¹ UYeisu navakongi vamwene vakhava vahengelile ukhufikha khu Yelusalemu. Puvakhaluta na khu Betifage pakhyamba eikhyamba ikhya mono. Puleino UYeisu akhavasuha avakongi vaveilei. ² Akhavavula, "Akhala mlulanghe pa vunchenge uvuvukonga, puvuminfikhe mukhweivona eilinghodowe leiokungiwe pala nei khyana khya linghodowe khinkungiwe paninie pumuvopole munchinghenghe khulyune. ³ Eingave umunu uveiavena angha ikhuvavula khininie. Ukhukongana neilyunevasuhile mutenhange unkuludeva aleinuvutumbwe nancho pu umunu uywa ikhuvalekha mwinchanghe na manghodowe angho." ⁴ Eili iyahumile nduvulya nchove'we nu nyamalangho puleino livombekha nduvulya nchoviwe. ⁵ Mumbule ungh'ei ncha ava Musayuni, lola, khulyuve. Idekhedekhe itonghile palinghodowe neikhya na khyalinghodowe ikhinghosi. ⁶ Puleino avakongi vaakhahengha nukhuvomba nduvu UYeisu avavulile. ⁷ Puvakhanchileta eilinghodowe nei khyana khya linghodowe puvakhatandancha imyenmda ngyavo palinghodowe na pakhyana khya linghodowe, pu UYeisu akhatama palinghodowe. ⁸ Avanu vingi pakhipungha khila vakhatandancha eimyenda nghyavo munheila avange avaleikhunghida isamba puvaleikhutandancha amaswato ngha samba musevo. ⁹ Ikhipungha ikhikhyandongwile UYeisu na vala avava kongangha valekhyova eilimenyu valeikhuta: Hosyana mwana va Daviti anghinivwanghwe na uvei ikhwincha munditavwa lya Nkuludeva. Hosyana na khukyanya. ¹⁰ UYeisu vwafikhe uvunche nge vwoni vukhakenyemukha nukhuta uyu veiveni. ¹¹ Ikhipungha khikhamula khikhata; "Uyu vei Yeisu uva mu Nazareti eiya khu Nghalilai. ¹² Pu UYeisu akhingheila mulembile ya Nguluve pu akhava veingheila khunchi vooni avanghulangha mkhunghuncha mtembile. Heunge akhabeileivanchula ifisalati fya vala avaleikwanania indalamanifinghoda fya vanghuncha nghundya. ¹³ Akhavavula akhata, "Yeisimbiwe ukhata, "Inyumba yango yiva nyumba ya lwisayo, 'Pu leino umwe mpelile ukhuta yive manga ya vanyambuda." ¹⁴ Pu leino avabofu va miiho na valemale puvakhahenghelela khumwene vwalei mu tembile, pu akhavuponia uvumpala vwavo. ¹⁵ Pu leino avavaha vavatekhe nchi na vamanyi vakalata vavile vafiwene ifidengho ifyu avombile, pu vavile vapulikhe pu leino avana valekhuvata, "Hosyana vi mwana va Daviti,"Pu avene nghukhavipa fincho. ¹⁶ Puvakhambula u Yeisu vakhata, "Vupuleikha eikhyuvinchova avana ava?"U Yeisu akhata, "Eena! Samweimbile mukalata upupita, 'Khumilomo einghya vana avanyehe navavo vikhyoha ukhuta umalile ulunghinwo?" ¹⁷ Pu akhavalekha akhahengha pavunchenge vula nukhuluta khu Betaniya khuakhanchinghona. ¹⁸ Pavusikhu avile ivuya ukhu khuvunchenge akhava, aleineinjala. ¹⁹ Pu akhanghuvuna unkuyu nghumo palukanji panjeila. Puakhahenghelela, pusakhivone khinu pabeikhi nghula anghawe amaani nghene. Pu akhanghukotola akhata, "Ukhuhumangha leino sahula hupa isekhe isikhu nchooni." Pu unkuyu nghula nghukhaniala palapala. ²⁰ Avakongi vavile valolile, eikhidengho eikhi vadenghile nukhuta, "Pu yeivile ndakheikhi unkuyu nghunialile akhaseikhi ndakha?" ²¹ Pu u Yeisu akhamula akhata, "Ncha yeilwei nukhuvavula, mungave mwiva nulweideikho samusinana, samukhavomba nghe ikhivombikhe khubeikhi unghwa vuvule, pu leino muvambangha ifideingho nifinghe pu leino mukhukhivulangha nakhikhyamba eikhyo ukhuta khitoliwanghwe, 'nukhunchutangha munyanja pu yivombekhangha ewo. ²² Pu nghala unghinyakhiva mudova ndweisayo nulweideikho, pumukavangha." ²³ U Yeisu avile afikhe muntembile, avavaha va vate khenchi navamanyi vakalata vakhahenghelela khumwene avile aleipa khumanyisya, "Puvakhambuncha vakhata, "Vuvomba inchi nchooni vuvombela mumakha makhi?" ²⁴ Pu U Yeisu akhavamula akhata, "Na yune nikhuvavu ncha eilimenyu leino. Leilyo munganyamule, punikhuvavula ni vomba inchi mundulanghilo lwani. ²⁵ Ulyoncho lwa Yohana - lwa humile khwani, khunyanya khuvanu?" Vakheinchofanja vavo vakhata, tunghate lwa humile khunkyanya puyaikhutu vula ukhuta pukheikhi samwamwedeikhe? ²⁶ Pu leino tungate, 'lwahumile khuvanu,' Putudwada avanu ava pakhuva vooni vikhumbona u Yohana ndu munu unyamalangho. ²⁷ Pu leino vakhamwamula u Yeiau vakhata, "Satulumanyile" Pu akhavavula khange akhata puna yune sanikhuvavula nivomba angha mundu langhilo lwani. ²⁸ Leino pu musangha kheikhi? Umunu unyavana va veilei. Akhaluta khumwana wamweneumo akhata, 'Manango, luta khuvomba imbombo mukhyalo eikhya masilu Akhamula akhata. ²⁹ Niluta Ntwa pusakhaluta. ³⁰ Pu akhaluta khuswambe uvaveilei akhambula vuvuvwa, vupe akhata ndeili saniluta, pungela akhasangha munumbula utima nghukhambava akhadova ulusyeikhilo pu akhaluta khukhyalo. ³¹ Pu leino muvana avo vaveilei aleikhu uviavombile uvunonghwe vwa vise? Vakhata ula uvaveilei, "Pu u Yeisu akhavavula akhata ncha yeilweli lweli nikhuvavula, avasanghunchi va songo navalinghu valavalongola pavulongolo pa lyumwe ukhwingila mundudeva lwa Nguluve. ³² Ulwakhuva u Yohana ainchile khulwumwe khunjeila ingolofu, pu leino umwe samwa mweideikhe, pu avasanghunchi va sango na valinghu vakhamwedeikha. Pu umwe, na pala upu mwavavonanga samulaikha deikhe. ³³ Mupuleiheinche eikhihwani eikheinge. Kwale nu munu, umunu unyalilevunchi lya kheilunga. Avyalile amasilu pu akhaveinghileila nuluveingho, puakhanchengha neikhivo eikhya khukameila amasilu, pukhayava nulukonje lwakhungulolela akhanchenga pu akha vaveikha na vanu avakhulolela akhahengha ukhulula eikhilunga eikhya pavulale. ³⁴ Useikhi ngwa vubeni vwa masilu vunghuhenghelile akhavasuha avavombi vadebe khuvavombi va masilu vakalole amasilu ngha mwene. ³⁵ Pu leino avavombi va masilu nukhyalo vakhavibala avavombi vamwene uvu avasuhile, vakhatova yumo, uyunge vakhatova na manghanga. ³⁶ Pa seikhi unghunge unyakhyuma akhavasuha avavombi avange vuvingi ukhululeileila vala avakhatalile, pu leino avavombi va mukhyalo khya masilu vakhavatova vuvuvwa nduvuvakhatovile khuvala avakhatalile. ³⁷ Pu ukhuma pala unkuludeva ula akhasuha khanger khuvene uswambe akhata, "Vinchikhudwada uswambango." ³⁸ Pu avavombi va masilu vala vavile va mbwene undume ula, vakhavulana, "Uyu veimwene vuhale pu leino tu bude, pu uvuhale vwa mwene tuhale ufwe." ³⁹ Puleino vakhatola vakhatangha khunji khukhyalo khya masilu vakhabuda. ⁴⁰ Leino unyakhyalo khya masilu yakhiva eikhwincha, ayikhuvanghaha ndakheikhi avavombi va khyalo khya masilu?" ⁴¹ Vakhambula vakhata, "Avanu avavivi ava sakhavakolele eikhisa, avanu vavo yavi hombangha ukhukongana na masilu unghuvikavana yakhiva nghadulwikhe." ⁴² U Yeisu akhavavula, "Samweimbile mumbusimbe," eiliwe eilyu vakhaleibelile avanchenga va nyumba livile liwe lyakhwikanga ncha mu eilyo. Eilei leihumile khwa nkuludeva, pukheiswingho pa miiho geito?" ⁴³ Leino nikhuvavula, Uludeva lwa Nguluve luhengha ngha ukhuhuma khulwumwe nukhuvapa avanu vakhilunga eikhikhunchilolela iseikhe ncha nyakhyalo. ⁴⁴ Pu ula uveiyakhiva inghwa pa liwe elyo vei uyu itikhinyuliwanghwa vuvule. Pu leino khu ula uviyokhiva likhunghwila pulikhutikhinyula." ⁴⁵ Avavaha vavatekhenchi na va Falisai vavile vapulikhe ifihwani fya mwene, vakheivona ukhuta ikhuvanchova avene. ⁴⁶ Pu leinu khila seikhi vupava leikhunonghwa ukhuta vamwibate vakhudwada ifipungha fya vanu, ulwakhuva avanu vambonangha u Yeisu ndu munu unyamalangho.