¹ Chitala chose niyo chachimala, chamwigala Yesu kulongozi kwa Pilato. ² Wakonga kumlonga vihiye wakagamba chimbwila mntu yuno akaidanta isi yetu mwa kuwalemeza wazekulavya kodi kwa Kaisali naho akagamba yeye mwenye nuyo Kulisito, Mseuta. ³ Pilato niyo amuza akagamba vino weye ni Mseuta wa Wayahudi?Nho Yesu ahitula akagamba weye walonga ivyo. ⁴ Pilato niyo amgamba mlavyantambiko mkulu ne chitala Sikuwona wavu wo mntu yuno. ⁵ Mna wowo walahiliza wakagamba katenda akawasongaganya wantu akahinya mwe uyahudi wose kukongela Galilaya na haluse ehano. ⁶ Pilato eze eve vino niyo auza saviya mntu uyo ni wa Galilaya? ⁷ Eze abunkule kugamba nendile ehasi he udahi wa Helode niyo wamwigala Yesu kwa Helode endile naye Yelusalemu mwa mazuwa ayo. ⁸ Helode eze amuwone Yesu nakelelwa vitendese mwe viya nakaunga kumuona mwe mazuwa yalozize nakeva izimbuli zakwe na kunga kumwona imwenga ya mpituko ikadamanywa ni yeye. ⁹ Helode kamuza Yesu mwe ulosi ulozize mna Yesu hamhitule chochose. ¹⁰ Walavyantambiko wakulu hamwenga na wakudolonya nawachimala kwa mpula wakamlaha. ¹¹ Helode hamwenga na wankondo wakwe wamhuluta na kumbela na kumvala suche ntana akajika amvuza Yesu mwa Pilato. ¹² Helode na Pilato watenda wambuya zuwa idyo ukaleka aho nawendile wankondo. ¹³ Pilato niyo awetanga hamwenga walavyantambiko wakulu na wakulu na bunga dya wantu. ¹⁴ Niyo awagambila mniletela mntu yuno saviya mntu akulongoza wantu wadamanya yehiye na kaula eza kuzwa simlaha kulongozi kwenyu sione wihi mo mntu yuno ikulanga mbuli yoyose ambayo nyuwe mwamlaha yeye. ¹⁵ Bule hegu Helode kwaviya kamvuza mwetu naho kaula hahna chochose adamanye chikunga nkanto ya file. ¹⁶ Mwe ivyo elo nanimkantile na kumlekeila. ¹⁷ Haluse Pilato ongigwa amlekele mfungwa yumwanga wa chiyahudi mwe zuwa kulu. ¹⁸ Mna wose niyo watula ulwasu hamwenga wakagamba, mlavye uyo naho chifunguile Balaba. ¹⁹ Balaba nendile ni mntu uyo aikigwe mwe digeleza kwaviya na ni mbanasi fulani mo mzi na kwakukoma. ²⁰ Pilato niyo agamba, naho akaunga kumlekeila Yesu . ²¹ Mna wowo watula ulwasu msulumize , msulumize . ²² Niyo awauza mwe nkanana ya katatu nimbwani yuno mntu kadamanya wavu wani? Sipatile masa yakunga nkato ya file mwakwe mwe ivyo aho nanibinde kumkantila nanimlekeile. ²³ Mna wavilikiza kwa izwi dya kulanga wakaunga asulumizwe na maizwi yawo niyo yamhembeleza Pilato. ²⁴ Ivyo Pilato kamkantila na kuwenka ivyo wakunga. ²⁵ Niyo amlekeila yudya wamungile uyo akantilwa mwe digeleza mwe kuhosa usongaganyi ngavu ngavu na kukoma, mna niyo amlavya Yseu mwe viya wakunga wowo. ²⁶ Umo wakamwigala nawambwila mntu yumwenga akwitangwa simoni Ukilene akalaila mwe isi niyo wamtwisa umsalaba chani awinule akamtongela Yesu. ²⁷ Bunga kulu dya wantu na wavyele awo nawafambazi na kulombeza mwe vikulanga weye nendile wakamtongela. ²⁸ Mna niyo awhitula Yesu niyo awgambila vigoli wa Yelusalemu msekunilila miye mna mwe ilile nyuwe na vikulanga wana wenyu. ²⁹ Kaula mazuwa yeza ayo nawalonge wajimbikwe hewekweleka na nda hezikwelekwa na matombo ayo heyekonkeza. ³⁰ Naho nawakonge kugambila lugulu chigweleni na vigulu mchigubike. ³¹ Kwaviya saviya wakudamanya mbuli zino uneva mti mbisi naitende zeze unatenda unyala? ³² Wagosi watuhu wavu waidi nawegalwa hamwenga naye chani wakomwe. ³³ Weze wabule hantu hakwitangwa Gobela dya mtwi nivyo wamsulumiza hamwenga na wadya awavu yumwenga ntendele ya kulume no mtuhu ntendele ya kumoso. ³⁴ Yesu nakagamba tate uwalekeile kwaviya hawamanyize icho wakudamanya niyo watowa usagulo kusangilana izisuche zakwe. ³⁵ Wantu nendile wachimala wakasinya kuno vilongozi wakambela wakagamba kawambula watuhu eambule mwenye hegu yeye ni Kulisito ywa Chohile msagulwa. ³⁶ Wankondo nawo nawambela wamsogeila yeye na kumwinka divai igwaduke. ³⁷ Wakagamba, Hegu weye wi Mseuta ywa Chiyahudi kweambule mwenye. ³⁸ Nendile naho na ulahi mlanga mwakwe udolonywe, YUNO NUYO MSEUTA YWA CHIYAHUDI. ³⁹ Yumwenga ywa wabanasi asulumizwe nakamhozola akagamba, Weye si weye Kulisito?Kweambule mwenye na suwe. ⁴⁰ Mna yudya umtuhu ahitula akamkwahila na kugamba vino weye hukumogola Chohile weye umwe makanto ayo ayo? ⁴¹ Suwe chihano mwe kuwagila kwaviya suwe chohokela chiya chikuwagila mwe madamanyo yetu mna mntu yuno hadamanye chochose chihiye. ⁴² Niyo ajendeleza Yesu unikumbuke umo ukengila mo Useuta wako. ⁴³ Yesu amgambila Taile nakugambila dyelo dino nautende hamwenga na miye hahoile. ⁴⁴ Aho nandile haguhi na sa mtandatu chiza nachimlanga mwe isi yose kubula sa chenda . ⁴⁵ Ulangazi we dizuwa na ugubika niyo idipaziya dya nyumba nkulu dya Chohile niyo dyapangana hagati gati kukongela kulanga. ⁴⁶ Akaila mwe izwi kulu Yesu nakalonga Tate mwe mikono yako naika umuye wangu niyo eze alonge yano abanika. ⁴⁷ Aho akuda eze awone yadamanyike nakamtunya Chohile akagamba, chindedi yuno nendile mntu awagile. ⁴⁸ Ichipindi bunga dya wantu wezile hamwenga ukuukula weze waone mbuli zidamanyike nawauya kuno wakatowa ivifuwa vyawo. ⁴⁹ Mna wambuya zakwe, na wavyele wamtongele kulawa Galilaya nawachimala kwa hale wakasinya izo izimbuli. ⁵⁰ Kaula na hana mntu akwitangwa Yusufu nendile ni yumwenga wa chitala mntu mtana na mwenye kuwagila. ⁵¹ Nendile hawagilwe na makanto hegu madamanyo yawo kaula Alimasaya umzi wa Chiyahudi awo nendile ukagoja Useuta wa Chohile. ⁵² Mntu yuno nakamsogila Pilato akalombeza enkigwe umwili wa Yesu. ⁵³ Nakamseleza niyo auzingiliza sanga na kumwika mwe mbila nendile isongolwe mwe yuwe ambadyo hahana awahiye kuhambwa. ⁵⁴ Nendile ni zuwa dya kufunganya na kuhumula dihaguhi. ⁵⁵ Wavyele ezile nawo kulawa Galilaya nawamtongela niyo waona na ivyo umwili wakwe ivyo ugonezwe. ⁵⁶ Nawauya na kukonga kufanyanya manukato na malashi akajika zuwa dya kuhumula na wahumula kwaviya vikulanga sigilizi.