¹ Nyawe Paulo, owu Katonda yayenzire kamba ntumwa ya Yesu Kirisito, hamo na Timotheo murumuna weitu, nitubahandichira imwe abhe'kanisa ya Katonda eya Korinto, hamo n'abhakirisito bha Akaya yona: ² Katonda Tataitwe n'OMukama Yesu Kirisito bhabhajilire echisha bhabhahe n'emilembe. ³ Asingizibhwe Katonda kandi Ise OMukama weitu Yesu Kirisito, Iseichwe omuganyizi kandi omujuni omuli bhyona. ⁴ N'iwe atuhumuliza omu naku zona, tubone kuhumuliza abheine enaku zona zona, tubhahumulize nk'okwo itwe twenene Katonda atuhumuliza. ⁵ Nk'okwo tukusasa muno na Kirisito, nikwo tukumara marwa na Kirisito wenene. ⁶ Katukubhona enaku, nituzibhona kamubhona kumaramarwa n'okurokoka. Katukumaramarwa, nitumaramarwa kamumaramarwa, nk'okwo mukwebhonera obhwo mukusasa nimwegumisiliza nk'okwo itwe twenene tukusasa. ⁷ Itwe twine esubhi egumire. Aha bhwokubha nitumanya okwo obhwo mukusasa naitwe, nikwo mulimaramarwa hamo naitwe. ⁸ Bharumuna bhange, nitwenda kubhamanyisa enaku ezo twabhoine Asia. Tukabhona enaku ezita kugambwa, twayejuma n'omwoyo. ⁹ Tukehulira oti bhaturamwire kufs; chonka enaku ezo zikabha zili z'okutwegesa tutesiga mani geitu, sana kwesiga Katonda ahimbura abhafu. ¹⁰ Akaturokora aha n'orufu; kandi aliturokora; twin esubhi omuli wenene okwo alisuba akaturokore. ¹¹ Na imwe nimuragirwa kutujunisa ensara nibhwo Katonda arahulira ensara zitali zike ezo mukutusabhira kumusiimira omugisha ogwo tukutungwa; omu kututunga atyo nabha nahorora ensara zingi. ¹² Nitwebhuga tuti: Omu mitima yeitu okwo obhurora bhwaitu omu nsi omu, okukiraho omuli imwe, bhubhaire bhuli bhurora obhwo twatungirwe Katonda omu mani g'echisache, gatali mani ga bhumanyi bhwa bhantu. ¹³ Nitubahandikira ebhyo murasobhora kusoma mukasobhokerwa. ¹⁴ Ninsubhira murasobokerwa bhurungi,14 nk'okwu mwasobhokeirweho kake, mwije mutwebhuge nk'okwu itwe twakwebhuga imwe aha chiro ch'Omukama waitu Yesu. ¹⁵ Echi mbeire ninchimanyage, niyo nsonga mbeire ninyenda kubandiza owanyu kamusemelerwa kusagaho. ¹⁶ Mbaire ninyenda kubhagobhaho obhwo nkuja Masedonia, nkasubha nkagaruka okw obhwo nkurugayo, mukasubha mukambonera ebhy'okugenda nabhyo Bhuyahudi. ¹⁷ Isi obhwo nabheire nintekeleza nti nkabha nimpindukana? Nintegeka nk'omuntu wensi, kugamba “Ego” na “Chehi” omu kanya kamo? ¹⁸ Obhuso bhwa Katonda omunyamazima, tukabha tutakuhindukana omu bhyo twabhagambiire. ¹⁹ Yesu Kirisito Omwana wa Katonda, owu Silivano na Timotheo nanyawe twabharangiire akabha atalikuhinduka aha rulimi. 20 Bhuli kanya akabha nagamba echili ch'amazima. ²⁰ Nobhona bhyona ebhyo Katonda yarageine, wenene n'iwe abhigobesheleza. Niyo nsonga omu busobhora bwa wenene nitusobhora kugamba tuti, “Amina” kuhaisiliza Katonda. ²¹ chonka Katonda n'iwe akutugumisa na imwe omuli Kirisito: Akatukora amajuta, ²² yatutaho omuhurigwe, yatuha Mwoyo, n'iwe mukwato omu mitima yeitu. ²³ Ninjuliza Katonda, n'iwe akumanya omutima gwange! Okuteija Korinto nkagendelera kubhaganyira imwe. ²⁴ Titulikubhakaka kamwesiga; nitumanya okwu mugumire omu kwesiga. Echiliho nituchwazikana na imwe kubhaha ebhyera, kubha omu kwesiga kwanyu mugumire.