¹ Paolo msigilwa ywa Chohile na mndima ywa Yesu Kulisito. Mwo utondowazi wo ujima uwo Chohile na fanyanyi za chindedi zikuleta usagulo. ² Weyaho mo msuhi wo ujima wa kale na kale uwo wa Chohile hekudaha kulonga lulimi alagane nkongo kale na kale. ³ Mwe chipindi mwivano nakagubula ulosi wakwe mwe mbuli aninkile miye kulonga nainunga kudamanya vino mwe isigilizi ya Chohile mombola ywetu. ⁴ Mwa Tito mwana ywa chindedi mwo utondowazi wetu wedi , mbazi na utondowazi kulawa mwa Chohile mkombola ywetu. ⁵ Kweivyo nasikwasa Krete kugamba udamanye izimbuli zose nazendile hezinati kuchinta nakwika wadalahale wa vikilo mwe chila mzi saviya ivyo husigile. ⁶ Wadalaha we divikilo vyaungwa wasekutenda na laho mgosi ywa mvyele yumwenga, anawana wachindedi hewena ukuzi wihiye naho wetegeleze. ⁷ Vyaungwa mwe chilongozi saviya akuchimaila mwe nyumba ya Chohile asekutenda na laho, asekutenda mntu wa ulwasu naho hekwekoma vyaunga asekutenda mguhi wa maya asekutenda mkozi, asekutenda msongaganyi wa nkumbizi naho asekutenda na tama. ⁸ Akajika atenda na chisekwesekwe akunga wedi vyaungwa atende mntu mwenye ubala uchintile, akuwagilwa, akumvikila Chohile, akwemanya yeye mwenye. ⁹ Akudaha kuchimaila mahinyo ya chindedi yahinyigwe chani adahe kuwajela muye mwe mahinyo yedi naho adahe kuwagolola wose wakumhiga. ¹⁰ Mwe viya kuna ubanasi ulozize vitendese wadya wakuvinila ulosi wawo ni wa uhezi wadanta na kuwalongoza wantu mwe kuwaza. ¹¹ Naho vyaungwa kuwachinda wantu saviya awo wakuhinya ydya heyekungwa mwe ulongozi wa soni na kubalanga nkolo zose. ¹² Yumwenga ywawo, mntu anaumanyi nakagamba Wakrete wana udanti hewena uhelo wehiye na wanyama wakutisa, wabwa na wakudyadya. ¹³ Uno ulosi ni wachindedi ivyo uwachinde mo udahi chani kugamba wadahe kulonga mwe chindedi mo utondowazi. ¹⁴ Weye usekweingiza mo lugano helwina chindedi cha chiyahudi hegu naho sigilizi za wantu awo wavuza kunyuma ichindedi. ¹⁵ Mwe wose watendile watana vintu vyose ni vitana mna mwa wose watendile wavu, nahewekuzumila hahana chitendile chitana mwe viya ufanyanyi wawo na ungi wawo ubalangwa. ¹⁶ Wazumila kummanya Chohile mna mwe izintendwa zawo wamlemela, wowo ni wavu naho hawakuzumila hawaonekane mwe ntendwa zozose zedi.