¹ Abafarisayo n'Abasadukayo baija bamulenga. Bamugambira k'abholeka akabhonero ka Katonda. ² Yesu abahorora ati, “Obhwo litobera mugira muti, ‘Omucho gurashemera obhwo eiguru lyatukura. ³ Kandi bwancha muti, ‘Obhwire nibwija kuchurumbana, kuba eiguru lyatukura mara lyatinisa.’ Nimumanya kuleba eiguru mukabaasha omukyo, kyonkai timulikumanya kuleba okwo obukiro obu bwemire. ⁴ Oruzaro rubhi ogu ogutaina bhwesigwa nigwenda kubhona akabhonero. Chonka timulikwija kukolerwa kabhonero; aka Yona niko, nikamara.” Aho abarugaho ayegenderabwe. ⁵ Abegesibwa kababaire bagobire buseli, bashanga okwo bayebwa kwijaho n'omukate. ⁶ Yesu abagambira ati, “Muramanya, mara mwekenge eitumbyo ly'Abafarisayo n'Abasadukayo.” ⁷ Echigambo echo bakifumoraho bonene bonka bati, “Titwaleta mukate.” ⁸ Yesu akasangwa namanya okwo bataleta mukate abhagambira ati, “Imwe bantu abaina okwesiga kuke, kubaki nimugamba okwo mutaina mukate? ⁹ Timwina chomwaihiremu? Timulikwijuka mikate etanu eyaliisize abantu 5,000 n'entukuru ezo mwashombokize? ¹⁰ Anga emikate mushanju eyaliisize abantu 4,000, n'entukuru ezo mwashombokize? ¹¹ Mwabulirwaki kumanya okwo naba ntalikugamba mukate? Mwekenge eitumbyo ly'Abafarisayo n'Abasadukayo.” ¹² Nibhwo bashobokeirwe okwo atabagambiire itumbyo lya mukate, akabha abatatiire aha myegesheze y'Abhafarisayo n'Abasadukayo. ¹³ Obhwo Yesu yagobire omu wilaya ya Kaisaria Filipi, abaza abegesibwabe ati, “Abantu nibagamba bhati, Omwana w'Omuntu n'ohai?” ¹⁴ Abegesibwa bamuhorora bhati, “Abhantu abandi nibagamba bati oli Yohana Omubhatiza, abandi bati oli Eliya, abandi bati oli Yeremia anga omoiho omu barangi.” ¹⁵ Yesu ababaza ati, “Isi inywe nimugamba muti nyawe ndi ohi?” ¹⁶ Simoni Petero ahorora ati, “N'iwe Kirisito Omwana wa Katonda Asingire” ¹⁷ Aho Yesu amuhorora ati, “Oli muberwa, Simoni eya Yona! Eki tiwachisurulirwa muntu wena wena, sana wakishurulirwa Tata asingiire omw'iguru. ¹⁸ Mara nkugambire, oli Petero, mara aha rwazi oru nditekaho enteko yange, kandi n'amani ga rufu tigalijisinga. ¹⁹ Ndakuha enfunguruzo z'obukama bw'omw'iguru. Ech'olikakoma omu nsi kirakakomwaga n'omw'iguru; ech'olikakomorora omu omu nsi kirakakomororwaga omw'iguru.” ²⁰ Amara abegesibwabe abatanga muno kugambira omuntu okwo ali Kirisito. ²¹ Kwema aho Yesu abanza kumanyisa abegesibwabe okwo alikuragirwa kuja Yerusalemu, abhagurusi n'abakuhani bakuru n'abegesa b'Amateka kumushasa nibamutura ebintu bingi, basubhe bhamwite, chonka aha chiro cha kasatu ahimbuke. ²² Petero yamuta aha rubhaju yabhanza kumurwanisa ati, “Mukama wange, Katonda, nichkabure! Echi ahali iwe tichilikwija kubha.” ²³ chonka Yesu ahinduka agambira Petero ati, “Ondugeho iwe Sitani! Iwe wayenda kuntanga, aha bhw'okubha emitekelereze yawe ti ya Katonda, mitekelereze y'abhantu.” ²⁴ Nikwo Yesu kugambira abegesibwabe ati, “K'omuntu yakwenda kumpondera ayeyange, ashuture omusarabagwe ampondere. ²⁵ Aligonza kuhungya oburorabwe bulimufera, kandi alyanga oburorabwe aha bwange ogwo alibwihura. ²⁶ Kuba omuntu nagasirwaki kulya ensi yona chonka kandi akaferwa oburorabwe? Anga omuntu aligiraki kuchungura oburorabwe? ²⁷ Manyasi Omwana w'Omuntu alija n'abamalaikabe omu kitinwa nk'echa Ise, arongore bhuli omo aha rw'ebhyo yakozire. ²⁸ Nimbagambira amazima, haliho abemeleire hanu aha abatalifa n'akake bataboine Mwana w'Omuntu naija ali Mukama.”