¹ Chitabu cha kale nachidolonywa, Thefilo, akagamba yose Kulisito akongile kudamanya na kuhinya, ² kubula zuwa diya ahokelwe kulanga Ino nikajika kualavya lagizo kujinkila Muye Ukukile kwa wasigilwa wadya wasagule. ³ Numo mo kusawaniswa kwakwe uyo nakawoneka kwawo umo emeso naho niyo elavya mo ukuka kwa mazuwa milongo mine ekelavyanya kwawo na kulonga Useuta wa Chohile. ⁴ Umo akadugana hamwenga nawo kulagiza wasekukulawa Yelusalemu mna wagoje cheliso cha Tati alongile, "Mwivile kulaila kwangu ⁵ Kugamba Yohana nakabatiza vitendedese kwa mazi nyuwe na mbatizwa kwa Muye Ukukile kwa mazuwa majeche." ⁶ Naweze watenda wadugana hamwenga niyo wamuza Zumbe vino dino nidyo idizuwa nowavuzize Waizulaeli uzumbe? ⁷ Niyo awagamba "Siyo ivyo kwa nyuwe kumanya chipindi Tate aungile kwa udahi wakwe mwenye." ⁸ Mna namhokele udahi umo Muye Ukukile nawizile mlanga mwenyu na nyuwe namtende waukuzi wangu kose kwe Yelusalemu na Uyahudi yose na Samalia kubula udumo we isi." ⁹ Zumbe Yesu eze aheze kulonga yano umo nawakasinya kulanga uyo niyo agubika wasekumwona kwa meso yawo. ¹⁰ Umo wakasinya kwe isi kwa kusinyisa chimpupa wantu waidi nawachimala hagati gati hawo wavikile suche zing'aile. ¹¹ Wagamba nyuwe wantu wa Galilaya kwambwani mchimala hano mkasinya ko ulanga? ¹² Niyo wauya Yelusalemu kulawa ko mlima we mizeituni uwo wihajihi na Yelusalemu ntambo ya zauwa dya sabato. ¹³ Weze wabule niyo waita kwedilingo uko nawakekala awo ni petulo Yohana, Yakobo, Anduleya, Filipo, Tomaso, Batolomayo, Yakobo mwana ywa Alfayo Simoni Zelote na Yuda mawana ywa Yakobo. ¹⁴ Wose walungana saviya mntu yumwenga kwa kuchinyinta kujendeleza mo kulombeza hamwenga na awo naweyaho wavyele Maliamu nine dya Yesu na wakuluze. ¹⁵ Mwe idizuwa diya Petulo niyo achimala hagati gati ha walukolo saviya wantu gana na milongo midi akagamba, ¹⁶ walukolo navikanunga kugamba mawandiko yachintizwe endile aho kale Muye Ukukile ulonga kwa mlomo wa Daudi vikumlanga yudya kwaviya lagiza wadya wamgweile Yesu. ¹⁷ Kwaviya uyo ni yumwenga wetu naye nakahokele hantu hakwe hongzekele mwe ndima. ¹⁸ Naho mntu yuno nakagula hantu kwa chiya ahokele kwo ubanasi wakwe niyo aho agwa na kulongoza umntwi mwili ubuntuka ne izinda zakwe zose zibuntuka na kwitika. ¹⁹ Wose nawakekala Yelusalemu na uneva vikulanga dino ivyo hantu aho wahetanga kwemilongele yawo Akeidama idyo no dya konde dya sakame. ²⁰ Mwe ichitabu che izabuli idolonywa, Goja ahantu hakwe hatende tongo hehekugwa hata mntu mtuhu aguhe luhenyo lwakwe lwa ulongozi, ²¹ Kwa iyo ivyo vyafaha kwa yumwe wa wagosi uyo nawalongozane na suwe umo Zumbe Yesu afosize na kwingila hagati gati hetu. ²² Kukongela mo uwambulwa wa Yohana kubula mwe3 idizuwa enulwe kulanga na umo akatenda mukuzi na kuuyuswa hamwenga na suwe. ²³ Waika kulongozi wagosi waidi Yusufu akwitangwa Barnaba uyo naho etangwa Yostona Mathia. ²⁴ Awo nawalombeza wakagamba weye Zumbe umanyize imyuye ya wantu wose na ivyo wike pwilili ni yuhi ehagati ha waidi wano uyo amsagule. ²⁵ Kuguha luhenyo mwe indima yo usigilwa uwo Yuda audamanye kwa ubanasi na kwita hantu hakwe ²⁶ Niyo wasagula wowo wenye ina usagizi umgwela Mathia yudya awazigwe hamwenga na wadya wasigilwa mlongo na yumwe.