1 Oi, Agripa wamwera Paulo, `Uruhusewe ugitetea. 'Nando Paulo wahumbua moghono wakwe wahanya vii. 2 "Negikengee monya yanja, Motremi Agripa, ili uhenda kesi ane usonge ako reo gunto amasiraka ong'e aa Ayahudi. 3 Ino, gwa soko veve omotaalamu wa mantu ageremi aa Ayahudi na maweyo. Oi nuguseya ughembe gwa ughemei. 4 Trutri, Ayahudi vemenyie ginya nadovie ufuma ubalanda wane uguitaifa rane kuko Yerusalemu. 5 Vemanyie ufuma mwandio na veseghetwe uyanja kwamba nadovie ginya Mafarisayo, idhehebu nerina moemekeo neughae udini awe. 6 Fanui neemekie afai ili nehukumewe gwa soko nene naravie ahadi nechu Mungu wahendie vina va tratra vitru. 7 Eyei ne ahadi nechu makabila itru ikumi va ivere vinamatumaini ufokea mwese vomorumba Mungu gwa inoo utriku na momwe. Ne gwa soko aaitumaini erei, motremi Agripa, vii Ayahudi vositraka. 8 Ne soko montu gekeku moghatre anyu gughema neajabu Mungu guucha antu nevekue? 9 Ighondo remwedu nare naghema uhenda mantu nemaingi gunto aarina rama Yesu wa Nazareti. 10 Negahenda ayai uu Yerusalemu; Negavatrunga anyohuvea vaingi ugigereza,na nare nekwetri nguu ufuma gwa akuu vamakuhani uhenda oi;na ighondo vuuraghwa, negaghua kura gunto awe. 11 Maghondo nemaingi nare novaadhibu umasinagogi ong'e na negasoya uvahenda vehitre uhuvei wawe. Nare ninahasira ino gunto awe na negavajuncha hatra umuji waaghenyi. 12 Ighondo nenare nohenda ayai, negaenda Dameski, nenina nguu na maregheyo ufuma umakuhani neakuu; 13 narenemonjea ighondo ramomwe, Motremi, negaona uweru ufuma ugiunde nareughae ukea yovaa na ugaeria wagufimeya nene na antu nenarevina mohenjo nane. 14 Sese song'e nare gwagwa fang'e, negatregheya ruri neueghetriye nane neyohanya ulugha aa Geebrania: `Sauli! Soko eke ugughasia? Negughamu gune vee ughua isuti mochokoo. 15 Nahafo nahanya, 'Veve weanyu, Bwana?' Bwana wajibu, 'Nene ne Yesu negughasia. 16 Fanui ukaa uemeke gwa meghuu ako;soko gwaikusudi erei nene nagighea gune vee, naguhwania uhendeke motromami na sodanga gunto aa mantu neuyamanyie uhusu nene fanui na mantu nenejuguaghea ighondo nerejie; 17 na nejuguchoa ufuma gwa antu na antu va mataifa nechu nugutroma, 18 urughua miho awe na uvahenya ukitri viende uweru na uhegha unguu yakitri vemosukie Mungu; ili vehange ufokea ufuma gune Mungu mosamaha wa mahutie awe na uridhi nenavafie avoo nene vabaghue gwa uhuvei neugenenee. 19 Oi, motremi Agripa, ntinadaha uasi ndotri yogiunde, 20 lakini, gwa avoo nevo Dameski tranju, na u Yerusalemu na ng'ee ong'e aa Yudea, na gwa antu va mataifa mauya, negatranantia vii vechowe na umosukea Mungu, vehende tendo neistahili toba. 21 Gwa soko esee Ayahudi vegakwatra ugihekalu, vasoya uburagha. 22 Mungu wajareya mpaka fanui, oi nuemeka nausodangea gwa antu va kawaida na gwa avoo nevakuu gunto ayoo nechu aoni na Musa vegahanya ejuhendeka natrimauya; 23 Vii Kristo ujughaseka na ujuhendeka wamwandio uukaa ufuma ugikuya nautranatia weru gwa Ayahudi na antu va mataifa. 24 Paulo nare wadaha ugitretrea, Festo agahanya gwa rorii neukuu, 'Paulo, veve umuharii! masomo ako aguhenda uhendeke umugheu. 25 Lakini Paulo wahanya, Nene ntimogheu, moheshimewa Festo; lakini gwawijaghumbuo nohanya nkhani ya trutri utrofo. 26 Gwa soko motremi umanyie uhusu mantu ayai; na oi, nooghetria gwa ugirekea gune mweso, gwa soko nenauhakika vii gutrii intu gekaku nerefihiwe gune mweso;gwa soko erei retrinahendwa umpeo. 27 Aha, uguhuvea aoni, Motremi Agripa?Nemanyie vii uguvahuvea. ' 28 Agripa wamwera Paulo, 'Gwa ighondo rekufei ugudaha ushawishi nene na untende Mokesu? 29 Paulo wahanya, '''Numuromba Mungu vii, gwa ighondo rekufei au riifu, nti veve gutrufu, ila fong'e nevetregheye afai reo, veve ginya nene, lakini bila menyoo eyei aigereza." 30 Nahafo ndio motremi waemeka, na liwali, na Bernike no, na avoo nareveeghee itrambe remwedu nayo, 31 narevafwaya uguukumbi, vegaeghetria veso gwa veso vahanya, 'Montu uyui atristahili ikuya wala utrungwa.' 32 Agripa wamwera Festo, "Montu uyui jauseghetwe aekwe uhuru mwese jaatrina kata rufani gune Kaisari."