Usambi 5
1
Nuvasiya anyampaa niviitambi rimwe nanyee, nene, nini munyampaamuyawe na sudanga wa makhasio ama Kristo, na ni arii itambi rimwedu ugu weeru niujodwira.
2
Uu, nuvafa nguu nyenye ni mu anyampaa, dimi idae ra Mungu niriitambi rimwe nanyee. Riravi, tigwasoko musighite, nyeso gwasoko musighite uyi, ugikhua na Mungu. Riravi ti gwa usigha hela ya minyaa, nyeso gwa uyanja.
3
Mutagitende muakuu gwaantu nimuvaraviee, nyeso tendeki mwi ndolio ugidae.
4
Hafo mudimi nimukuu niwadwira mujofewa soghweda aweeru utuyaghaya uja wayo.
5
Nanyee, no abalanda ginyumpi u gwa akuu vanyu. Nyenye nyong`e uyai mwinyumpi na ugitendea mantu nimaja nyenye gwa nyenye, gweso Mungu uguvaimia anya mughari, nyeso uguvafa neema anyoginyumpia.
6
Uginyumpia fang`i a mukhono wa Mungu niwina udaho avahumbue gwa ikhondo rakwe.
7
Mwikiyi migho anyu gunto akwe, gwasoko umujali.
8
Tendeki mwi anya mahaa, tendeki muanyo rava. Uyoo murughu wanyu, ibilisi, ginya ng`imba niukhoma iugunia, iufenja muntu imukhafue.
9
Imiki hiya ayo tendeki mwina nguu ugihuvia ranyu ese mumanyie auna vanyu niviuguurimi viukiria makhasyo gina ayai.
10
Baada a ukhasywa gwa ikhondo rikii, Mungu wa neema yong`e niwamwiitanie ukiria uja wa khae na khae mukhati ama Kristo, uguvatenda mukhondekie, ugumuimarisia na umufa nguu.
11
Utemi utendeke gini mweso khae na khae. Amina.
12
Nimusamini Silwano ginya munyandughu niatina ng`ondo, na numuhadia nyee gwa ukufi ukiria guni mweso. Niumutria moyo na uvashuhudia iroo ni na muihadiee ni neema a tutri a Mungu. Imiki mukhati akwe.
13
Anyohuvia ni viu Babeli, nivahwaniywe itambi rimwe na nyee, viumuramucha, na Marko mwanane, ugumuramucha.
14
Ramuchi mumuntu gwa ugitomia gwa uyanjo wa Mungu. Na majighana itendeke gini nyee ni mumukhati ama Kristo.