¹ Zungulani ungi na kubesa vitendese jeleko dya chimuye, mpate kulavya uwoni. ² Kwaviya yeye akulonga nchemo hakulonga na wantu mna alonga na Chohile kwaviya hakuna akumanya kwaviya alonga mbuli zefisize za chimuye. ³ Mna uyo akulavya uwoni, alonga na wantu awazenga naho awajela moyo na kuwahoza. ⁴ Uyo akulonga kwa nchemo hezikumanyika ezenga mwenye mna uyo akulavya uwoni ezenga wamzumile Kulisito. ⁵ Haluse nabesa vose mlonge kwa nchemo mna vikujinka ayo, nabesa kugamba mlavye uwoni uyo akulavya uwoni ni mkulu kujinka uyo kwa nchemo mafa hatenda na mntu akulavyanya chani kugamba bunga dya wamzumile Chohile dizengwe. ⁶ Mna haluse mkulu na lumbudye nneza nyuwe ni mbwani? Sikudaha mna uneva nalonga na nyuwe kwa sila ya ugubulo hegu kwa sila ya umanyi hegu kwa sila ya uwoni hegu kwa sila ya uhinyi. ⁷ Uneva vintu hevina ujima saviya gunda hegu kayamba hevikulavywa izwi dyesimile navimanyike zeze ni chiya chani chikuvinwa? ⁸ Kwaviya uneva gunda nadilanywe izwi haikumanyika mntu amanya vivhi ni chipindi cha kwemalanya kwa nkondo. ⁹ Nivyo nyuwe nanywi mkalavya mbuli kwa lulimi haikumanyika mntu onga amanye zeze icho mkulonga? Namlonge mna hakuna akunga amanye. ¹⁰ Hakuna nkama kugamba kuna misemo ilozize yesimile mwe isi naho hakuna hata imwenga heina mana. ¹¹ Mna uneva simanyize wagaze natende na mjeni mwauyo akulonga uyo naye akulonga natende mjeni kwangu. ¹² Viivyo hata nyuwe kwaviya mwabesa vitendese chindedi cha chimuye muungise kugamba mungise udizenge bunga dya wamzumile Chohile. ¹³ Ivyo akulonga kwa semi alombeze kulavyanywa. ¹⁴ Kwaviya nanalombeze kwa semi muye wangu walombeza mna izifanyanyi zangu hasi na matunda. ¹⁵ Mtende zeze? Halombeza kwa muye wangu mna naho nalombeza kwa fanyanyi zangu nachicheme kwa muye wangu mna naho nalombeza kwa fanyanyi zangu nazo. ¹⁶ Vituhu vyakwe ukamtogola Chohile kwa muye mjeni naetikile zeze Amina ukamtogola uneva hakumanya ivyo ukulonga? ¹⁷ Mna ni chindedi weye wamtogola vyedi mna yudya umtuhu hakuzengwa. ¹⁸ Namtogola Chohile kugamba nalonga semo kujinka nyuwe nyose. ¹⁹ Mna mwe dibunga dya wamzumile Chohile vyedi nilonge mbuli shano kwa umanyi wangu chani nipate kuwahinya wesimile kujinka kulonga milosi milongo gana kwa semo. ²⁰ Mukulu na lumbu dyangu msekutenda wana wadodo mwe zifanyanyi zenyu mna vikulanga ubanasi mtende enga wana wadodo mna mo kufanyanya kwenyu katende wantu wajima. ²¹ Idolonywa mwe inkato kwa wantu wa semo zesimile na kwa mikono ya wantu wajeni nanilonge na wantu wano naho hata ivyo haweve alonga Zumbe ²² Ivyo miye ni kilagiso siyo kwa wazumile mna kwa hewekuzumila kulavywa uwoni kwa hewekuzumila mna kwa wazumile. ²³ Haya uneva bunga dya wazumile didugana naho wose awlonga kwa semo wajeni na hewezumile nendile hawakudaha kulonga kugamba mnawazimu? ²⁴ Mna uneva woseni walavya uwoni naho hekuzumila na mjeni niyo engila nabunyanywe ni yose niyo eva nakantilwe ni yose ayo akulonga. ²⁵ Chinyele cho umuye wakwe zagubulwe? Ulailo wakwe ni kugwa chifunifuni na kumvikla Chohile emgati mwenyu. ²⁶ Nimbwani chikutongela ivyo, wakulu zangu na malumbu zangu? mkadugana hamwenga chila yumwenga ana zabuli mahinyo magubulo semo hegu kulavyanya damanyani chila chintu mzenge bunga dya wamzumile Chohile. ²⁷ Hegu chila yumwenga alonga kwa semo watendeke weyaho waidi hegu watatu naho yumwenga wenkana zamu naho mntu alavyanye chilongigwe. ²⁸ Mna hegu hakuna mntu akulavyanya ivyo chila yumwenga anyamale mndani mwe bunga dya wamzumile Chohile ivyo chila yumwenga b alonga ichedu na Chohile. ²⁹ Naho waoni waidi hegu watatu walonge watuhu wanyamale wakafanyanya ayo alongigwe. ³⁰ Mna yudya ekale niyo agubuilwa mbuli mwe indima yudya nakalonga anyamale. ³¹ Kwaviya chila yumwenga ywenyu adaha kulavya uwoni yumwenga bada ya mtuhu chani kugamba chila yumwenga ehinye naho woseni wadahe kujelwa muye. ³² Kwaviya muye wa waoni wi hasi mo ulongozi wa waoni. ³³ Kwaviya Chohile siyo Chohile ywa ubanasi mna ywa utondowazi enga ivyo vili mwa mabunga yose ya wamzumile. ³⁴ Vyawunga wavyele wanyamale mwe bunga dya wamzumile, kwaviya hawakwinkwa luhenyo lwa kutamwila mna wongigwa wanyanyahale saviya lagizo dikulonga. ³⁵ Hegu kuna chochose wakubesa kwehinya ivyo wakawauze walume wawo kukaya, kwaviya ni soni kwa mvyele kutamwila mwe bunga dya wazumile. ³⁶ Vini ulosi wa Chohile ulawa kwenyu? Hegu umbwilani nyuwe awodu? ³⁷ Hegu mntu akawona yeye ni muoni hegu ywa chimuye vyamunga ayamanye yano humdolonyezani kugamba ni lagizo dikulawa kwa Zumbe. ³⁸ Mna hammanyize yano mlekeni asekumanyika. ³⁹ Mna ivyo mkulu na lumbu dyangu mungisise kulavya uwoni naho msekumchinda mntu yoyose kulonga kwa semo. ⁴⁰ Mna mbuli zose zisankanileni kwa utana na vikuwagila.