano asaakwiliilue mbeela na Leza pa mulandu wetu kyalo tu kyaali tekinalengue. ⁸ Tekuli ata umo pa bakateeka ba mu keno kyalo waamanine aza maano. Baamanenge nga tebaa mukonkomeene mulopue wa bulumba pa musalaba. ⁹ Malembo alandile evi, "Kintu kisinamonue na muntu ao kunvwiwa, ni kisinalanga kanuepo na muntu, Leza i kiateaniiziizie balia bamutonene." ¹⁰ Ni kiine Leza waatufyuliile kafiso kakue na Mweo Muzuuke. Pantu Mweo Muzuuke amanine bintu byonse pamo ni bintu bikata byakua Leza. ¹¹ Pantu mutima wa muntu i umanine bili mu mwine wa mutima Mweo wakua Leza ni i amanine bili muli Leza. ¹² Fwefue tetwapokeleele mupasi wa mu keno kyalo, inzi twaapokeleele Mweo Muzuuke wakua Leza, evi tuye twamanine byonse bitwaapeelue na Leza. ¹³ Kabili tetwizi kulanda twebo tulitwasambilizia na maano a muntu, inzi tulitwalanda twebo tulitwasambiliziwa na Mweo wakua Leza. Ni pakako i kitulitwalendolwela bantu bali ni Mweo Muzuuke bebi kisinka bya kimweo. ¹⁴ Muntu asili na Mweo wakua Leza, tavinda kupokelela kisinka kilikyafuma kuli Mweo Muzuuke, pantu wene akimwene kuba bulubi kabili tavinda kukyunvua pantu Mweo Muzuuke i aliwalengia bantu kunvua keki kisinka. ¹⁵ Kubalua muntu ali ni Mweo wakua Leza aliwainika byonse. Inzi wene tezi kwinikua na bange bantu. ¹⁶ Malembo alandile evi, "Ati nani amanine malanga akua Mulopue? Nani ali kuvinda kumusoka Mulopue?" Inzi fwefue tuli ni Mweo wakua Kristu.