¹ Ighondo nare Petro vina Yohana veeghetiye na antu, makuhani na monyolinda wagihekalu na masadukayo vegavaendea. ² Vauzikie ino gwa soko Petro vina Yohana nare veeghetiye sayo uhusu Yesu na uhanya uhusu iuka rakwe ufuma ugikuya. ³ Vegavakwatra navaveka ugigereza mpaka diu neifuatie, gwa soko nare aghea iampende. ⁴ Lakini antu nevaingi narevatregheya ukhani navahuvea; na aghosia nevahuvi nare vakadirewe vee maghana atrano. ⁵ Nanareagha diu atriku rosonge, akuu vawe, anyampaa na asudangei, itrambe remwedu vegagironda Yerusalemu. ⁶ anasi kuhani nemokuu nare wefo, na Kayafa, na Yohana, na Iskanda, na vong'e nare anyadughu vamakuhani nemokuu. ⁷ Gune nare vevekie va Petro vina Yohana moghatre awe, vawaweya, "Gwa nguu ikhee, au gwa rina rek mohenda ayai?" ⁸ Na, Petro , nare weijue ,Mwaho ne nMweru, wavaera, "Nyenye akuu vaantu, na anyampaa, ⁹ mwese sese itriku ra reo guweywa uhusu mantu nemaja nera hendwa omontu uyui ne morue - gwa uree montu uyui ginya wahendwa mofanga? ¹⁰ Naneremanyeke resee gune nye na gwa antu vong'e uu Israeli, kwamba gwa rina rama Yesu Kristo wa Nazareti, necghu mwamosulubisiye, nechu Mungu wamouuchiye ufuma ugwakuii, ne gwa njea akwe kwamba montu uyui uguemeka afai usonge anyu neuketri ufanga. ¹¹ Yesu Kristo mweso neigwe nenyee anyojenga mwarihitrie, lakini nechu rahendiwe igwe nerikuu rompeo. ¹² Gutrii uchoi gwa montu muuya awae yote. Gwa soko gutrii rina riuya ufang'e auremi nevarefiwe antu, nechu gwa resee gudaha uchowa." ¹³ Nare vaona wijaghumbui wama Petro vina Yohana, vamanya kwamba neantu vakawaida nevetrikwetri elimu, vasangaa, vamanya kwamba Petro vina Yohana vaumbie vina Yesu. ¹⁴ Gwa soko vamuune montu uyoo newaforiywe weemikie itrambe remwedu nayo, narevetrikwetri intu rohanya gunto aerei. ¹⁵ Lakini nare vadaha uvaera metume vefwaye usonge aa mokutrano wa ibaraza, vegaeghetia veso gwa veso. ¹⁶ Vegahanya, gujuvahendea ntuni antu avai? Ne trutri mooujiza wa ajabu wahendeka ukerea antu avai umanyekie umomontu neguduva uu Yerusalemu; gutrudaha ure hitra erei. ¹⁷ Lakini, ili intu erei retradahe uenenda gwa antu, neguvaonye vetradahe ueghetia gwa antu gekaku uhusu rina erei. ¹⁸ Vegavaetrana Petro vina Yohana navavera umotraeghetie kanke wala ufundisia gwa rina rama Yesu. ¹⁹ Lakini Petro vina Yohana vavajibu vavaera, "Mwese nesawa umiho aa Mungu uvaghemba nyenye kuliko Mungu, hukumu nyenye aghonjo. ²⁰ Soko sese gutrudaha ureka ueghetia mantu negwayaune nauyatregheya." ²¹ Nare vavaonya ino va Petro vina Yohana, vegavareka vefwaye. Vetrinadaha uhanga soko gekeku ovafa adhabu, gwa soko antu vong'e nare vomohumbua Mungu gwa eroo nare rahendekie. ²² Montu nare wafoomuujiza woforwa agahanga meghao meeingi mpaka megha arobaini. ²³ Narevavarekea, Petro vina Yohana venda gwa antu vaw naovaera mantu ong'e nare makuhani na anyampaa nare vavaera. ²⁴ Narevayatregheya, vafunya ndorii yawe itrambe remwedu gune Mungu vahanya, "Bwana, veve newaombie uremi na iunde na bahari na mointu moghatre ayo, ²⁵ veve nechu, gwa Mwaho ne Mweru, gwa momo wama tratra witru Daudi, motromami wako, wahanyiye, "Nesoko eke antu vamataifa vohenda fujo, na antu vaghema mantu neetrifaire? ²⁶ Atremi vauremi vagifanga itrambe remwedu, na anyotrawala vagirunda gwa itrambe remwedu gunto ama Bwana na gunto ama masihi wakwe." ²⁷ Ne trutri, vong'e Herode na Pontio Pilato, na antu vauremi na antu va Israeli, vegagirunda gwa itrambe renwedu moghatre amoji urui gunto aa atromami vako Yesu, nechu wamoirie makutra. ²⁸ Vegagirunda uhenda ong'e nechu moghono wako namafenji ako wayaamuru mwandio nare ikee etrina gighea. ²⁹ Fanui, Bwana, yarave matisheo awe, na naovajalie atromami vako urehanya ineno rako gwa ugijaghumbua. Ili ³⁰ kwamba negughora moghono wako uforia, ishara na maajabu idahe ugighea ukera rina ramotromami wako Yesu." ³¹ Nare vadaha uromba, eneo nare vegirundie rahingiswa, na vong'e vaijuwa na Mwaho ne Mweru, na vegaeghetie ughani wa Mungu gwa udea utreja. ³² Antu nare vahuvie nare vina nkhoo emwedu na nguu imwedu: nagutrii montu hatra umwedu newahanyiye kwamba intu nare uketri nare rakwe imwene; hiya ayo nare veotrumie mantu ong'e ginya awe. ³³ Gwa nguu nenkuu metume nare vohanya usuhuda wawe uhusu iuchwa rama Bwana Yesu, na neema nenkuu nare egunto awe vong'e. ³⁴ Naregutrii montu gekeku moghatre aw nare wakefewe na mantu neuyaseghetre, gwa soko antu vong'e nare vekwetri hati ya maeneo au nyumba, vegayarinja na vaetra hela ya mantu nevariijiye ³⁵ na uyaeka fang'e ameghuu ametum. Na negaaghana gwa kela monyohuvea, ugighweya gwa momontu ginya nare unamasegho. ³⁶ Yusufu, molawi, montu ufuma Kipro, agafewa rina rama Barnabasi na motume(maana ayo, ne mwana wa faraja). ³⁷ Neuketri moghunda, agaririnja nawaetra hela, waikaa fang'e ameghuu aa metume.