¹ Nitimilani miye saviya miye ivyo humtimila Kulisito. ² Haluse namtogola kwachausa kwaviya mkunikumbuka mwe izimbuli zose, namtogolani kwaviya myatoza yadya mhokele saviya niwaletele kwenyu. ³ Ivyo nonga mmanye kugamba Kulisito ni mwili wa chila yumwenga mgosi naye ni mtwi wa mvyele naho vyatenda Chohile ni mtwi wa Kulisito. ⁴ Chila mgosi akulombeza hegu alulavya uoni uneva kagubikwa umtwi ajela sioni umtwi wakwe. ⁵ Mna chila mvyele akulombeza hegu kulavya uoni kuno mtwi wakwe ugubulwa ajela soni umtwi wakwe kwaviya vyaligana na amogigwe. ⁶ Uneva kugamba mvyele hagubike umtwi wakwe akantwe izifili zakwe zitende njihi kwaviya uneva ni soni mvyele kukatwa izifili zakwe hegu kuwegulwa ivyo agubike umtwi wakwe. ⁷ Kwaviya havikufaha mgosi kugubika umtwi wakwe, uyo ni mligano wa ukuka wa Chohile, mna mvyele ni ukuka wa mgosiwe. ⁸ Kwaviya mgosi halaile mwa mvyele, mna mvyele kalawa mwe mgosi. ⁹ Naho mgosi haumbigwe kwa chausa cha mvyele mna mvyele kaumbwa kwa chausa cha mgosi. ¹⁰ Vino nivyo vikuleka mvyele aungigwa atende na chilagiso cha uchimailwa kulanga umwili wakwe kwachausa cha wandima wa kwembingu. ¹¹ Hata ivyo mwa Zumbe mvyele hahali ichedu ukaleka mgosi hegu ukaleka mvyele. ¹² Kwaviya mvyele alaile mwe mgosi ni iviya mgosi nae kalawa mwe mvyele naho vintu vyose vyalawa kwa Chohile. ¹³ Kantilani nyuwe wenye vino ni sawa mvye amlombeze Chohile kuno umtwi wakwe wi lupwe. ¹⁴ Hata ivyo eli ivyodu havikuliganya kugamba mgosi akatenda na fili ntali ni soni kwakwe? ¹⁵ Vino ivyo eli havikuhinya kugamba mvyele akatenda na fili ntali ni ukuka kwakwe? Kwaviya kenkwa ziya izifili izintali enga suche zakwe. ¹⁶ Mna uneva mntu yoyose aunga kuligana kulanga yano, suwe hachina mazwela matuhu hegu mabunga ya wamzumile Chohile. ¹⁷ Mwa malagizo yakutongela miye sikuwatogola kwaviya mkudugana soyo kwa faida mna ni kwa hasala. ¹⁸ Mna nkongo mkadugana uneva kugamba mwa wazumile mna mgati mwenyu mna kupangana naho ntendele nazumila. ¹⁹ Kwaviya mwatenda na kuhigana mgati mwenyu chani kugamba wadya wazumilwe wamanyike kwenyu. ²⁰ Kwaviya mkadugana icho mkudya siyo nkande ya Zumbe. ²¹ Mkadya na chila yumwenga adya inkande yakwe mwenye hata awamwenga hawanati kudya hata hegu yuno ana sala yuno naye kakolwa. ²² Vino hamna nyumba zakudila na kunywela? hegu mwabela mbuga dya Chohile, nakuwajela soni hewene chintu? Nigambe mbwani kwenyu? nimtogoleni? Sanimtogoleni mwedino! ²³ Kwaviya sihokele vino kulawa kwa Zumbe Yesu ichilo ichiya asawaniswe niyo aguha mgate. ²⁴ Eze amhongeze niyo aubesula niyo agamba uno numwili wangu wimwechausa cha nyuwe mtende vino kwa kunikumbuka miye. ²⁵ Ivyo niyo aguha chikombe eze wadye agamba chikombe chino ni lagano hya mwe isakame yangu, tendani vino mala zilozize chila mkanywa kwa kunikumbuka miye. ²⁶ Chila chipindi mkadya mgate uno na kukinywela chikombe chino mwaibwelekeza ifile ya Zumbe mpaka aho akwizila. ²⁷ Kwaviya chila akudta umgate hegu kunywela ichikombe icho cha Zumbe hevikuwagila natende kepatila masa ya mwili na sakame ya Zumbe. ²⁸ Mntu nande kefanyanya mwenye nkongo nivyo adye na kuywela ichikombe. ²⁹ Kwaviya akudya hegu akunywa ukaleka kufanyanya umwili adya na kunywa nkanto yakwe yeye mwenye. ³⁰ Nivyo vikuleka wantu walozize mgati mwenyu ni wanyonje naho wasokela awamwenga wenyu nawo wabanika. ³¹ Mna niyo chefanyanya wenye hachikantilwe. ³² Mna chikantilwa ni Zumbe chahinywa chani chinase kukantilwa ne isi. ³³ Mweivyo mlulu na lumbu dyangu mkadugana chani mdye mgojane. ³⁴ Mntu mta sala naadye kweikaya yakwe chani kugamba mkadugana hamwenga visekutenda kwankato naho vikulanga mbuli ntuhu izo nidolonye naziliganye umo heza.