¹ Mna chipindi cha zuwa dya kuhumula dize disile Mliyamu Magidalena na nine dya Yakobo na Salome waguha mavuta matana chani wadahe kwiza kuhaka mavuta umwili wa Yesu kwachausa cha mazishi. ² Mtondo wedi suwadya nkongo dya juma waita kwembila mwe dizuwa ditontomoke. ³ Wadolonya wenye kwa wenye n yani nachitongele zeze idiyuwe kwachausa suwe chani chingile mwe mbila ? ⁴ Mna eze wasinye wamuwona mntu kaheza kuditongolosa idiyuwe ambadyo nandile ni kulu mno. ⁵ Wengile mwe mbila wamuwona mbwanga kavala guwo zing'aile kekala ntendele ya kulume niyo wehewa. ⁶ Awagamba msekogoha mwamlonda Yesu wa Nazaleti asulumizwe kauyuka hahali hano kayla ahantu hadya nandile wamwikiye. ⁷ Hitani mkawagambile wanampina wakwe na Petulo kugamba, alongola kwita Galilaya uko namumwone saviya awagambile. ⁸ Wahalawa na kuguluka kulawa he mbila wasela naho wehelwa hawalongile dyodyose kwa mntu yoyose kwaviya wogoha vidala. ⁹ mwe dizuwa dya nkongo dya juma eze auyuke kamlaila nkongo Maliyamu Magidalena ambaye kulawa kwakwe kamlavya majini mfungate. ¹⁰ Kahalawa na kuwagamba wadya ambawo nendile wehamwenga naye chipindi nandile wanachihovu na kulawa mesozi. ¹¹ Weva kugamba ni mjima naho kawonekana naye mna hawamzumile. ¹² Bada ya ivyo kelaviza kwa namna ntuhu kwa wantu watuhu waidi umom nandile wakatalamka kulawa mwe isi. ¹³ Waita wakuwagambila wanampina watuhu wasigale mna hawamzumile. ¹⁴ Yesu badaye niyo elavyanya kwadya mlongo umwenga na yumwenga nandile wegamila mwe meza awakwahila kwa kutokuzumila kwakwo na udala we myuye yawo. ¹⁵ Awagamba hitani mo ulangazi wose naho mlonge ulosi kwe vumbe vyose. ¹⁶ Yoyose akunga wazumile na kuwambula na ambulwe na yudya hekunga kuwazumila nakantilwe. ¹⁷ Sinyiisa baluwa za kale hazina Marko 16 ; 9 - 20 mpintuko zino nazitimilane na wose wakuzumila , kwazina dyangu nawalavye majini nawalonge kwa luga mpya. ¹⁸ Nawatoze nyoka kwa mikono yawo hata wanabywa chintu chochose chihiye hachiwalumize nawaike mikono kwa wanyonje nawo nawapate ujima. ¹⁹ Niyo Zumbe Yesu eze alonge nawo niyo enulwa kulanga kwembingu niyo ekala mkono wa kulume wa Chohile. ²⁰ Wanampina wahalawa na kulonga chila hantu umo Zumbe akadamanya ndima nawo na kulavyanya msuhi kwa mpintuko na chilagiso chikutimilana nawo.