¹ Mlavyantambiko mkulu mbuli zino ni za chindedi? ² Sitefano nagamba, walukolo na watate wangu, netegelezani miye Chohile ywa ukuka nakamlaila tati ywetu Abulahamu ichipindi nendile Mesopotania Henati kwikala halani, ³ Niyo amgambila, halawe mwe isi yako naho wambuya zako naho mwite mwe isi hunga hulagise. ⁴ Niyo ahalawa mwe isi yo Ukaidayo akekala halani kulawa aho niyo tati yakwe abanika Chohile niyo amleta mwe isi ino wakwikala vino haluse. ⁵ Hamwinkile chochose saviya ulisiwakwe. Nahehena hantu hata hekwika viga. Mna Abulahamu agambilangwa hatahenati kupata mwana kugamba nenkigwe isi itende yakwe no ulweleko lwakwe. ⁶ Chohile nakaolnga naye vino, vya kugamba ulweleko lwakwe nalwikale mwe isi ya ujeni. Niyo aho kugamba wakaya wa uko nawatende kugamba wandima wawo na kuwadamanya vihiye mwe imihilimo magana mnane. ⁷ Naho Chohile niyo alonga naiakantile isi ambayo iwatendani mateka. naho badala ya aho nawalawe chani wanivikle mwe hantu hano ⁸ Naho amwinka abulahamu lagano dya kujelwa ngasu ivyo Abulahamu niyo tati yakwe Isaka amjela ngasu, mazuwa mnane atenda tati yakwe Yakobo. Niyo Yakobo atenda tate ywa wadalahala wetu mlongo na waidi ⁹ Baba zetu wamuonela finju Yusufu niyo wamtaga mwe isi ys Misili. Mna Chohile nehamwenga naye. ¹⁰ Niyo amkombola mwe usulumizo wakwe. Niyo amwinka ujimbiko na umanyi mwa Falao zumbe ywa Misili. Falao amtenda zumbe we Misili na mwe inyumba yakwe yose. ¹¹ Niyo kwatenda na sala nkulu na masulumizo yajenyele mwe isi ya Misili na Kanani na watate wetu hawapatile nkande. ¹² Mna Yakobo eze eve kuna mpamba Misili niyo awasigila tate zetu aho henkongo. ¹³ Mwe intambo ya kaidi Yusufu kelaviza mwa walukolo wakwe. Ulukolo lwa Yusufu niyo lwamanyika mwa Falao. ¹⁴ Yusufu niyo awasigila walukolo wakwe kwita kumgambila Yakobo tati yawo eze Misili hamwnga na wambuya zakwe hamwenga na wantu wose milongo mfungate na washano. ¹⁵ Ivyo Yakobo asela Misili niyo abanika yeye hamwenga na watati zetu. ¹⁶ Niyo waguhigwa kubula Shekemu niyo wahambwa mwe mbila iyo Abulahamu agulaga mwe chiasi cha hele kulawa mwe welekwa wa Hamoli uko Shekemu. ¹⁷ Ichipindi cha idya indagano endaga Chohile amlagise Abulahamu eze abule, wantu wakatenda wajenyela uko Misili. ¹⁸ Ichipindi icho nakachimala Zumbe mtuhu mwe isi ya Misili, Zumbe hemmanyize kugamba ni Yusufu. ¹⁹ Uyo zumbe mtuhu niyo awdanta wantu wetu na kuwadamanyiza yehiye tati zetu na kuwadula wana wawo chani waekwikala. ²⁰ Mwe ichipindi chiya Musa nakelekwa nendile ni mtana mwa Chohile niyo alelwa miezi mitatu mwe nyumba ya tati yakwe. ²¹ Chipindi aduligwe, chigoli ywa falao niyo amguha chani amlele saviya mwanawe. ²² Musa nakahinywa mahinyo yose ya Chimisili nendile ana udahi mwe ulosi na kudamanya ²³ Mna eze abule mihilimo milongo mine,niyo ezelwa mo umuye wakwe kuwakaula walukolo wakwe wana wa Izulaeli. ²⁴ Eze awone Mwizulaeli akadamanywa vihiye, Musa amgombela na kumvuziza nkumbizi nandile akamsulumiza na kumtoa Mmisili. ²⁵ Akafanyanya kugamba walukolo wakwe wamanya kugamba Chohile nawakombole mo mkono wakwe mna hawamanyize. ²⁶ Zuwa ditongele aita mwe wantu wa Waizulaeli endile wakatowana eza kumlamwila agamba, wagosi nyuwe mwi walukolo ni mbwani mkudamanyizana vihiye wenye kwa wenye? ²⁷ Mna yudya abalange mnyawe niyo amsindika hale na kumgamba ni yuhi kakutenda zumbe na makanto yetu? ²⁸ Weye wonga unikome saviya ukomile Mmisili gulo? ²⁹ Musa aguluka eze eve ivyo, atenda mjeni mwe isi ya Midiani aho atenda tate ywa wana waidi. ³⁰ Niyo mihilimo milongo mine kujinka mndima ywa kwembingu amlaila mwe jangwa dyo mlima wa Sinai mwe mwali wa moto mndani mwa kasaka. ³¹ Ichipindi Musa eze awone moto, nakehelwa na kwehelwa chiya achiwone. niyomajeza kusogela chani asinye izwi dya Zumbe dyamwizila dikagamba, ³² Miye ni Chohile ywa watati zako, Chohile ywa Abulahamu na ywa Isaka na ywa YakoboMusa niyo azingiza naho haungile kusinya. ³³ Zumbe niyo amgambila vula ivilatu vyako hano uchimale ni hantu hakukile. ³⁴ Siona masulumizo ya wantu wangu weyuko Misili ziva kucheha kwawo miye sisela chani niwakombole haluse so nahusigile weye Misili. ³⁵ Yuno Musa yudya wamlemele chipindi walongile ni yani kautenda mseuta na mliganyi ywetu? endile nuyo uyo Chohile kamsigila atende mseuta na mgombela. Chohile nakamsigila kwe mkono wa mndima wa kwembingui nakamlaila Musa mwe kasaka. ³⁶ Musa nakawalongoza kalawa Misili bada ya kudamanya vilagiso na mpintuko mwe Imisili na mwe bahali ya Shamu, na mwe luwala mwe chipindi mihilimo mnane. ³⁷ Ni Musa yuno awagambile wantu wa Izulaeli kugamba Chohile nawenuileni muoni kulawa mwe walukolo wenyu, muoni saviya miye. ³⁸ Yuno ni mntu endile mwe chigwena mwe bunga na mndima ywa kwembingu, yudya alongile naye mo mlima wa Sinai yuno nuyo mntu endile na watati zetu. Yuno ni mntu nendile na watati zetu yuno ni mntu nendile na kahokela ulosi wimeso na kuchinka suwe ³⁹ Yuno ni mntu endile tati zetu nawekala kumwetegeleza nawamsindikila hale na mwe imuye yawo nawahitukila Misili. ⁴⁰ Mwe ichipindi icho nawamgambila Haluni chidamanyize wachihile wakunga wachilongoze kulawa mwe isi ya Misili hachimanyize chipatile. ⁴¹ Ivyo niyo wadamanya mwe mazuwa ayo nawakalavya lavyo kweiyo isanamu niyo welelwa kwaviya yendima ye imikono yawo ⁴² Mna Chohile nakawahitula nakuwenka wavike ntindo ya kulanga. Saviya idolonywe mwe chitabu cha waoni togola mnilaviza miye lavyo dya wanyama muwachinjize mo luwala mwe imihilimo milongo mine inyumba ya izulaeli? ⁴³ Mdizumila idivulu dyo mdugano dya Moleki ne intondo ya Chohile refani, ne picha mdamanye na kiuvikila wowo nawo naniwegale hale kujinka Babeli. ⁴⁴ Watate zetu nawana vulu dya kuduganila dya ukuzi mo luwala. Saviya Chohile eze awalonge eze alonge na Musa, kugamba nachidamanye mwe mligano wa udya awone. ⁴⁵ Dino ni vulu ambadyo tate wetu mwe ichipindi chawo nawaletwa mwe isi na Joshua. Inalaia ichipindi wazengile niyo wavika mwe isi ambayo nakawagulusa hewenati uwiyano wa matete wetu ino ni kugamba vino kubula mazuwa ya Daudi. ⁴⁶ Uyo apatile chibali mwa meso mwa Chohile niyo alombeza kulonda wikazi mwa Chohile ywa Yakobo. ⁴⁷ Mna Selemani nakamzengela nyumba Chohile. ⁴⁸ Mna hata ivyo Eli kulanga hakwikala mwe nyumba zizengigwe na mikono ino ni saviya uwoni ivyo alongile. ⁴⁹ Ulanga ni chigoda changu cho Uzumbe ne isi ni hantu hakwikiya viga vyanguNyumba ivivihi mkunga mkanizengele, alonga Zumbe hegu naho ni hahi hantu hangu hakuhumula? ⁵⁰ Suwo umkono wangu udamanye vintu vino vyose? ⁵¹ Nyuwe wantu mkutenda na singo ndala hemjeligwe ngasu imuye na magutwi chila chipindi mwahiga Muye Ukukila, mwadamanya saviya tati zenyu wadamanye. ⁵² Ni uwoni wani mwe wawoni endile tati zenyu hawakumsulumiza? Nawawakoma wawoni wose walaile hewinati wizilo wa yumwenga mta uwagila, na haluse mtenda wasulumizi na wakomi wakwe naho. ⁵³ Nyuwe wantu mhokela lagizo diya disigilwe ni wandima wa kwembingu mna hamditozize. ⁵⁴ Akajika wazumbe we chitala weze weve mbuli zino niyo wokwa mwe myuye yawo, wakengila maya na kusigina meno Stefano. ⁵⁵ Mna yeye akatenda kamema Muye Ukukile, asinya ulanga kwa vitendese niyo awona ukuka wa Chohile na kumuwona Yesu kachimala umkono wa kulume wa Chohile. ⁵⁶ Sitefano alonga kaula siwona ulanga ufunguka no umwana wa Adamu kachimala umkono wa kulume lwa Chohile. ⁵⁷ Mna wazumbe we chitala niyo watula ulwasu, kwa izwi dya kulanga, wagubika amagutwi yawo wamgulukila kwa hamwenga. ⁵⁸ Niyo wachimala kuse ko mzi na kutowa mayuwe, na waukuzi wamvula nguo zawo za kuse na kwika hasi haguhi ne iviga vya umbwanga akwitangwa Sauli. ⁵⁹ Chipindi wacjhei kutowa mayuwe Sitefano achei kumwitanga Zumbe na kumgamba, Zumbe Yesu hokela umuye wangu. ⁶⁰ Afika madi na kumwitanga kwa izwi kulu Zumbe usekuwafanyanyiza masa yano. Eze alonge yano niyo abanika