¹ Lulabhalwamala kuhita lusiku lwe Sabhato olo bhukwenzuka kulusiku lwe kwandya lwe musamvu, Mariamu magdalena, ne Mariamu oya undi bhaliza kusilinga sizila. ² Ilabhukilamo nahinga kulu muno kulwekubha malaika we mukama alatikila kufuma mwilunde, alalihilingisya elyo ibhale kulipunwyaho hamuzigo gwe sizila alalikalikizya. ³ Bhusyo bhwamwe bhwalabhagilanga kati lulabhi, ne syambalwa syamwe syali kati theluji. ⁴ Kulwekumwobhaha bhalindi bhalazuguma bhalabha kati bhafwile. ⁵ Malaika alabhabhwila abhone bhakima oti mutakobhaha kulwekubha nekumanwya oti mwekumukobha Yesu oyo alagalazibhwa. ⁶ Ataliho ahane azyokile kati omwo alayombela, nemwize mulinge lwande olwo mukamawinu ali bhulaleho. ⁷ Nekandi muzye bhwangu mubhabhwile bhahemba bhamwe oti azyokile kufuma mubhafwile, nekandi atongile kuzya Galilaya eyone nge mukumusangayo." ⁸ Abhone bhakima bhalafumaho aho hasizila ne bhwobha ne bhuyegi bhukulu, bhaliluka kuzya kubhabhwila bhahemba bhamwe. ⁹ Aha bhakuzya kubhabhwila bhahemba bhamwe, kwiza kwimanikila Yesu alasanzya nabho alabhabhwila oti mulimpola imwe, ahabhamwegelela bhalamukwata kumagulu bhalamwisenga. ¹⁰ Ngenaho Yesu alabhabhwila otimutakobhaha, nemuzye mubhabhwile bhadugu bhane bhazye Galilaya, ngeyo bhakunisangayo. ¹¹ Ahabhakuzya bhamwi bhe bhalindi bha bhalingila mumuzengo, bhalazya kubhabhwila bhagabhizi bhakulu yonane eyo yigezile. ¹² Aha bhibhilinga sihamwi ne bhanampala, bhalatolana mihayo nekandi bhalabhaha bhasilikale mpiya ninki. ¹³ Bhalabhabhwila oti mukuyomba oti bhahemba bhamwe bhalibhiza bhufuku bhalamwibhamo ahatwali twatindile tulo. ¹⁴ Ne muhayo ogwane olo gavana akabha agwomvwa ifwe tukumubhehagula tubhasizye imwe. ¹⁵ Aha bhamala kwanukula ezyo mpiya bhalagema kati omwo bhali bhahanilwe, ne muhayo ogwane kulibhukumuke mu Bhuyahudi mpaka bhulelo. ¹⁶ Ngenaho abhobhahemba ikumi na umwi bhalazya Galilaya kulugulu olwo Yesu ali abhalagizile. ¹⁷ Aha bhamubhona bhalamwisenga, alahe bhamwibhabho bhalabha ne bhunantazumya mumizo zyabho. ¹⁸ Yesu alabhegelela alabhabhwila oti nahebhilwe bhudula bhwona mwilunde ne munsi. ¹⁹ Kulweyo nemuzye mubhahembeke bhanamahanga bhona, eno mukubhabhatizya mwizina lye mwa Dada ne lye mwana ne mwizo mutakatifu: ²⁰ Mubhe mukubhalanzya kuikwata yona eyo ndabhalanzizye imwe, ne mulinge one ndisihamwi ninu nsiku zyona kuhikila nkalilo ye bhwelelo.