¹ Uno ni ugubulo wa Yesu Kulisito ambawo Chohile kamwinka chani kuwalagisa wandima wakwe mbuli ambazo zaungwa zilaile hajihi nakadamanya yamanyike kwa kumtuma mndima ywakwe kwa wandima wa Yohana. ² Yohana kalavya ukuzi wa chila chintu icho awone chikuligana na ulosi wa Chohile na kwa ukuzi ulangwe kulanga Yesu Kulisito. ³ Ajimbikwe uyo akusoma kwa izwi kwa wadya wose wakwiva milosi ya wawoni na kuizumila icho chidolonywe umo, kwaviya chipindi chisogela. ⁴ Yohana kwa mavikilo mfungate yeyuko Asiya, utana wikale kwenyu na utondowazi kulawa eyeho na akunga atende eyaho, na akunga eze, na kulawa kwa myuye mfungate ikale kulongozi kwe chiti chakwe cha ukulu ⁵ na kulawa kwa Yesu Kulisito ambaye mukuzi mchindedi, mwelekwa ywa nkongo ywa wabanike, na chilongozi wa Maseuta we isi ino, kwauyo akuchunga naho kachilekeila kulawa mwe masa yetu kwa sakame yakwe, ⁶ Kachidamanya kutenda Useuta wa walavyantambiko wa Chohile na tati yakwe, kwakwe kutende Ukuka na nguvu kale na kale Taile. ⁷ Sinyani nezza na maingu chila ziso nadiniwone, hamwenga na wose wamokile, na kabila zose ze isi nawahongeze kwakwe nivyo, Taile. ⁸ Miye ni Alufa na Omega alonga Zumbe Chohile, yeye eyeho, na akunga atende eyaho, na ambaye eza mwenye kwa nguvu. ⁹ Miye Yohana mlukolo wenyu, na yumwenga akwambizana hamwenga na nyuwe mwe masulumizo na Useuta na ujijimizi uchintile wili mwa Yesu, nendile ni mwe chisiwa chikwitangwa Patimo kwachausa cha ulosi wa Chohile na ukuzi kulanga Yesu. ¹⁰ Nendile ni mwe muye mwe dizuwa dya Zumbe, nasiva kunyuma kwangu izi dya kulanga ege dya talumbeta. ¹¹ Dikalonga dolonya kwe chitabu ayo ukuwona, na kuyatuma kwa mavikilo mfungate, kwita Efeso kwita Smilina, kwita Peligamo, kwita, Thiatila, kwita Salidi, kwitaPhiladeiphiia, na kwita Laodikiya. ¹² Niyo ahituka kukaula ni izwi dya yuhi nendile akalonga na miye, naho nize nihituke siona chinala cha zahabu cha taa mfungate. ¹³ Hagati gati he chinala che izita na hana yumwenga ege Mwana ywa Mntu kavala nkazu ntali ibwile he iviga vyakwe na na mkanda wa zahabu uzunguluke ichifuwa chakwe. ¹⁴ Umtwi wakwe na fili zakwe nazikala zing'aile ege sufi ing'aile ege seluji, na ameso yakwe yekala saviya miyanga ya moto. ¹⁵ Izinyayo zakwe nendile ni saviya shaba ikale ikunulwa vidala, ege shaba ambayo iheza kujiswa mwe moto, na izwi dyakwe dikala saviya izwi dya mazi yalozize yakuyolozeka kwa chidogo. ¹⁶ Nakekala katozeleza ntondo mfungate mo mkono wakwe wa kulume, na kulawa mo mkono wakwe nendile mna sime nkali yenye makali kwidi, uso wakwe nednile ukang'ala saviya mwanga mkali wa zuwa. ¹⁷ Nize nimuwone niyo nagwa mwe viga vyakwe saviya mntu abanike, niyo aika umkono wakwe wa kulume mlanga mwangu akagamba, usekogoha ni miye wa nkongo na wa udumo, ¹⁸ naho hwikala nendile sibanika mna kaula, nekala kale na kale naho ninanazo funguwo za file na za bome hedine uhelo. ¹⁹ Ivyo yadolonye ayo uwone, yeyaho haluse na yadya yakunga yalaile bada ya yano. ²⁰ Kwaviya iyo ifisigwe kulanga ntondo mfungate izo uwone niyo mkono wangu wa kulume na chiya ichinala cha zahabu cha ta mfungate, ntondo mfungate, ni wandima wa yadya mavikilo mfungate, na chinala cha ta mfungate ni yadya mavikilo mfungate.