¹ Mvuku vuku vidala zuwa dya nkongo dya juma naweza mwe mbila nawaleta manukato ayo wendile wayafunganya. ² Niyo wabwila yuwe difingiliswa hale ne mbila. ³ Niyo wengila mndani mna hawaumbwile umwili wa Zumbe Yesu. ⁴ Nailaila kugamba ichipindi wehelwa vikulanga dino aho wantu waidi nawachimala mgati mwawo wavaile suche zing'aile. ⁵ Wavyele wakatenda wamemwa ni woga naho wakafunama nyuso zawo hasi wawagamba wavyele ni mbwani mwamlonda emjima mgati mwa wabanike? ⁶ Hahali hano mna kauyuka, kumbukani ivyo alongile na nyuwe umo nendile neyuko uko Galilaya. ⁷ Kagamba kugamba Mwana ywa Adamu aungigwa alavywe mwe mikono ya wantu wenye masa, naho nasulumizwe na zuwa dya katatu nauyuke naho. ⁸ Wadya wavyele niyo wakumbuka ulosi wakwe, ⁹ niyo wauya kulawa mwe mbila na kuwagambila mbuli izo zose wadya mlongo na yumwenga na watuhu wose. ¹⁰ Niyo Maliamu Magidalena, Joana, Maliya nine dya Yakobo na wavyele watuhu hamwenga nawo walavya imbuli ino mwa wasigilwa. ¹¹ Mna ulosi uno uwonekana saviya utani du mwa wasigilwa naho hawawazumile wadya wavyele. ¹² Mna Petulo niyo enuka niyo aguluka kubula kwembila niyo asungila na kusinya mndani awona sanda ichedu, Petulo akajika ahalawa kwita kukaya kwakwe, akehelwa ni chintu chani chilaile. ¹³ Naho kaula waidi mgati mwawo nendile wakaita zuwa idyo idyo mwe chijiji chimwenga chikwitangwa Emau, icho nendile maili milongo mtandatu kulawa Yelusalemu. ¹⁴ Niyo walafya wowow kwa wowo vikulanga mbuli zose zilaile. ¹⁵ Niyo yalaila kugamba, ichipindi nendile wakalafya na kuzana Yesu niyo asogela haguhi alongozana nawo. ¹⁶ Mna meso yawo naya chindwa mwe kumbunkula yeye. ¹⁷ Yesu niyo awagambila, ni mbwani yuwe waidi mwachisimwila kuno mwajenda? Niyo wachimala ahdya wakawonekana wajela mbazi. ¹⁸ Yumwenga ywawo zina dyakwe Cleopa niyo ahitula vino weye wi mntu ichedu hano Yelusalemu uyo hamanyize mbuli zilaile uko mazuwa yano? ¹⁹ Yesu niy awagambila mbuli zani? Wamhitula mbuli zikulanga Yesu Mnazaleti yuo nendile muoni mdahi mwe ntendwa, na ulosi kulongozi kwa Chohile na wantu wose. ²⁰ Naho mwe ivyo wakulu wa walavyantambiko na vilongozi wetu ivyo wamlavize kukantilwa file na kusulumizwa. ²¹ Mna nachina msuhi kugamba, yeye nuyo nawaike hempeho Izulaeli naho hale na yano yose, haluse ni zuwa dya katatu umo mbuli zino zilaile. ²² Mna naho watuhu wa wavyele kulawa mwe bunga dyetu nawachehela eze waite uko kwembila chilo chilo na mavukuvuku. ²³ Weze wauwese umwili wakwe niyo weza wakagamba kugamba nawaona naho mpituko ya mndima ywa kwembingu walongile kugamba ni mjima. ²⁴ Awatuhu wa wagosi awo nendile hamwenga na suwe na waita kwembila na kubwila ni saviya wavyele walongile mna hawamuone yeye. ²⁵ Yesu niyo awagamba, nyuwe wantu wahezi naho wenye myuye izamile ya kuzumila yose endile waoni walonga. ²⁶ Vino hayungigwe Yesu kusulumizwa mwe mbuli zino na kwingila mo Ukuka wakwe? ²⁷ Akajika kuongela mwa Musa na waoni wose Yesu kuwagambila mbuli zikumlanga yeye mwa amadolonyo yose. ²⁸ Weze watende haguhi ne chiya ichijiji uko nendile wakaita Yesu niyo adamanya saviya kugamba, ajendeleza kulongozi. ²⁹ Mna wamkinkisa wakagamba, Ikala hamwenga na suwe kwaviya yajendeleza nechisingi na zuwa diswa ivyo Yesu niyo engila kwwitwkwikala nawo. ³⁰ Nailaila kugamba, ichipindi kekela nawo na kudya nakaguha bofulo ajimbika na kubesula niyo awenka. ³¹ Niyo ameso yawo yagubulwa wammanya niyo ahalawa aho mwa meso yawo. ³² Niyo walosana wowo kwa wowo vino ni myuye yetu hsisangale mndani mwetu ichipindi eze alonge naswi mweisila ichipindi achigubwile mawandiko? ³³ Niyo wenuka isa iyoyiyo nakuya Yelusalemu niyo wawabwila wadya mlongo na umwe wachintana hamwenga na wadya wendile hawenanawo. ³⁴ Niyo wagamba, Zumbe kauyuka chindedi chindedi na kamlaila Simoni. ³⁵ Ivyo niyo wawgambila, mbuli zilaile mwe sila na ivyo Yesu awabunkuile wawo mwe kuubesula idibofulo. ³⁶ Ichipindi wakalonga izimbuli izoYesu mwenya kachimala mgati mwawo na kuwagambila utondowazi utende mwenyu. ³⁷ Mna nawogoh na kumemwa ni woga, nawakafanyanya kugamba, nawaona muye. ³⁸ Yesu niyo awagambila ni mbwani mnankama? nimbwani monga muze yakwinukila mwe myuye yenyu? ³⁹ Kaulani imikono yangu ne iviga vyangu kugamba ni miye mwenye nidontani na muone mwe viya muye hauna nyama na vuha enga ivyo mkuniona miye, kutenda navyo. ⁴⁰ Eze alonge vino niyo awalagisa imikono yakwe ne viga vyakwe. ⁴¹ Weze watende wachei kwelelwa, kuhanganyike na kutokuzumila na kwelelwa, Yesu niyo awagamba vino mna chintu chochose cha kudya? ⁴² Niyo wamwinka chihande cha samaki yokigwe. ⁴³ Yesu niyo achiguha na kuchidya kulongozi kwawo. ⁴⁴ Niyo awagamba umo nendile nanywi nasiwagambila kugamba yose yadolonywe mwe sigilizi ya Musa na waoni na zabuli vyaungwa yachinte. ⁴⁵ Niyo agubula umanyi wawo kugamba wadahe kumanya amadolonyo. ⁴⁶ Niyo awagambila kugam,ba, idolonywa Kulisito Yaungwa asulumizwe, na kuuyuka naho kulawa kwa wabanike zuwa dya katatu. ⁴⁷ Naho weile na kulekeilwa wavu yaungwa ilongwe mwe zina dyakwe mwe izisi zose kukongela kulaila Yelusalemu. ⁴⁸ Nyuwe wi waukuzi mwe mbuli zino. ⁴⁹ Kaula nawegaila sigilizi ya Tate ywangu, ekulanga kwenyu mna gojani hano he chijiji kubula namvikwe nguvu kulawa kulanga. ⁵⁰ Niyo nYesu awalongoza kuse, kubula weze watende haguhi Besaniya niyo enula imikono kulanga niyo awajimbika. ⁵¹ Niyo yalaila kugamba, ichipindi akatenda awajimbika nakawasa niyo enulwa kulanga kujendeleza ko ulanga. ⁵² Elo wamvikila na kuya Yelusalemu na kwelelwa kukulu. ⁵³ Wajendeleza kwikala mwe nyumba nkulu ya kuvikila wakamjimbika Chohile.