¹ Paulo, mtumishi wa Mulungu na Mtume wa Yesu Kristo, kwa imanio ya wateule wa Mulungu na maalifa ga kweli igala utaua. ² Waumo muna ditumaini da ugima wa milele ambao Mulungu hadaha kulonga uvwizi kauahidi tangu milele. ³ Kwa wakati ulondeka, kadifuhnula neno jake muna uujumbe waanihng'ile nie kuuhubili. Nilondeka kutenda ivo kwa amli ya Mulungu mulokozi wetu. ⁴ Kwa Tito, mwanawa kweli muna iimani yetu. Neema, ubazi na amani kulwa kwa Mulungu Tata na Yesu Kristo mulokozi wetu. ⁵ Kwa sababu ino nikuleka Krete, kwamba ugatende mambo gose gakalile haganakamilika na kuweka walala wa kanisa kwa kila mji kama vinikulagilize. ⁶ Mzee wa kanisa lazima seka yawe na lawama, mulume wa mke imwe, mwenye wana waaminifu welibule ushuhuda wihile au welibule nizamu. ⁷ Ni muhimu kwa mkalizi, kama kosimamia ng'anda ya Mulungu, seka yawe na lawama. Seka yawe muhnu wa tulikizi au yopotwa kuizuia. Lazima seka yawe na hasila za habehi, seka yawe mlevi, seka yawe na ndwagi, na seka yawe mwenye tamaa. ⁸ Badala yake: yawe muhnu mkaribishaji, yopenda wema. Lazima yawe muhnu mwenye akili timamu, mwenye haki, yomcha Mulungu, yojitawala mwenyego. ⁹ Yodaha kugasimamia mafundisho ga kweli gafundishigwe, ili yadahe kuwagela moyo kwa mafundisho ganogile na yodaha kuwalekebisha wose ompinga. ¹⁰ Kwa kuwa kuna waasi wengi, hasa waja wa tohara. mbuli yao ni upuuzi. Ovwiza na kuwalongoza wahnu muna uubananzi. ¹¹ Ni lazima kuwazuia wahnu kama wao. Ofundisha gaja hagalondeka kwa faida za kinyala na kubananga kae zose. ¹² Imwe wao, muhnu yeli na busala, kalonga, "Wakrete wana uvwizi ulibule mwisho, weha na ni ming'onyo ya hatali, wabwa na walafi." ¹³ Maelezo gano ni ga kweli, kwa hiyo uwagome kwa nguvu ili wadahe kulonga kweli kwa imani. ¹⁴ Weye seka ujihusishe na hadisi za uvwizi za kiyahudi na amli za wahnu, ambao huubweleza kukisogo ukweli. ¹⁵ Kwa wose weli safi, vihnu vose ni visafi. Mbali kwa wose weli wachafu na weli hawaamini, habule kili kisafi.Kwa kuwa mawazo gao na zamila zao zichafuigwa. ¹⁶ Okili kummanya Mulungu, mbali kwa mbuli zao omkana. Wao ni wabananzi na siyo watii. Hawasibitike kwa tendo jojose dinogile.