¹ Mna mwe mbuli mnidolonyeze kuna vino uneva ni vitana mgosi asekugona na mkaziwe. ² Mna kwa majezo yatendese ya uchilanga chila mgosi atende na mkaziwe naho mvyele atende na mgosiwe. ³ Mgosi aungigwa kumwinka chindedi chakwe mkaziwe na iviya mvyele naye kwa mgosiwe. ⁴ Siyo mvyele akutenda na udahi mo mwili wakwe ni mgosi naho iviya iviya mgosi naye hana udahi mo mwili wakwe mna mkaziwe ananawo. ⁵ Msekunyimana mkagona hamwenga mna mwivane kwa chipindi chidodo damanyani ivyo chani mhokele chipindi cha kulombeza naho mwadaha kuuwiyana naho hamwenga chani kugamba mwavu anasekuwajeza kwa kuswesa kudunduga. ⁶ Mna nagamba vino izimbuli ni kwa kunga naho siyo kugamba ni lagizo. ⁷ Naunga chila yumwenga atendile saviya miye ivyo nili mna chila yumwenga ana ntunyo yakwe kulawa kwa Chohile, yuno ana jeleko dino na yudya anajeleko diya. ⁸ Kwa hawenati kulombwa wagane nagamba vino ni vitana kwawo kugamba wakasigala bila kulombwa saviya nili miye. ⁹ Mna hegu hawakudaha kuchinda waungigwa walombwe kwaviya ni afazali kulombwa kuliko kutenda na uchilanga. ¹⁰ Haluse kwa wadya walombigwe nawenka lagizo siyo miye ni Zumbe mvyele asekulekana na mgosiwe. ¹¹ Mna hegu akesenta kulawa kwa mgosiwe niyo ekala ivyo bila kulombwa hegu nevane na mgosiwe naho mgosiwe asekumwinka talaka mkaziwe. ¹² Elo kwa wadya wabanikilwe nagamba miye siyo Zumbe kugamba mlukolo yoyose mgosi hekuzumila mna aunga ekale naye hakungigwa kumwasa. ¹³ Hegumvyele ana mgosi hekuzumila niyo uneva kaunga kwikala naye asekumwasa. ¹⁴ Kwa mgosi hezumile asuntwa kwachausa cha utondowazi wa mkaziwe na mvyele hezumile asuntwa kwachausa cha mgosiwe azumile hegu ne nivyo wana wenyu hewendile wedi mna kwa chindedi wasuntwa. ¹⁵ Mna hegu mnyawe hekuzumila akahalawa na aite kwa ivyo mkulu na lumbu hakuzumila ni kwelisa kwawo Chohile kachifunga chikale mpeho. ¹⁶ Naumanye zeze hegu mvyele adaha kumwambula mgosiwe? hegu naumanye zeze hegu mgosi adaha kumwambula mkaziwe? ¹⁷ Chila yumwenga du nekale wikazi saviya Chohile ivyo awapangile chila yumwenga saviya Chohile awetange wowo uno ni ulongozi wa miye kwa mavikilo yose. ¹⁸ Eyaho nandile ajeligwe ngasu ketangwa kuzumila asekujeza kusa iyalama yakwe, eyaho yoyose etangwe mo utondowazi hejeligwe ngasu? hakungigwa kujelwa ngasu. ¹⁹ Mwa dino mwa ajeligwe ngasu hakuna mbuli chenye mbuli ni kutongela lagizo dya Chohile. ²⁰ Chila yumwenga ekale mwe mwitango ivyo etangwe ni Chohile kuzumila. ²¹ Nandile wimtalizwa mwa Chohile eze akwitange usekusinya idyo mna hegu wadaha kutenda kulekeilwa tenda ivyo. ²² Kwa yumwenga etangwe ni Zumbe saviya mtalizwa ni mntu alekelwe kwa Zumbe enga viya yumwenga alekelwe etangwe kuzumila ni mtalizwa ywa Kulisito. ²³ Mheza kugulwa kwa yombe kulu ivyo msekutenda watalizwa wa wantu. ²⁴ Mkulu na lumbu dyangu mo wikazi chila yumwenga ywetu eze chitangwe kuzumila chisigala sa iviya. ²⁵ Haluse wdya wose ambawo hewanati kulomba sina lagizo kulawa kwa Zumbe mna naweunga mbuli ya miye enga ivyo nili kwa mbazi za Zumbe za chindedi. ²⁶ Kwaivyo nafanyanya kwachausa cha kusumbuka ni vyedi mgosi naekale enga ivyo eli. ²⁷ Kutalizwa kwa mvyele na kwelisa kwa ndowa usekunga ulekelwa kwa idyo una ulekelwa kwa mvyele henati kulombwa asekulonda mvyele. ²⁸ Mna hegu ukalomba hunati kudamanya masa na hegu mvyele henati kulombwa analombwa hanati kudamanya masa mna wapata malimizo yoyose miye naunga niwauzize ayo. ²⁹ Mna nakamba vino mkulu na lumbu za miye chipindi chisigale ni chijihi vino haluse na kujendeleza wadya wandile na wavyele wekale saviya hawana. ³⁰ Wose wenye chihovu wetende enga ne hewena chihovu na wose wakwelelwa saviya wandile hawelelwe niyo wose wakugula chintu chochose saviya hawakuwatawala chochose. ³¹ Naho wose wakutumbwazika ne isi watende enga hawakutumbwazika nawo kwa viya isi ibula udumo wakwe. ³² Naunga mtende mlekelwa kwa masulumizo yose mgosi helombile anadamanya vintu vikumtongela Zumbe enga kumwelelwa mkaziwe. ³³ Mna mgosi alombile akudamanya mbuli ye isi enga kumwelelwa mkaziwe. ³⁴ Mna mvyele helombigwe hegu chigoli adamanya vintu vikumtongela Zumbe enga kwesenta mo mwili mwe muye mna mvyele alombigwe anadamanya namna ye vintu vye isi kumwelelwa mgosiwe. ³⁵ Nalonga vino kwachausa chenyu naho sikwinka mtego kwenyu nalonga vino kwa viya ni chindedi chani kugamba mwadaha kweika ujimbiko kwa Zumbe bila lema dyodyose. ³⁶ Mna hegu mntu afanyanya hakudaha kumtendela kwa ntunyo chigoli chakwe kwa viya fanyanyi zakwe zina nguvu mno alombane naye enga ivyo akunga siyo masa. ³⁷ Mna hegu kadamanya malamuzi yakuleka kulomba naho hehana ulazima na ho hegu adaha kuzihuda izitama zakwe adamanya vyedi hegu hamlombe. ³⁸ Ivyo akumlomba chigoli wakwe adamanya vyedi na yoyose ambaye nasagule asekulomba adamanya vyedi. ³⁹ Mvyele kavugailwa ni mgosiwe umo emjima mna mgosiwe anafa kalekeilwa adaha kulombwa ni yoyose akumunga mna ni mwa Zumbe du. ⁴⁰ Naho mwa malamuzi yangu natende na kwelelwa mno uneva akekala enga ivyo eli nafanyanya kugamba miye nami nina Muye wa Chohile.