¹ Akemoka hayo kughya umughi ughwabho, abhanabhegha bhaye bhakamosorana. ² Urusiko urwu ukumunya hano rwahikire, akasimya kwegha mwisengero. Abhanto abharu bhakamwitegherano okoroghoribhwa. Bhakaghamba, "Hanyore ameghyo ghano?" " Mbosoke bhwa kerengereke keno yanyora?" "Arakora amahiku ghano ko amabhoko ghaye?" ³ "Igha ono te umwatya we shente, mumura uwa Mariamu nu umuhiri wabho Yakobo, Yose,Yuda (na)Simioni? Bhahara tebhara twikaye nabho?"Tebhashomeywe (na) Yesu he. ⁴ Yesu akabhatebhya, "Omoroti takobhora esokohe, naho nunyora nabhahiri bhayehe. ⁵ Teyatore kokora, amakong'u komabhoko ghayehe yabhatoreye amabhoko abharoye no okobhahwena. ⁶ Yaroghoribhwi bhokong'u kukwanga kwitabherya kwabho. Ghweki akatora shemberi ishya hang'e areghya abhanto. ⁷ Akabhabherekera abhegha bhaye bhara ikomi (na) bhabhere akasimmya kobhaha obhotoro. Akabhaha shinguru ighoro yu kuhisha ebhehwe ebheghogho, ⁸ Akabharagherya bhatakaghegha kyokyonswe kera bhagheghe inyimbo iyene. Bhatakaghegha omokate, hamwe ekekapo, hamwe shimbirya; ⁹ naho bhaibhohe shengeto, bhatakaibhoha shengansho ibhere. ¹⁰ Ghweki akabhatebhya, "Righutu ryoryonswe reno morashe mosohe, mwikareho kohekera hano moryemoka kurwaho. ¹¹ Hano motariturung'anwa nu ukwanga kwitegherwa murweho, mwekong'onte urutu ko maghoro ghenyu okoreke mushe kobhashuta." ¹² Nabho bhakaghya bharatebhya abhanto bhaitughame nu ukutigha ibhitimba bhyabho. ¹³ Abhegha bhaye hano bhagheye mbakenyiri ibhitimba bhyaru no okohaka abharoye amaghuta bharahwena. ¹⁴ Omokama Herode hano yighure ghayo, kobhora irina irya Yesu ryamanyekana bhokong'u. Abhanto abhamwe bhakaghamba, "Yohana aryokire ku igho, shinguru shaye nsho akokora emeremo." ¹⁵ Abhanto abhande bhakaghamba, "Ono Eliya."Abhande bhakaghamba, "Ono no omoroti, ko bharoti bhara abhakare." ¹⁶ Nahohano Herode yaighure ghano akaghamba, "Yohana, ono natomire abhasirikare bhamobhotore omotwearyokire." ¹⁷ Herode umwene yatomire abhasirikare koghota Yohana atorwe mushera kukughira iya Herodia (moka murawabho Filipo) ko bhora yarenge amotetire. ¹⁸ Kobhora Yohana yatebhiri Herode, "Tebhuya koteta omokari uwa wamwenyu." ¹⁹ Kurwa enkagha iyo Herode akawansha komorerera akatuna aite Yohana, nawe teyatorehe, ²⁰ kobhora Herode yobhohire Yohana; yamanyire igha mohoreru, yarenge ghweki yamutighire no omorembe.Hano yamwitegheranga, yaroghore bhokong'u, nawe akashomerwa kumwiteghera. ²¹ Hano yahekeye enkagha okanyora shihikire shinsiko ishwo kwebhorwa Herode akakora abhasirikare bhaye obhogheni, abhasirikare, (na) abhimereri abha Galilaya. ²² Nho mohara uwa Herodia yasohire akabhenera mobhoronge bhwaho, akasambarokya omokama Herode (na) abhagheni bhano bharyanga ibhyakorya ibhya moghorobha. Nho omokama yatebhiri omohara ora, "Nsabha keno ukutuna oni nendakohe." ²³ Akatyana no okoghamba, kyokyonswe keno oransabhe, nendakohane,nunyora niritene eryo obhokama bhwane." ²⁴ Omohara ora akarishoka kebhara yo obhogheni kobhorya nyakuwabho, "Nke ndasabhe?"Akaghamba, "Omotwe ughwa Yohana Umusubhi." ²⁵ Akakyora mobhogheni bhongo bhongo omokama akasimya koghamba, "Ndatuna ohete ighoro yi ikitubha, omotwe ughwa Yohana Umusubhi." ²⁶ Omokama akaroghoribhwa bhokong'u, (na) keno omohara ora yasabhire nahokobhora yamwibhakeye mobhoronge ubhwa abhagheni, tiyangire risabho ryayehe. ²⁷ Omokama akatoma abhasirikare kurwa mobharendi bhaye kughya koretera omohara uyo omotwe ughwa Yohana. Omorendi yagheye kobhotora omotwe ughwa Yohana arenge mushera. ²⁸ Akareta omotwe ughwa Yohana aghoghegheye kukitubha akahana omohara ora, omohara ora akahana mayo wabho. ²⁹ Abhanabhegha abha Yohana hano bhaighure igho, bhakaya koghegha omobhere ghwaye bhakaghya koghobheka. ³⁰ Abhahorwa, hano bhakyore kurwa kotebherya bhakaekomana mobhoronge ubhwa Yesu, bhakamotebhyaghoonswe ghano ghabhaye (na) kigho bheghiri. ³¹ Wonse akabhatebhya, "Mushe hano twibhise tumunyehake." Abhanto abharu bhashanga ku mwahorwa abhande bhaemokanga kurwaho, bhakatamwa korya ibhyakorya. ³² Ku igho bhakarina mwitubha bhakaghya kwibhisa hano abhanto bhatarenge. ³³ Abhanto bhakabhamaha bharemoka abharu bhakabhamanya, bhakabhakenyera ko maghoro kurwa imighi ghyonswe,bhakabhatangatera kuhika komorambo. ³⁴ Hano bhaghobhire komorambo, akamaha abhanto abharu, akabhabhera, kobhora bharenge kya amang'ondi ghano ghatana omoresya. Akasimya kobheghya amang'ana amaru. ³⁵ Enkagha ekaghya moghorobha yarenge, abhanabhegha bhaye bhakamotebhya, "Hano haibhisire imighi teghehohe ne enkagha egheye bhokong'u. ³⁶ Ragha abhanto bhaghi kumighi ighya hang'e (na) korobheri rwa hang'e okoreke bhaeghore ibhyakorya." ³⁷ Naho akabhatebhya, "Mobhahane ibhyakorya." Bhakamotebhya, "Toratora kughya koghora emekate ighya dinari maghana abhere tobhahe bhare?" ³⁸ Akabhatebhya, "Mona emekate erenga?Moghende moghemahe." hano bhagheroshe bhakamotebhya, "Ghehoetano (na) shinswe ibhere." ³⁹ Akabhatebhya abhanto bhaikare kobhekomo komanyanki amabhese. ⁴⁰ Bhakabhaikarya kobhekomo, Ibhya merongo etano kohekera ighana imwe. ⁴¹ Gweki akaghegha emekate ghera etano (na) shinswe ibhere, akamahera kwisaro, akaghenonka akamara akahana abhegha bhaye bhaghotere okoreke bhahane ehamate. Ghweki akatwenya shinswe ibhere ko bhanto bhoonswe. ⁴² Abhanto bhonswe bhakarya (na) bhakeghota. ⁴³ Bhakakomanya ebhetene bhyemekate bheno bhyarenge bhitighaye, Bhekeshora ebhekapo ikomi (na) bhibhere, ne ebhetene ibhya shinswe. ⁴⁴ Abhashasha bhano bhareye emekate (na) shinswe mbekwe bhitano. ⁴⁵ Abhanabhegha bhaye bhakamotebhyabharine mwitubha bhaghende ntahana yende, bhahike Bethsaida, enkagha iyo umwene akeragha ehamate. ⁴⁶ Hano abhanto bhamare kwemoka, akaghya mokekereghe kosasama. ⁴⁷ Hano yahikire moghorobha, (na) ritubha ryabho rihikire kubhuribha, yarenge umwene komorambo. ⁴⁸ Bhakarora bharanyanka kotema engahi kobhora omokama mwaru ghwarenge ghorabharebhera. Hano yahikire momakeye akabhaghyako, araghenda ko manshe, akatuna kobhahetera. ⁴⁹ Hano bharoshe areghenda ko manshe bhakahaha bharakanya nisambwa bhakakura ikurate. ⁵⁰ kobhora bhamoroshe bhakahaha no okobhoha. akaghamba nabho arabhatebhya, "Mokarehe! no oni! Motakahaha." ⁵¹ Akarina mwitubha, no omokama ghokatenda, bhakaroghora bhokong'u. ⁵² Kobhora tebharenge bhamanyire emekate ghera nke ghyorokyanga.Kobhora amaiteghero ghabho okanyora bhatamirwe komanyerya ⁵³ Hano bhambokire humbu,bhakahika ikyaro kya Genesareti bhakaghobha hayo. ⁵⁴ Hano bhikire mwitubha mora, abhanto bhakamomanya. ⁵⁵ Bhakakenya koraghanya kosheng'ongo shyende shonswe abhanto bhakaekomana bhakareta abharoye bhaghegheye komararo, bhora bhaighwanga yishire. ⁵⁶ Hano honswe yasohanga mosheng'ongo, hamwe mumighi, nunyora ngateghate yi bhyaro,abhanto mbatore abharoye ahase ahe metera, (na) abhanto bhakamosabha aitabheri abharoye bhakuni ororebhebhe urwa umwenda ghwaye. Igho bhooswe bhano bhakuniri umwenda ghwaye mbahwenibhwi.