¹ Oii, montu umwedu nare guetranwa Anania, na Safira moghema wakwe, vegarinja sehemu aughwae, ² navafiha sehemu aa hela nevariijiye(moghema wakwe namweso nare waremanyie erei), na nawaetra sehemu neesaghie naumeekaa umeghuu aa metume. ³ Lakini Petro wahanya, "Anania, nentuni setrani wauijueya nkhoo ako uhanya ugheghe gune Mwahu Mweru na ufiha sehemu aughae wa moghunda? ⁴ Ighondo nare rekee retrina rinjwa, nare nti ughae wako? Nanare warerinja , nare retrifang'e amaamuzi ako na?nare uri ugheme intu erei unkhoo ako? Utrina vaghonga anadamu, ila wamoghonga Mungu." ⁵ Moghatre otregheya ighani iyii, Anania agagwa fang'e nawakuya. Na vong'e nevatregheye eri vegatreja. ⁶ abalanda vaja usonge navamohendea usanda, na vamotroa unji navamotruhea. ⁷ Nare akea masaa atratu vii, moghema wakwe agakea mong'e, atrune nentuni nejaahendeka. ⁸ Petro wamwera, "Mbwera, mwese nare mwarinja moghunda gwa hela esee."Wahanya, "Hono, gwa hela esee." ⁹ Petro wamwera, "Yuhendeka urii mwafanga nyong'e itrambe remwdu umosoya Mwahu wana Bwana? Ravaa, meghuu avoo nevamotruhea moghosia wako yomolango, na vejuguhumbua navee vegutro unjii." ¹⁰ Ghafla wagwa umeghuu ama Petro, watrena nkhoo, na abalanda avoo vajamong'e vahanga wakuya. Vmohumbua umotroa unji, na umotruhea vife na moghosia wakwe. ¹¹ Hofu nenkuu aja unto aikanisa rong'e, na gunto aa antu vong'e nevatregheye mantu ayai. ¹² Isara nyingi na maajabu nare yuhendeka gwa antu ukerea meghono ametume. Nare veetrambe remwdu uguukumbi wama Suleimani. ¹³ Lakini, gutrii monti sia nare wina wijaghumbui wovasambeya; hatra oi, vegafea hesima gunto aantu. ¹⁴ Na pia, anyohuvea vang'i narte vezidi ingefa gune Bwana, idadi nenkuu aoghosia na aghema, ¹⁵ mpaka vegavahumbua na aremu omotraa, na uvarencha uguitranda na umokochi, ili kwamba Petro negukea, mwimimi wakwe udahe usima gunto aw. ¹⁶ Hafo no. idadi antu nevaingi egaja ufuma umeji neezungukie Yerusalemu, veetra aremu na antu nevepagawe na mafefo, na vong'e vegaforwa. ¹⁷ Lakini kuhani nemokuu agaemeka, na vong'e nare veitrambe remwedu nayo (nechu nare vaizehebu ra masadukayo); na vegeijua ovee ¹⁸ vaghora meghono awe uvakwatra metume nauvaeka mong'e aigereza la jumla. ¹⁹ Na ighondo rautriku malaika warughua melango aigereza na uvatrongeria unji nawahanya, ²⁰ "Endi, mwendo emeka ugihekalu na uvaera antu nkhani yong'e ya Ufanga urui." ²¹ Narevatregheya erei, vegakea ugihekalu ighondo royova ufuma na vafundisia. Lakini, kuhani nemokuu agaja na vong'e nare vinawe, na vaetrana ibaraza rong'e, na anyampaa vong'e na antu va Israeli, na vavatroma ugigereza ili uvaetra metume. ²² Lakini atromami nevaendie, vetrinavahanga ugigereza, vegasuka navafunya taarifa, ²³ "Gwa hanga igereza reguigiwe ijaa, anyolinda veemekie umolango, lakini najagurughua, gutrina ona montu mong'e." ²⁴ Ighondo jemedari wa ihkalu na makuhani nevakuu nare vatregheya nkhani isii, vegekewa na shaka nenkuu gwa soko awe nevoghema intu erei rejuhendeka reuri. ²⁵ Na umwedu waja wavaera, "antu nejamovatrungie ugigerza vogihekalu na vofundisia antu." ²⁶ Oi jemedari agaenda na atromami, na vavaetra, lakini bila uhenda vurugu, gwa soko vava trejie antu navefo vaghua na magwe. ²⁷ Nare vavaetra, vavaeka usonge aibaraza. Kuhani nemokuu agavaweya ²⁸ wahanya, "Jagwavaera motrafundisie gwa rina erei, na kee momeijueya Yerusalemu gwa ifundisio ranyu, na usegha uetra saghami amontu uyui gunto itru." ²⁹ Lakini Petro nametume vavasucha vahanya, "Lazima gumotii Mungu kuliko nyenye. ³⁰ Mungu wama vatratra vitru wamouuchiye Yesu, nemwamouraghie, gwa umoning'inia umotre. ³¹ Mungu agamohumbua gwa moghono wakwe wagulelo, na wamohenda uhendeka Mokuu na mochoi, ufunya mosamaha gwa Israeli, na mosamaha wa mahutie. ³² sese gumasudanga wamantu ayai, na Mwahu ne Mweru, nchu ne Mungu wamofunya gwa avoo nevoginyumpia." ³³ Ajumbe vaebarazanare vatregheya oii, vakwatrewa na makuo vasegha uvauragha metume. ³⁴ Lakini farisayo nareguetranwa Gmaeli, mwalimu wa seria, nawahesimewe naantu vong'e, agaemaka nawahanya metume vehowe vefunywe unji ighondo rekufei. ³⁵ Na wavaera, "Aghosia va Israeli, hendeki momakini ino naeroo nmoreyanja uvahendea antu avai. ³⁶ Gwa soko, ighingi neakire, Theuda agahumbuka naugisegha uhendeka montu nemokuu, na idadi aantu, nare vemia inne vegamosambeyqa.Agavauragha, na vong'e nare vomoghemba vegabaghuka navayaghaa. ³⁷ Baada amontu uyui, Yuda mogalilaya, agahumbuka matriku asaa ohadewa sensa, wautra antu vangi unyuma akwe.. Namweso no agayaghaa na antu nare vemotii vegabaghuka. ³⁸ Fanui novaera, gehei gwa antu avi na movareke veso, gwa soko, mweso mofango uroi au mwemo uroi ne aantu ijujughutrwa. ³⁹ Lakini mwese nea Mungu, motrijudaha uvaghiya; modaha uhanga mosindana hatra na Mungu."Oii, vegashawisheka na nkhani yakwe. ⁴⁰ Nahafo, vegavaetrana metum mong'e vavqaghua maghotria navavera vetraeghetie gwa rina rama Yesu, na vavareke vefwaye. ⁴¹ Vegafwaya usonge aibaraza veyanjetre gwa soko vavarwa ne antu nevestahili ughaseka naudea uhesimewa gwa swoko arina resee. ⁴² Gwa hiyo, moitriku, moghatre aihekalu na ufuma ughaya mpaka ughaya vegaendelea ufundisia na utranantia Yesu kwamba ne Masihi.