¹ Miye suyo mntu alekeilwe? Miye suyo msigilwa? Miye simwone Yesu Zumbe dyetu? Nyuwe sayo matunda ye ndima yangu mwa Zumbe? ² Uneva miye suyo msigilwa kwa watuhu, mna ni msigilwa kwenyu nyuwe, kwaviya nyuwe ni ulavyanyo wa usigilwa mwangu mwa Zumbe. ³ Uno nuwo wegombezi wa miye kwa wadya wakunizunguluka miye. ⁴ Kwani hachina chindedi cha kudya na kunywa. ⁵ Hachina chindedi kuguha mvyele azumile enga ivyo wakudamanya wasigilwa watuhu na walukolo wa Zumbe na Kefa? ⁶ Hegu ni miye ichedu na Banaba wakungigwa kudamanya ndima? ⁷ Ni yani mdamanya ndima enga mnkondo akweliha maliho yakwe mwenye ni yani akuhanda mti asekudya amatunda yakwe hegu ni yani akudima ng'ombe asekunywa amele yakwe. ⁸ Mna nayalonga yano kwa udahi wa chimntu? mbuli nayo haikulongwa ivyo? ⁹ Kwaviya vidolonywa mwe mbuli ya Musa usekumjela ng'ombe fuwo mo mlomo akadya nkande ni chindedi kugamba hahana Chohile asinya ng'ombe. ¹⁰ Mna hakulonga ayo kwachausa cha suwe? Yadolonywa kwachausa cha suwe kwaviya uyo akulihwa nkande aungigwa kuliha kwa msuhi na akuvuna aungigwa avune kwa kwikala kajika kuhokela ulozo. ¹¹ Uneva chihanda vintu vya muye mgati mwenyu kwani ni mbuli nkulu kwetu chikavuna na vintu vya mo mwili kulawa kwenyu? ¹² Uneva awamwenga wapata wagilwa uno kulawa kwenyu? Togola suwe siyo vitendese? hachikutigiza chindedi chino mna chajijimiza mbuli zose siyo wagilo wa kuchinda ulosi wa Kulisito. ¹³ Hammanyize kugamba wose wakudamanya ndima mwe divikilo wapata nkande yawo kulawa mwe divikilo? Naho hammanyize wose wakudamanya ndima mwe nchanja wapata chiya chikulavigwa mwe nchanja. ¹⁴ Ivyo nivyo Zumbe kalagiza kugamba wose wakulonga ulosi wadahe kwikala kulawana na ulosi wedi wa Chohile ¹⁵ Mna sungile uwagila wose uno naho sikudolonya yano chani mbuli yoyose idamanyike kwachausa cha miye ni vyedi miye nibanike ukaleka kumkinkisa mntu kwa ntunyo kwa miye. ¹⁶ Uneva nalonga ulosi sikudaha kwetunya kwa viya yanunga nidamanye ivi nkondo ni yangu uneva sinalongile ulosi wedi wa Chohile. ¹⁷ Kwaviya hadamanya vino hunga ninantunyo mna sinatendile viya bhunga vyanitenda mwe diya ninkigwe dya uchimaila. ¹⁸ Mna ukutunywa kwangu ni kuhi kugamba halonga nalavya ulosi hahena maliho kudamanya ichindedi kwangu ninanacho mo ulosi. ¹⁹ Mna hata sitenda mlekeilwa kwa wose nasitenda mtalizwa wa wose chani kugamba niwapate walozize mno. ²⁰ Kwawyahudi nendile sitenda enga Myahudi chani niwapate Wayahudi kwa wadya wehasi mwe lagizo nasitenda enga yumwenga ywawo e hasi he lagizo ²¹ Kwa wadya wekuse mwe mbuli nandile ni yumwenga ywawo kuse mwe mbuli mna miye mwenye nasimuli kuse mwe mbuli ya Chohile mna hasi mwe mbuli ya Kulisito sidamanya ivyo chani niwapate wadya we kuse kwe mbuli. ²² Kwa wendile wanyonje nandile ni munyonje chani niwapate wanyonje sitenda zose kwa wantu wose nipate kuwambula awamwenga. ²³ Miye nadamanya mbuli nzose kwachausa cha ulosi chani nipate kwingila mwe ujimbiko. ²⁴ Hammanyize kugamba mwe nguluko wose wakuhigana waguluka mna akuhokela jeleko ni yumwenga ivyo gulukani chani mwinkigwe jeleko. ²⁵ Akuseziga echinda mwe vyose umo akahinywa awo wadamanya ivyo chani wahokele ntunyo ikubanika mna suwe chaguluka chani chipate ntunyo heikubanika. ²⁶ Ivyo miye sikuguluka hehena dyodyose natowana ngumi saviya natowa hewa. ²⁷ Mna nausulumiza umwili wangu naho na kuutenda saviya mtalizwa chani kugamba haheza kuwagambilani matuhu miye mwenye ninasekutenda wakulemelwa.