¹ Mbambokire humbu yi inyansha era, korong'ongo urwa Gerasi. ² Enkagha eno Yesu yaikanga mwitubha, umushasha ono yarenge ne ekehwe ekeghogho akasha ku mwene kurwa era bhakobheka abhaku. ³ Omonto uyo yaikae iyo bhakobheka. Taho ono yatore komokanyahe, nunyora nkomobhoha ne ebherang'ani. ⁴ Yare yabhohwa kare ne ebherang'ani (na) amakomo. Akabhotora ebherang'ani (na) amakomo ghaye ghakabhotoka. Taho ono yamokere shinguruhe. ⁵ Ubhutiko no omobhaso hano yarenge moshembehera (na) mobhekereghe, yakuranga nu ukwikebha umwene (na) amaghena amoghe. ⁶ Hano yaroshe Yesu hare, akamokenyera akaihinya mobhoronge bhwaye. ⁷ Akakura ekero ekenene, "Nke ukutuna nkokore, Yesu, Omona uwa Waryobha ono arenge Ighoro? Ndakosasama kurina rya Waryobha umwene, otakanyankya." ⁸ Kobhora Yesu yarenge amotebhiri, "Murweko omonto ono, uwe enkoro inyanku." ⁹ Nawe akamobhorya, "Nuwe we?" Wonse akamohonshokerya, "Irina ryane noni Legioni,kobhora mbaru tore." ¹⁰ Yamokomereyi bhokong'u atakamuhira kebhara ko rong'ongo ronde. ¹¹ Ryarengeho rihisho irya shembeshe reno ryamenyanga mokekereghe, ¹² nabho bhakamokomerya, "bharaghamba tuhire mwihisho irya shembeshe; tuikaremo." ¹³ Bhono akabhaitabherya;shenkoro shembe shekamurwako no okosohera shembeshe, (na) shembeshe shekaika kokekereghe sherakenya kughya kunyansha, kohekera shembeshe bhekwe bhibhere shikasika munyansha. ¹⁴ Bhara bharesyanga shembeshe bhakang'osa bhakakenya kuhira amang'ana ko ghano ghabhaye mubhibhure (na) mumighi, abhanto abharu bhakarishoka kughya komaha keno kebhaye. ¹⁵ Bhakasha ku Yesu komaha omonto ono yarenge ashure ne ebhehwe_ ebheghogho ibhyaru_aikaye hayo, yibhohibhwi, arenge bhuya, bhakobhoha. ¹⁶ Bhara bharoshe keno kyakorwe ko omonto ora yarenge ashure ne ebhehwe mbabhatebhiri keno kyabhaye (na) koshembeshe shera. ¹⁷ Bhonswe bhakasimya komokomerya Yesu arwe morong'ongo rwabho. ¹⁸ Hano yasohanga mwitubha,ora yarenge ashure akamosasama aghi nawe. ¹⁹ Yesu akamwitabherya, akamara akamotebhya, "Kayi waho na kobhanto bhaho obhatebhi keno Omoneneakokoreye, ne ikyabhera keno akorokiri." ²⁰ Akaghya akasimya koraghanya amang'ana amahiku ghano Yesu amokoreye kontahana yonswe iya Dekapoli,(na) kera omonto akaroghora. ²¹ Neenkagha eno Yesu yambokire ghweki orobhareka ronde, mwitubha, abhanto abharu bhakaikomana hang'e nawe, hano yarenge komorambo ughwi inyansha. ²² Uwonde uwa abhatangati abha risengero ono yabherekerwanga Yairo, yaishire, hano yamoroshe, yamughwereye momaghoro ghaye. ²³ Akamokomerya bhokong'u bhokong'u araghamba, "Mohara wane omoke aratuna kukwa. Ndakokomerya, nsho umukuniko abhe omohoru." ²⁴ Bhakahinana (na) abhanto abharu, bhakaisuka hang'e nu ukumwinara. ²⁵ Yarengeho omokari ono yagheranga amanyinga ku imioka ikomi ne ebhere. ²⁶ Yanyankire bhokong'u kobhareri abharu (na) akasarya ebhento bhyonswe bheno yarenge nabhyo, nawe teyanyore obhohoruhe. ²⁷ Akaighwa amang'ana gha Yesu. Akasha nyuma yaye ghate ghate iya abhanto, akakunya umwenda ghwaye. ²⁸ Kobhora yaghambire, "Hano ndakuni umwenda ghwaye ndahwena." ²⁹ Hano yamukuniri, amanyinga ghakabhotoka, akaighwa ahwenibhwi kurwa munyanko yaye. ³⁰ Kamwe igho Yesu akaimanya igha shinguru shimuhwereye. Akaisyorya abhanto akabhorya, "Newe ankuniri umwenda ghwane?" ³¹ Abheghibhwa bhaye bhakamotebhya, "Oramaha abhanto bhano bhakwikomereye nauwe orabhorya, "newe ankuniri?"' ³² Naho Yesu akaisyorya ntahana shyonswe komaha ono yamukuniri. ³³ Omokari, akamanya keno kimunyore, akobhoha nu ukurighita. Akasha akaghwa mobhoronge bhwaye akamotebhya obhohene bhyonswe. ³⁴ Yesu akamotebhya, "Mohara imighiro ghyaho ghikuhweniri. Kaghi no omorembe uhwenibhwi kurwa ku nyanko yaho." ³⁵ Yesu hano yashumanshanga, abhanto abhamwe mbaishire kurwa mwisengero, bharaghamba, "Mwiseke waho akure. Nkwake oghenderi kunyankya umweghya. ³⁶ Naho hano Yesu yaighure kera bhaghambanga, akatebhya umwimereri uwarisengero, "Otakobhoha. Itabherya." ³⁷ Teyaikaereyi omonto wowonswe komorongeka, akabha Petro, Yakobo (na) Yohana wamwabho Yakobho. ³⁸ Bhakasha ka mwimereri uwa risengero nawe akarora umuhiri nisho, umwaru ughukukura bhokong'u. ³⁹ Hano yasohire ka, akabhatebhya, "Nkwake mokoroghora no ukukura? Omona tarakwahe naraye." ⁴⁰ Bhasimya komosera, nawe akabharishokya bhonswe kebhara akaghegha su wabho omona nyakuwabho (na) bhara bharenge nawe, bhakasoha hara omona yarenge. ⁴¹ Akaghota okobhoko ko omona akatebhya, "Talitha koum," ako okoghamba omohara ono moke ore ndakoretirya, emoka." ⁴² Kamwe hayo hayo omona akaemoka akasimya koghenda (kobhora yarenge wi imioka ikomi ne ebhere). Hayo hayo bhakaroghoro bhokong'u ⁴³ Akabhahamera (kwa) bhoroigha monto wowonswe atakamanya ighoro ya reno. Akabhatebhya bhamohe ibhyakorya.