¹ Baada ya amang'ana gayo, Paulo nasoka Athene nagenda Korintho. ² Eyo namubhona Myahudi nabhilikirwa Akwila mwibhurwa wa Ponto, omwene na mukaye nabhilikirwa Prisila bhejire okusoka eyo Italiakwokub ha Klaudia aragiriye abhayahudi bhone bhasoke Roma; Paulo nagenda owabho; ³ Paulo nekala na nakora nabho emilimu kwani umwene kakora emilimu jinu ejisusana ne jebhwe. abhene bhaliga nibharisha amahema. ⁴ Paulo nasimula nabho ku sinagogi bhuli siku yo obhwoyo. Aliwashawishi Abhayahudi amwi na Abhagiliki. ⁵ Lakini Sila na Timotheo bhejire okusoka Makedonia, Paulo asukumirwe no omoyo okubhabhwira abhayahudi kutya Yesu niwe Kristo. ⁶ Kumwanya gunu abhayahudi bharemere okumwikilisisha no okumujera, kutyo Paulo nakukumura ingubho yaye imbele yebhwe, no okubhabhwila "Amanyinga gemwe gabhe inguru ye mitwe jemwe abhene; Anye nitana ekosa. Okusoka oryanu no okugenderera, enibhagendera abhana bhyaro." ⁷ Kutyo nasoka arya nagenda kunyumba ya Tito Yusto, omunu unu karamilisha Nyamuwanga. Inyumba yaye ibheye ayeyi na lisinagogi. ⁸ Krispo, omutangasha wa lisinagogi amwi na abhanu bha inyumba yaye bhanu abhamwikilisha Omukama. Abhanu abhafu bha Korinto bhanu bhamunguye Paulo akaika na bhekilisishe no okubhatijwa. ⁹ Omukama namubhwila Paulo mungeta kwa injira ye echiroto, "usige kubhaya, lakini yaika usige okujibhila." ¹⁰ Kwani anye nibheye amwi nawe, atario unu kaja okusaka okukunyamura, maana nili na abhanu abhafu mumusi gunu." ¹¹ Paulo ekaye eyo kwa mwanya gwa mwaka gumwi na mesi sitaneigisha ling'ana rya Nyamuwanga amwi na abhandi. ¹² Lakini Galio akorerwe omutugi wa Akaya, abhayahudi bhemereguyu amwi na ekinyume na Paulo no okumusira imbere ye ekitebhe cha obhuramusi, ¹³ Bahaikire, "Omunu hunu kubhajimya abhanu bhamwisasame Nyamuwanga kinyume cha indagano." ¹⁴ Omwanya gunu Paulo endere kwaika, Gailo nabhwira abhayahudi, "Emwe bhayahudi, rabha chakabheye ni kikayo, au bhubhibhi, yakabheye halali okubhashughulikia. ¹⁵ Lakini kwokubha ni maswali, ganu agahusu amang'ana na amasina, jindagano jemwe, basi muramure emwe abhene. Anye nitakutamani okubha muramusi wa misango ja amang'ana gayo." ¹⁶ Galio nabhasega bhasoke imbele ye ekitebhe cha indamuro, ¹⁷ Kutyo holi bhamugwata Sosthene, omutangasha wa lisinagogi, mbamubhuma imbele ye ekitebhe cha indamuro. ¹⁸ Paulo baada yo okwikara arya kwa mwanya murela, abhasigire abhayiri nagenda ku meli Siria amwi na Prisila na Akwila. Kabla yo okusoka bandarini, amwegere jifwiri jaye kwani aliga atuyeo inadhiri. ¹⁹ Bhejire bhakinga Efeso, Paulo abhasigire Prisila na Akwila arya, lakini omwene nengira mwisinagogi naika na abhayahudi. ²⁰ Bhamubhwiriye Paulo ekare nabho kwa mwanya murera, omwene aremere. ²¹ Lakini asokere kubhene, nabhabhwira, "Enisubha tene kwemwe, ikabha obhuremeresi bhwa Nyamuwanga." Baada ya gayo nasokao kwa imeli okusoka Efeso. ²² Paulo ejire akinga Kaisaria, arinyire okugenda okukesha likanisa rya Yerusalemu, kisha neka nagenda kwi kanisa rya Antiokia. ²³ Baada yo okwikara kwa mwanya arya, Paulo asokereo okutura kumaeneo ga Garatia na Frigia eyo nabhaturamo omwoyo abheigisibhwa bhone. ²⁴ Myahudi umwi kabhilikirwa Apollo, mwibhurwa wa Alexandria, Ejire Efeso. Aliga no obhufasaha ku kwaika na hodari ku meigisho. ²⁵ Apollo aliga eresibhwe ameigisho go omukama kwa ijinsi kutyo ariga ali na ibidii ku mwoyo, aikire no okwiigisha kwo obhusahihi amang'ana ganu agamuhusu Yesu, ila amenyere obhubhatijo bhwa Yohana. ²⁶ Apollo ambile okwaika kwo obhujasiri kwi hekalu lakini Prisila na Akwila bhejire bhamungwa, bhakoerere obhusani nage na mbamubhwira iguru ya jinjira ja Nyamuwanga kwo obhujomu. ²⁷ Ejire atamani okusokao okugenda Akaya, abhayiri bhamutuyemo omwoyo no okubhandikira ibarua abheigisibhwa bhanu bhali Akaya ili bhabhone okumuramira. Ejire akinga, kwa ekigongo bhamusakiye sana bharya bhekirisishe. ²⁸ Kwa amang'ana gaye no obhwenge, Apollo abhakirire abhayahudi kubhweru neresha okutura kumaandiko go kubha Yesu niwe Kristo.