¹ Nareamurewa vii eseghetwe guhende mohenjo gwa ukerea umaji uenda Italia, vegamokabidhi Paulo na atrungwa vauya gune afisa umwedu wamajesi ra Geroma neguetranwa Julio, wa Gekosi ga Agustani. ² Gwanaentea meli ufuma uu Adramitamu, nechu nare ehende mohenjo umpeo aa pwani aa Asia. Oi gwakea uu bahari. Aristika ufuma Thesolinike aa Makedonia waenda itrambe remwedu nasee. ³ Itriku nerefuatie gwa sima uu muji wa Sidoni, nechu Julio agamohendea Paulo gwa ujaa na wamoruhusu uenda gune jamaa wakwe ufokea ukarimu wawe. ⁴ Ufuma hafo gwenda ubahari gwahenda mohenjo uzunguka geziwa ga Kipro nechu nare geufihie mpefo, gwa soko mpefo nare yugusumbua. ⁵ Baada ohendeka gwa henda mohenjo gwa maje neefife na Kilikia na Pamfilia, gwaja Mira, muji wa Lisia. ⁶ Hafo afisa uyoo wa ijesi raa Geroma, wamehanga meli ufuma Alexandria nechu nareeseghetwe ehende mohenjo uenda uu Italia. Wagunanteya mong'e. ⁷ Baada ohendeka gwa henda mohenjo mpompwea gwa matriku maingi na hatimaye gwa hendeka gwa ghea gwa maghaseko ino fife na Kinidas, pefo etrina hanja kake uenda ijea esee, oi gwa henda mohenjo umpeo aa mwimimi wa Krete neguukenga mpefo, mokabala na Salmone. ⁸ Gwahenda mohenjo umpeo aa pwani gwa ughamu, mpaka gwa ghea umahali neguetranwa Fari Haveni nechu efife na muji wa Lasi. ⁹ Gwa horie ighondo riingi ino, na muda wawamofungo wa Geyahudi nare wakea, na fanui nare guvee uendelea namuhenjo.Oi Paulo waguonya, ¹⁰ wahanya, "Aghosia, nekengee mohenjo negusegha guuhoe ijuhendeka naovee na hasara nyingi, nti ameegho gutru na meli, lakini hatra aa odovo witru." ¹¹ Lakini afisa waijesi ra Geroma wamoghemba ino bwana wakwe na monya meli, ukea mantu ayo nechu aeghetriywe na Paulo. ¹² Gwa soko bandari nare ntisehemu nempofu ueghaa ighondo rampefo, mabaharia vaingi vaseya guhende mohenjo ufuma hafo, ili gwa namna gekaku gudahe ughea muji wa Foinike, gueghee hafo ighondo rampefo. Foinike ne bandari kuko Krete, na igiravie traghama neakeya na khuma neakeya. ¹³ Mpefo aa khuma nare nareandia uja mpompea, mabaharia vira vahanga eroo nejavereghema. Vatringuya navandia mohenjo umpeo ya Krete fife na pwani. ¹⁴ Lakini baada aighondo rinyui mpefo nenghae, neguetranwa Wa traghama neakeya, wandia ugughua ufuma umpeo aa gesiwa. ¹⁵ Ighondo nare meli aelemewa na uemwa uhuma mpefo, gwagiyanja na hali esee, gwa henda mohenjo nayo. ¹⁶ Gwa dua ukerea mpeo esee nare yuhoa mpefo agesiwa negeetranwa Kauda; na gwaa maghaseko ino gugadaha uchoa motumbwi. ¹⁷ Baada ohendeka vamiutra, vegatromea kamba umeutra meli.Vegatreja kwamba gudaha uenda usehemu amahau nemaingi aa Syiti, oi vasimia nanga na vegadurwa umpeo, ¹⁸ Gugaghuwa ino na dhoruba, oi itriku nerosonge mabaharia vandia ujughutra meegho ufuma umeli. ¹⁹ Itriku ra tatu, mabaharia vandia ufunya maje gwa meghono awe aghonjo. ²⁰ Ighondo ne njotra na mweri itrina akaa gwa ighondo riingi, kee dhoruba nenkuu egagughua, na uhuvei kwamba nareguchowa egafwaya. ²¹ Baada oenda gwa ighondo neriifu bila malewa,hafo Paulo waemeka moghatre ama baharia wahanya, "Aghosia, nareeseghetwe moghembe, na nareguseghetwe gutratringuye ufuma Krete, ili uhanga ayai mavee na hasara. ²² Na fanui novafariji mogitie moyo, gwa soko gutrijuhendeka uyaghai udovo moghatre anyu, ila hasara aa meli gutrofo. ²³ Gwa soko utriku narewakea malaika wa Mungu, nechu Mungu usuu nene newakwe, na nechu nomorumba pia -malaika vakwe vegaemeka umpeo ane ²⁴ na vahanya, "Utratreje Paulo. Lazima umekee usonge ama Kaisari, na ravaa, Mungu gwa wema wakwe wagufa antu avai vong'e nevohendie mohenjo navee. ²⁵ Oi, aaghosia, gifii moyo, gwa soko nemohuvie Mungu, kwamba ejuhendeka ginya narenaerwa. ²⁶ Lakini lazima guvare gwa ughuwa ubaadhi avisiwa." ²⁷ Nare waghea itriku rakumi nanne, naregudoriywe kuko na kuko ubahari aa Adratiki, ginya utriku wamanane vii, mabaharia nare vira vaghea ung'ee nenkaku. ²⁸ Vegatrumea milio ufima urifu wa maje navahanga mita thelathini na mofungatre, baada aighondo rikufei vafima kanke vahanga mita ishirina saba. ²⁹ Vegatreja mwandio kwamba gudaha utrua meamba, oi vasimia nanga nne ufuma usehemu ueka nanga na vaomba kwamba diu naejie rui. ³⁰ Mabaharia vasaa nare vofenja namna omereka meli navegasimia umaje boti nenyui nyui yochoa odovoo, na vagihenda kwamba vejughutra nanga ufuma usehemu osonge a boti. ³¹ Lakini Paulo wamwera mosikae usuu waijeshi ra Geroma na asikae avoo, "Motrodaha uchoa ila antu avai vosagha uu meli". ³² Naa mosikae vasaa vatrena kamba ya boti na arekwa ehowe na maje. ³³ Ighondo nare weru wadiu nare gugighea, Paulo wavaseya vong'e agalau velie gunyui. Wahanya, "Eyei ne itriku rakumi nanne moendie bila ulia, motrina lia intu. ³⁴ Oi novaseya mohoe hatra malewa gunyui, gwa soko eyei negwa soko aa odovo wanyu; na gutrii hatra unjee umwedu wa matre anyu nuujuyaghaa. ³⁵ Narewadaha uhanya asaa, wahoa mokate wafunya asii gune Mungu usonge amiho amomontu. Nawaunania mokate wandiolia. ³⁶ Nahafo vatiwa moyo na veso vahoa malewa. ³⁷ Nare guantu 276 mong'e aa meli. ³⁸ Nare valia vaikutra, vegamehenda meli mpofu gwa ujughutra ngano mong'e aa bahari. ³⁹ Nareaghea momwe, vetrina memanyaa ng'ee nenkaku, lakini vaona sehemu aa ng'ee nenkaku neakewa na maje neetrikwetri mahau nemaingi. vagiseya mwese vodaha umeduria meli uenda hafo. ⁴⁰ Oi vailegeza nanga vaireka mong'e aa bahari. Gwa ighondo erero vailegeza kamba na tanga na vahumbua sehemu aa usonge uenda umpefo, oi vaenda usehemu esee aa mahau nemaingi. ⁴¹ Lakini vaja gune njea ivere aa maje yotrana, na meli aenda umahau, Na ile sehemu aa usonge aa meli akwama hafo naitrina daha ufuma, lakini sehemu oo songe andia uneka gwa soko aa ughae wamawimbi. ⁴² Mofango wa asikae nare uvauragha atrungwa, ili kwamba nare gutrii negudaha ufumpa na utroroka. ⁴³ Lakini mosikae waijesi ra Geroma agasegha umuchoa Paulo, oi waemecha mofango wawe; na waagheya avoo nevodaha uoghaa, verime ufuma umeli naveende ung'ee nekaku. ⁴⁴ Nahafo aghosia vauya vejusambeya, vaunya gunto aa mafaja aa mbao na vauya gunto aa mantu mauya ufumaa uu meli. Gwa njea eyei ahendeka kwamba song'e gujughea salama ung'ee nenkaku.