¹ Irmáns, se algúns de vós é descuberto facendo o que non debe, vós que sodes espirituais restaurádeo con dozura. Coidándote de non acabar caendo ti no mesmo. ² Axudádevos mutuamente cos vosos problemas imitando así o exemplo de Xesús Cristo. ³ Porque se alguén cre ser máis do que é, autoengánase. ⁴ Cada un que reflexione sobre as súas propias obras, e daquela terá motivo de estar satisfeito de si mesmo sen mirar aos outros. ⁵ Porque cada un levará cadansúa carga. ⁶ A quen se lle ensine sobre a palabra, que comparta toda cousa boa con quen lle ensina. ⁷ Que non vos enganen. De Deus non vos podedes burlar, aquilo que sementedes, iso mesmo recolleredes. ⁸ Porque o que sementa para a súa propia carne, recollerá destrución. E o que sementa agradando ao seu espírito, do Espírito vida eterna recollerá. ⁹ Non nos fartemos de facer o ben, porque ao seu debido tempo segaremos. ¹⁰ Porén, non perdamos a oportunidade de facer ben a todos, especialmente á familia da fe. ¹¹ Ollade as grandes letras que vos escribo da miña man. ¹² Todos os que queren quedar ben na carne, fórzanvos a que vos circuncidedes co fin de non ser perseguidos pola causa da cruz de Cristo. ¹³ Porque nen aínda eles cumpren a lei, pero queren gabarse da vosa propia circuncisión. ¹⁴ Pero que non veña eu gabarme en cousa algunha agás na cruz de Cristo, para a cal eu fun crucificado para o mundo e o mundo para min. ¹⁵ Porque de pouco vale circuncidarse ou non, senón ser unha nova creación. ¹⁶ E os que vivan segundo esta norma, graza e paz a eles e ao Israel de Deus ¹⁷ De aquí en diante que ninguén me veña amolar, pois eu xa levo as marcas de Cristo. ¹⁸ Que a graza do noso Señor Xesús Cristo estea co voso espírito irmáns, amén