¹ Mna weye walonga yadya yakuligana na sigilizi za chindedi. ² Wadalahaha watende na chiasi, ntunyo, fanyanyi , utondowazi wedi mwe ungi, na mwe ujijimizi. ³ Iviya iviya wavyele wadalahale vywaungwa kale na kale welavize wowo wenye saviya wenye kwetunya naho wasekutesa, vyaungwa wasekutenda wasigilwa wa mpombe. ⁴ Waungwa wahinye yeli matana chani kuwamalanya vigoli mwe ntunyo kuwaunga wagosi wawo na wana wawo. ⁵ Waungwa kuhinya kutenda na ntunyo, watana, wakulela watana wa nyumba zawo na wakuzumila wagosi wawo wenye, waungwa kufanyanya mbuli zino chani kugamba ulosi wedi wa Chohile usekuhulutwa. ⁶ Mwe inamna iyo iyo wajeleni muye wambwanga watende na ntunyo. ⁷ Mwa sila zose mwemalanye wenye kutenda mligano wa ndima yedi naho mkahinya lagisa umanyi na ntunyo. ⁸ Longani ulosi wenye umanyi naho hewine lema chani kugamba yoyose akutowa ajelwe soni kwaviya hana lema dihiye dya kulonga mlanga mwetu. ⁹ Wasigilwa nawawzumile Mazumbe wawo mwe chila chintu , waungwa kuwelela naho siyo kuhigana nawo. ¹⁰ Hawakugwa kubawa, mna waungwa welagise utondowazi wose mtana chani kugamba mwe sila zose wayalembe mahinyo yetu kumlanga Chohile mwambula ywetu. ¹¹ Mwe viya wedi wa Chohile uonekana mwa wantu wose. ¹² Yachihinya kulemela mbuli hezikuwagila za chichohile na tama ze isi, yachihinya kwikala mwe utunyi, mwe kuwagila, na mwe sila za chichohile mwe ichipindi chino. ¹³ Ichipindi chagoja kuhokela msuhi wetu wenye jimbiko, usinyo wa ukuka wa Chohile ywetu mkulu na mgombezi ywetu Yesu Kulisito. ¹⁴ Yesu nakelavyanya mwenye kwachausa chetu chani kuchambula kulawa mwe wavu na kuchitenda watana kwachausa chakwe, wantu wakuwagila wenye nkwina ya kudamanya ndima yetu. ¹⁵ Yesu na kuvikiliza mbuli zino kwamila kwa udahi wose usekunga mntu yoyose akubele.