1 Pawandanye wowo Yesu afuma mung'anda aya kumbali yakwe sumbi, aya ayikala pansi awasambilizya. 2 Akuwungana Iwumba kulu kwe weliwe achaleka ayinjila muwato ayikala mwenemo, Iwumba lyonsi alimilila pachituntu. 3 Awavwanjila Ivintu vivule mumilumbe. akuti, lolani umuntu wumwi wayile mukutanda. 4 Ala vino akutanda Imbeyu muchalo chimwi Iponela mumbali ya nzila, Inyunyi azia azisompa. 5 Yimwi Iponela pemfuzi, pano patalinji umusili wuvule. napapo-napapo Imbuyu Iti nukumela, amuno pansi patalinji umusili wuvule. 6 Alila Ilanzi lyakwela alyocha Imbeyu, ngamuno Imisisi Itinjizile pansi Imbeyu Ikala. 7 Imbeyu yimwi Iponela, Imyunga Ikula Ifina. 8 Ukuwa Imbeyu yimwi Iponela pamuvundo, Icha nu kucha yimwi umwanda, yimwi amakumi mutanda, na yinji amakumi yatatu. 9 Nga Yesu alechelezya na mazwi yakuti, yivwani, nd'achino muli na makutwi. 10 Nga pano awasambilizi awaya kwe Yesuawamuwuzya awati, nga muno chani chino ukumila Imilumbe pano nkuwanena?'' 11 Yesu awatolelela ati, chapwa kwakwe mwemwe ukumanya Ivifisame vya wufumu wamwiyulu, ukuwa weni chitapwa, 12 Amuno wensi wino ali nachimwi aliyonjelezya, alyakuti ayize awe nivivule; ukuwa wino asi nachimwi, nakano avinakonye kalipokwa kwakwe weliwe. 13 Muno achonye-choo achino nkuwumila Imilumbe; wakalola ukuwa awalanga wakalola Ichitumbula mpanzi, wakakwivwa. ukuwa wasikwivwichisya nanti akwiluka. 14 Achaleka kwakwe woliwo uwutumwa wakwe Ayizeya wafiswa wuno wati, ukwivwa kweni mulilanga mukwivwa. ukuwa nanti, mwiluke; muliwalola ukuwa Ichitumbula mpanzi chitupu. 15 Amuno awantunye waa wasi namano. na amakutwi yawo yafundika na aminso yawomye yaziwata. amuno pamwi nche. aminso yawo yangalola namakutwi yawo yakwivwa. nukwiluka wakwiluka, nga wapetuchile kwe nene, avino Leza wataka wati, ngapano mbapozye.' 16 Ukuwamwenji mwewalongo wuli! aminso yinu yakalola namakutwi yunu yakakwivwa. 17 Yizukanji choo! awatumwa wavulenye na wantu wavule awakwe Leza walondesyanga nkaninye ukulola vino mwemwe mukulola, ukuwa watatela wavilole, swinya walondesyanga ukwivya vino mukwivwa ukuwa watatela wivwa. 18 Ale teyelezyani chino amulumbe wakwe katanda wukusula. 19 Wonsi wano wakula wivwa amazwi ya mfumu nanti kwiluka wakolana ni mbeyu yino yaponezile mumbali yanzila, umuwipe akwizanga sompola amazwi yano yatadwa mwakwe weliwo. 20 Imbeyu yino yaponezile pakwe mfunzi awali wano wakapochelela Leza amazwi ni chimwemwe napapo-napaponye pano wivwa. 21 Ukuwa nanti kuwa nimisisi mwekwe weliwo, swinya nanti kulandalila, ukuwa ayala amatamyo nu wuyimvi vyokatuka muno amazwinye yayo, awalechelezya nanti kuzimba. 22 Imbeyu yino yaponezile mumyunga awali wano wakula ndiwivwa amazwi, ukusaya pampindinye yoyo nukukundisya Insawo akufina amazwi, awikala nanti kucha. 23 Nimbeyu yino yatanzilwe mumuvundo awali wano wakula wivwa amazwi awiluka; awacha nukucha, wamwi umwanda, wamwi amakumi mutanda, wamwi amakumi yatatu.'' 24 Yesu anyoka awumila umulumbe wunji ati, ufumu wa mwiyulu wakolana numuntu wino watanzile imbeyu nzima muchalo chakwe. 25 Awalanga pano awantu waponechezile uwusiku umulwani aya atanda kalolo munkumba, apita. 26 Yalanga pano Imbeyu yakula yafumya Imitwe, Inswaswa azimela. 27 Awawonvi wamweni awaya kweyisikulu awamunena awati, Tatakulu, watanzile Imbeyu Inzima muchalo chako; nga Inswaswa zyamela wuli? 28 Atolelela ati, amulwani wumwi ayizile wachita chonye-choo. awawuzya Isikulu awati, wuzye ukasi ukuti tukupile Inswaswa?" 29 Akana ati, awe. amuno mungala pano mukwipila Inswaswa munyunkulile apaliponga ninkumba. 30 Lekani Inkumba ninswaswa vikulile apaliponga yasuke yawe amasika. ngapano njize nene wakasinza Inti. pakutalika mutele munyukule Inswaswa muzinyepe mumyanzi muzisumbile mumulilo; ngapano ngapano musinze Inkumba mulonge munkoma yane.'' 31 Yesu anyoka awumila umulumbe wunji ati, uwufumu wamwiyulu wakolana ni mbeyu yamuti.yino umuntu akutanda muchalo chakwe. 32 ayili mbeyu yino yachepesya yalusya Imbeyu zyonsi, ukuwa Ikula Ilisya Imiti yonsi. achiwa achimuti chikulu, ninyunyi aziya azizenga Ivinsalanzo munsamba zyakwe wliwo.'' 33 Swinyanye Yesu awumila umulumbe unji ati, uwufumu wa mwiyulu wakolana numutawa. umwanachi akasenda umutawa awuvundunkania nu wusu wamumpakwilo, awusuka umunya wonsi awutuntumika. 34 Yesu wanenanga amawumba yawantu Ivintumye vyoo mumilumbe; atawanenanga Ichintu chimwi nanti kuma umulumbe. 35 Wachitanga wonye-woo alyakuti chifiswe chino chavwanzilwe numutumwa ukuti, pano nkuwanena mumilumbne ndiwawanena ivintu vino vitamanyikwa ukufumilila kuluwandi iwansi.'' 36 Nga Yesu asya amawumba ayinjila mung'anda awasambilizi wakwe awaya kweweliwe awamunena awati, tunene chino umulumbe wanswaswa ukusula. 37 Yesu awalolechela ati, umuntu wino watanzile 'nzima a mwanamuntu; 38 Ichalo ansi; Imbeyu nzima awantu wamu wafumu nazyo Inswaswa awantu wawipe awa muwip; 39 Nawe umulwani wino watanzile Inswaswa we satana. nako ukusinza ayili nsilo ya mpindi, nawo wakasinsa awangeli. 40 Achaleka ndivino Inswaswa zikakonganikwa azyachwa mumululo, avino, chiliwa pansilo yampindinye yoyo; 41 Umwanamuntu alituma awangeliwakwe wize wakonganike muwufumu wakwe wonsi wano wakawembusya awantu wakwe, wawunganike nawawembu wanji wonsi, 42 Wize wasumbilwe mwilungu lyamulilo, wize walila nukulumania amino. 43 Ngapana awantu wakwe Leza wize wawale ndi wino Ilanzi mu wufumu wamonsi wawo. achaleka fwendi ndimuli na. 44 Uwufumu wa mwiyulu wakolana ninsawo mfisame muchalo. achaleka walile umuntu wayizana, ayifisa. Ichimwemwe achimulema aya asumba vyonsi vino walinji navyo, anyochela aya akala Ichola. 45 Swinyanye uwufumu wamwiyulu wakolana nukakala wino wavwambanga uwukasi wawuzi wukulu. 46 Ala wazana wuno wuyine nkani aya asumba vyonsi vino walinji navyo, anyochela aya akala Ichakulo. 47 Swinya uwufumu wa mwiyulu wakolana nikonde lino lyasumbizilwe mwesumbi, Ikonde linolikalema Iswi zyamisango-misango. 48 alila lizula awalondo awalikwemela kuchituntu, awikala pansi awankana Inswi. 49 Avino chiliwa kunsilo yampindinye yoyo; awangeli waliya monsi-monsi wawunganike awawembu wawafumye muwawembu wawafumye muwalungamane, 50 Wize wawasambile mwilungu lya mulilo. kuliwa Inkuta nukulumania amino. 51 Yesu awuzya ati, wuzye mwiluka vyonsinye vyoo?nawo awatolelela awati, eta twiluka. 52 Achaleka awatolelela ati, choo chikusula ukuti umusambilizya wisundo wensi wino wiza wawa amusambilizi wa mu wufumu wa mwiyulu wakolana nu mweni ng'anda wino akufumyanga Iwintu vipya nivikali munkoma yakwe. 53 Walile pano Yesu wamala ukuvwanga Imiumbe yoo, afuma kweneko. 54 Anyochela kukaya kakumwawo, aya awasambilizya mung'anda yawo Iyakupepela, nawonsi wano wamunenanga awazunguka wakuti, nga amanonye yaa wayafumwa kwi? awawuzya awati, nga Ivizungusyo vyoo vyeni avizungusyo chi? 55 Wuzye asi amwanakwe kawaza wa miti? wuzye asi amwanakwe Maliya, swinya wuzye asi amunyina Jemusi, nu jozefu, nu Simoni, nu Yuda? 56 Wuzye Inkazi zyakwe zyonsi zisi kwikala monye-moo? nga fwendi wafumya vyonsi vyoo kwi?". 57 Achaleka awamukana. Yesu awanena ati, umutumwa akachindikwa konsinye suka ndi amukaya kapamwawo namuwantu wachiwanza chakwe. 58 Atachisile Ivyakuzungusya vivule kweneko amuno watalinji ni suwilo.