¹ Nene Paulo akuutilue na kutona kwakua Leza kuti nmbe mutumua wakua Yesru Kristu pamo ni mukwetu Sostene. ² Tusemipozia mwe bazumizi ba mu kilonghano kyakua Leza kuli mu Korinto, mwe bantu bakue baluulilue kuba bazuuke mu buumo ni Kristu Yesu, pamo ni bonse bali bamupupa Mulopue Yesu Kristu mu nkendo yonse, wene i Mulopue wabo niwetu. ³ Leza situe pamo ni Mulopue wetu Yesu Kristu bamipeele buwame ni mutende. ⁴ Nene Paulo ndinamusantila Leza lyonse palua buwame bumwaapeelue kupitila muli Yesu Kristu. ⁵ Pantu mu bwinobwenu ni Kristu, muli banonsi mu byonse mukulanda kwenu ni mukumana. ⁶ Busininkizio bwetu palwakua Kristu mu bumanine bwino. ⁷ Mwemue bapembeele kubwela kwakua Kristu i kimusibuliilue kyabupe kya Mweo Muzuuke. ⁸ Kabili Yesu waakamisunga mwalumine mpaka kumpeleezio ya kyalo, evi tekuti mukabe na kilubo pa busiku bwa kwiza kwakue. ⁹ Ozu Leza wa kisinka waamikuutiile kuti mwampane ni mwana wakue Yesu Kristu, apalile kuketekelua. ¹⁰ Mwe bakwane, namilomba mu liina lyakua Mulopue wetu Yesu Kristu kuti muye mwa unvwana pasili kupusana. Namipaapaata muye mwapwililikile mu buumo ni mu malanga pamo ni mu mapange. ¹¹ Pantu bantu ba mu lipua lwakua Kloe banmwilile nangue mwe bakwane mupuseene pakati kenu. ¹² Kindimukukeba kulanda ni keki, "Kubalua muntu pakati kenu aliwalanda evi, "Nene ndi wakua Paulo," niunge nangue "Nene ndi wakua Apolo," ni unge nangue, "Nene ndi wakua Kefa," Ni unge nangue, "Nene ndi wakua Kristu. ¹³ Eba, mwiizi nangue Yesu akasanikile? Ati! Paulo i waamifwiliile pa musalaba? Kubako mubatiziiziwe mu liina lyakua Paulo? ¹⁴ Namusantila Leza pantu nsyaabatiziizie muntu pakati kenu inga sie Krispo ni Gayo. ¹⁵ Kansi tekuli muntu wakulanda nangue waabatiziiziwe mu liina lyane. ¹⁶ (Ni kiine kabili nalanguluka nangue naamubatiziizie Stefano pamo ni lupua lwakue. Inzi nsitangulukile kine naabatiziizieko ni unge.) ¹⁷ Kristu Yesu tantumiine kubatizia, inzi wantumiine kusimikila mpunda iweme. Ni pakako ndinasimikila pasili kubambia maano a bumuntu nkeeza kulengia lufu lwakua Kristu pa musalaba kuba lwa mpuni. ¹⁸ Bantu bazeezele bene balibalanda nangue mpunda palua nfua yakua Kristu pa musalaba ni ya balubi. Inzi kuli fwefue bapusukile, mpunda iweme i maka akua Leza. ¹⁹ Pantu mu malembo Leza alandile evi, "Naakeenoona maano a bantu ba maano, naakasuula kumana kwa bantu ba mulangue." ²⁰ Ale bantu ba maano bali pi? Ni bantu ba mu langue bali pi? Ao balanzi ba mu kono kyalo bali pi? Leza waalangisiizie nangue maano a kono kyalo ni bulubu?. ²¹ Pantu Leza wa maano waabalengele tekuti bamumane na maano abo a bumuntu. Inzi ezi nsimiko itulilwasimikila, ibalibalanda nangue i ya bulubie Leza waatonene kuti apususiiziemo bantu bali bamuzumina. ²² Bayuda bene balibakeba kumona tupapo twakusinikizia. Bagiriki ni bo balibakeba maano. ²³ Inzi fwefue tulitwasimikila mpunda palwakua Kristu waakonkomeenue pa musalaba, mpunda iliyalandua na Bayuda nangue ni mpunda ya busoni. Bagriki ni bo bali balanda nangue ni mpunda ya bulubi. ²⁴ Inzi Bayuda ni bazima basaakwilue na Leza bene bamanine nangue Kristu i maka akua Leza, kabili nangue Kristu i maano akua Leza. ²⁵ Pantu bulubi bwakua Leza, imaano akilile maano a bantu. Ni bunake bwakua Leza i kuluma kukilile kuluma kwa bantu. ²⁶ Mwe bakwane, languluke vimwaali lumwaakuutile na Leza pakati kenu tepaali bantu ba maano bengi ao bantu ba buvinde bengi ao bantu bakindeeme. ²⁷ Inzi Leza wasaakwile kisikindeeme pano pa kyalo, evi amonie busoni bantu balumine. ²⁸ Waasaakwile kintu kisuulilue ni kileebwilue pamo ni kimwenue na bantu kuba kya mpuni evienoone kelia kikindeeme. ²⁹ Kansi tekuli pa be muntu wakwilasia pa menso akua Leza. ³⁰ Inzi Leza i waamilengele kuba mu buumo ni Kristu Yesu, kabili waamukitile Kristu kuti aye wali maano etu. Fwefue tumwenue na Leza twalibalunghami, ni pakako tuli bazuuke bakua Leza ni balubwilue kupitila muli Kristu. ³¹ Kansi namilomba kuti kibe nga evelia vilivyalanda malembo nangue, "Onse atonene kwitasia ntasiizie mu belia bikitilue na Mulopue.