¹ Mtondo wedi wakulu wa ntambiko wadugana hamwenga na wadolonyi ne dibalaza jima dya wadalahala niyo wamtaliza Yesu amwigala kwa Pilato, Pilato niyo awauza wi Zumbe dya Wayahudi? ² Kamhitula, weye walonga ivyo. ³ Wakulu wa ntambiko wamgambila malaho yalozize mwa Yesu. ⁴ Pilato amuza naho, hukuhitula chochose hukuwona ivyo wakukulaha kwa mbuli zilozize. ⁵ Mna Yesu hamhitule Pilato imwe hela. ⁶ Mwe mazwela chipindi cha siku nkulu afungwilwa mtalizwa yumwenga , mtalizwa wamungile. ⁷ Nandile kuna wabanasi mwe dijeleza wakomile, mgati mwa waasiye wakutmikya ubansi wawo, na eyumo mntu yumwenga akwitangwa Balaba. ⁸ Bunga diza kwa Pilato kumunga adamanye enga ivyo atendile uko kunyuma. ⁹ Pilato awahitula na kuwagamba, mwaunga niwafunguileni Zumbe wa Wayahudi? ¹⁰ Kwaviya kamanya ni kwachausa cha chinyulu cha wakulu wantambiko wamgwila Yesu niyo wamleta kwakwe. ¹¹ Mna wakulu wantambiko wachongeza idibunga kutula ulwasu kwa kuguta kugamba, afungulwe Balaba badala yakwe. ¹² Pilato ahitula naho nakuwagamba, nimtende mbwani naho Zumbe dya Wayahudi? ¹³ Watula ulwasu naho msulumize. ¹⁴ Pilato awagamba kadamanya mbuli yani ihiye mna wahikiliza kutowa ulwasu mno na mno msulumize. ¹⁵ Pilato aunga alizishe idibunga kamfugwila Balaba, kamtowa Yesu nkome niyo amlavya chani asulumize. ¹⁶ Wankondo niyo wamlongoza kubula mo uwa udya wi mndani mwe nkambi naho wachisanyane hamwenga chikosi cha wankondo. ¹⁷ Wamvika Yesu nkazu ya langi ya zambalau niyo waluka chilemba cha miwa niyo wamvika. ¹⁸ Wakonga kumbela na kumgamba ndamsa Zumbe ywa Wayahudi. ¹⁹ Wamtowa mo mtwi kwa wazi na kumtwela mate wamfikila madi kulondozi kwekwe kwa kumtunya. ²⁰ Niyo wakaheza kumbela wa vula idya inkazu ye langi ya zambalau na kumvika izisuche zakwe niyo wamlavya kuse kwita kumsulumiza. ²¹ Wamchichisa mjinka sila amwambize nendile akwingila mo mzi kulawa kwe nkonde akwitangwa Simoni Mkilene tati yakwe dya Isikanda na Lufo wamchichisa kwinula umsalaba wa Yesu. ²² Wankondo wamwigala Yesu hantu hakwitangwa Goligota, imana yakwe hantu he gobela dya mtwi. ²³ Wamwinka mpombe ihanganywe hamwenga na mane mane mna hainywele. ²⁴ Wamsulumiza na kusangilana izisuche zakwe wazitoila kula kunga chipande akunga apate chila mnkondo. ²⁵ Yapata saa ntatu mtondo aho wamsulumize. ²⁶ Waika mlanga mwakwe lubawo ludolonywe laho, Zumbe ywa Wayahudi. ²⁷ Wamsulumiza hamwenga na wankondo waidi uyu mwenga tendele yake ya kulume na umtuhu ntendele yakwe ya kumoso. ²⁸ Na madolonyo yachinta yalongigwe. ²⁹ Wadya nandile wakajinka wamhuluta wasingisa imitwi yawo, wakagamba, ni weye ukunga uvune idivikilo na kudizenga kwa mazuwa matatu. ³⁰ Kwe ambule weye mwenye naho usele hasi kulawa mo msalaba. ³¹ Kwa iviya, iviya wakulu wa ntambiko wambela wakalosana hamwenga na wadolonyi na kugamba, kambula watuhu mna hakudaha kwe ambula mwenye. ³² Kulisito Zumbe ywa Izulaeli sela hasi haluse kulawa mo msalaba chani chidahe kukuwona chikuzumile na wadya wasulumizwe hamwenga naye nawo wambela. ³³ Eze ibule saa chenda chiza niyo cheza mlanga mwe isi yose kubula saa chenda. ³⁴ Mwe zhipindi cha saa chenda Yesu katula ulwasu kwa nguto nklulu Eloi, Eloi lamasabakasani ikatenda vino Chohile wamiye Chohile ywa miye kwambwani kunasa? ³⁵ Mna mwa awo wendile wachimale eze weve wagamba, kaula, amwitanga Eliya. ³⁶ Mntu yumwenga kaguluka kamemeza siki mwe siponji na kuika mlanga mwe mti, na mwazi niyo amwinka chani anywe mntu yumwenga agamba, goja chiwone hegu Eliya eza kumseleza hasi. ³⁷ Niyo Yesu aila kwa ngunto nkulu niyo abanika. ³⁸ Paziya dye ndivikilo niyo dyapangana vihande vidi kulawa kulanga kubula hasi. ³⁹ Mkulu yumwenga nednile kachimala kumsinya Yesu eze awone kabanika kwe inamna idya agamba chindedi yuno mntu nendile ni Wana ywa Chohile. ⁴⁰ Nahana wavyele nandile wakasinyiza kwa hale umo mwawo na eyeho Maliyamu magidalena, Maliyamu nine dya Yakobo mvunawe dya Yose na Salome. ⁴¹ Mwe chipindi wandile Galilaya wamtongela na kumsankanila na wavyele watuhu walozize nawo watongelana naye kubula Yelusalemu. ⁴² Eze chibule chisingi kwaviya ni mawandaliyo ya zuwa kubula zuwa, dya kuhmula. ⁴³ Yusufu wa Alimasaya keza ahadya nandile ni Zumbe wa balaza akutunywa mntu akusinyisa uzumbe wa Chohile kwa ukankalu kaita kwa Pilato na kumlombeza umwili wa Yesu. ⁴⁴ Pilato niyo kehelwa kugamba, Yesu kabanika kale amwitanga yudya mlulu amuza hegu Yesu kabanika. ⁴⁵ Eze awone ni chindedi kwa mkulu kugamba, kabanika, kamlekeila Yusufu kuguha umwili. ⁴⁶ Yusufy nendile kagula sanda, kamseleza kulawa mo msalaba, kamtaliza kwa sanda niyo niyo amwika mndani mwe mbila isimbigwe mwe luwe, niyo atongolosa yuwe mo mlango we mbila. ⁴⁷ Maliyamu Madidalena na Maliyamu nine dya yose waona ahantu azikigwe Yesu.