¹ Pu mufigono fila u Yohana uveiaonchaga aleikhulumbelila munyikha incha va Yuta, ² "Mpelage inongwa ulwa khuva uludeeva lwa khukyanya lu leipipi." ³ Ulwa khuva uyu vei mwene anchoviwe nu nyamalago u Isaya aleikhuta, "Ngolo ya munu uvei alei ndukungu, munonchage einjeila ya Ntwa, mgolosyage umwa khuluta umwene." ⁴ Leino u Yohana aafwalile amanchwa ga ngamia nu lukata lwa ngwembe mukhi vina khya mwene. Eikhya khulya khya mwene khyale imanji nu wuukhe uwa mumisitu. ⁵ Pu ei Yelusalemu, ni Yuta yooni ni khilunga khyoni eikhinchungula ulugasi ulwa Yolodani pu valei khunduteila umwene. ⁶ Puvaleikhyonchiwa nu mwene mundugasi ulwa Yolodani khunu vipela inogwa nchaavo. ⁷ Puleino avile avawene ava falisayo na vasadukayo valeikhwincha khumwene khukhyonchiwa akhava vula akhata, "Umwe mwiva khivumbukhu khya njokha veeni uvei ava vuulile umwe ukhukimbela uluviipo uluyakhiva lwikhwincha? ⁸ Muvoniage eisekhe inchino gelanile nu vupeli. ⁹ Pu mulekhe avange ndyumwe ukhusaga nu khwincho fanja, 'Tuleinave u Ibrahimu ndu daada yeito.' Ulwa khuva u Nguluve avahile ukhumwimekhila umwana ukhuhuma mumawe aga. ¹⁰ Einjunu puyeimalile ukhuveikhiwa mfikolo fya mabeikhi. Puleino khila beikhi ugu sagu houpa isekhe inonu pu gugeidiwaga nukhu laheila mu mwoto. ¹¹ Pu une nikhuvoncha na magasi savuli ya khupela. Pu leino umwene uveikhwincha musana ndyune vei mbaha ukhunduteiila une, na yune saneinogile ukhugega ifilato fya mwene. Pu umwene ikhuvonchaga khu mepo umbalanche nu mwoto. ¹² Uvie umwene ulupeetelo luleimavokho nu mwene pwi nonchaga fincho eikhyaalo khya mwene nukhulundania einganu mukhibaana khya mwene. Pu leino amapuna pwi nyanyaga mu mwoto ugusagwinchima. ¹³ Pu u Yesu akhincha ukhuhuma khu Galilaya impakha khulugasi ulwa Yolodani khukhyonchiwa nu Yohana. ¹⁴ Puleino u Yohana aleikhunogwa ukhu beencha aleikhuta, "Une ninogwa ukhyonchiwa nuve, uve puvukhwincha khulyune?" ¹⁵ U Yesu akha mwanda akhata, "Weideekhe ulu leino ulwa khuva yeilondiwa ukhutekhelesya eilweli yooni.'" Pu akhamweideekha. ¹⁶ Pu aviile amalile ukhyonchiwa, pu u Yesu akhahuma mumagasi, pu u Yesu akhahuma mumagasi, pu nilola ikyanya nchikhade indukha. Pu akhambona umepo va Nguluve vu ikhwincha ndei khihwani khya ngundya pukhikhalitama pa mwene. ¹⁷ Lola, eingolo eikhahuma khukyanya eiyiita, "Uyu vei manango ugane, uveinihovokha fincho nu mwene."