1 Ahendeka kwamba moghatre aa Ikonio kwamba Paulo vina Barnaba vegakea vong'e uu sinagogi ra Ayahudi naughetria ginya mwirundo wa antu Ayahudi na Ayunani ginya vahuvie. 2 Lakini ayahudi nevetrohuvea vegavahongea mahaa vamataifa na uvahenda uhendeka vave gunto anyandughu. 3 Gwa hiyo vegaeghaa kuko gwa ighondo rikuu, neveeghetia gwa udea utreja ukhani wama Bwana, kunu vofunya ughendei uhusu ketri aa neema akwe. Agahenda vii gwa ufunya isara na maajabu ehendwe gwa meghono ama Paulo vina Barnaba. 4 Lakini ieneo rikuu ramuji regaaghanwa: antu vakei nare veeitrambe remwedu na Ayahudi, na vauya itrambe remwedu na metume. 5 Ighondo ramataifa na Ayahudi usoyaa uvashawishi atrongeri vawe uvahendea nemave na uvaghua magwe Paulo na Barnaba, 6 varemanya resee na udua umuji wa Likaonia, Listra na Derbe, na maeneo neezungukie hafo, 7 na kuko vegatranantia ukhani. 8 Na kuko nare guna montu umwedu neweghee, nare atrikwetri nguu umeghuu, gelema ufuma undaa ama yiu akwe, atrinasoya uenenda. 9 Montu usuu agamotregheya Paulo ueghetriye. Paulo agamokazea miho na muona nare uketri uhuvei woforwa. 10 Oi agahanya gune mweso gwa rori neukuu, "Emeka gwa meghuu ako." Namontu usuu agarima gunto na waandia uenenda. 11 Mwirundo nare waona intu newarehendie Paulo, vegahumbua rori yaywe, vahanya uu (lahanja aa Kilionio), "meungu agusimea gwa njea agebinadamu." 12 Vegamwetrana Barnaba "Zeu,"na Paulo "Herme" gwa soko nare monyo hanya nemokuu. 13 Kuhani wa Zeu, nechu ihekalu rakwe nare ronji amoji, agaetra fahari aa ng'ombe na motrongo wamaua mpaka umolango wamuji, mweso na mwirundo vegasegha ufunya sadaka. 14 Lakini metume, Barnaba na Paulo, narevatregheya erei,vegaghafoa masaa awe navenda unji umwirundo, varea 15 na vahanya, "Nyenye antu, nentuni mohenda mantu ayai? Na see no gwa antu ginya nyee. Guvaetrea ghabari nenjija, kwamba mogivetrokeye umantu ayaineetrifaire gune Mungu nemofanga, newaumbie iund, uremi na bahari na mointu nerefo. 16 Gwa ighondo nerakire, agavaruhusu uremi uenenda unjea waywe aghonjo. 17 Ila nkee, atrina fwaya bila sodanga, gwa resee agahenda ija na wavafa mbua ufuma ugiunde na ighondo rovuna, newawaijueya nkoo yanyu gwa malewa na uyanjo" 18 Hatra gwa nkhani iyii, Paulo na Barnaba gwa shida vegaughiya mwirundo ufunya sadaka. 19 Lakini baadhi aa ayahudi ufuma Antiokia na Ikonio vegaja useya mwirundo. Vamughua magwe Paulo na umuutrutra mpaka unji aa moji, nare vira wakuya. 20 Hatra oi anafunzi nare veemekie fife nayo, agaukaa, wakea umujini. Itriku ra pele, agaenda Derbe na Barnaba. 21 Baada ofundisia ukhani umuji uroo nauvahenda anafunzi vaingi, vegasuka Listra, hadi Ikoniamu, na hadi Antiokia. 22 Vegaendelea uemecha nafasi yaanafunzi na uvafa moyo veendelee ugu uhuvei, vahanya, "Lazima gukie uguutremi wa Mungu gwa ukerea maghaseko mangi." 23 Nare vavahwania gwa soko awe anyampaa gwa momwirundoranyohuvea, na neveomba naufunga, vegavaeka gune Bwana, nechu veso vegahuvea. 24 Na vakea uu Pisidia, vaghea Pamfilia. 25 Ighondo nevoeghetia nkhani uu Perga, vegasima uenda uu Atalia. 26 Ufuma kuko veganantea meli hadi Antiokia gune nare vegifunyiye gwa neema aa Mungu gwa soko aa mwemo nechu fanui nare vameghondesia. 27 Nare vaghea kuko Antiokia, na navegagirunda mwirundo wa irambe remwedu, vafunya taarifa aa mantu ne Mungu wahenda gune veso, na ginya varoghwerwe molango wa uhuvei gwa antu va Mataifa. 28 Vegaeghaa gwa muda mwifu na anafunzi.