¹ Kia kikalilebaho tangu mwanzo-kile chichihulike, kia chichione na kwa meso getu, kia chikikilolile, na mikono yetu ichahma-kuhusu Mbuli ya uguma. ² Na ugima uja utendigwa kumanyika wazi, na chiuona, na kuushuhudia, na kuwatangazila ugima wa milele, ambao ukala kwa Tata na utendigwa kumanyika mumwetu. ³ Kia chichione na kukihulika chokitangaza kumwenu ivia, ili kwamba mudahe kukala hamwe na cheye, na ushilika wetu hamwe na Tata na Mwanage Yesu Klisto. ⁴ Na chowandikila mbuli zino mweye ili kwamba dehng'o jetu diwe timilifu. ⁵ Uno ndiyo usenga uchihulike kulawa kumwake na kuwatangazila: Mulungu ni buhng'ulo na mgati yake mwabule ziza hata kidogo. ⁶ Kama chahalonga kwamba chinaushilika na yeye na chogenda mdiziza, chovwiza na hakitenda kweli. ⁷ Mbali chahagenda muna dibuhng'ulo kama viili muna dibuhng'ulo, choshilikiana cheye kwa cheye, na damu ya Yesu Klisto, mwanage yochitakasa kulawa muna zizambi zose. ⁸ Kama chahalonga chabule zambi, choivwizila wenyego, na kweli yamwabule mgati yetu. ⁹ Mbali chahazitubu zambi zetu, yeye ni muaminifu na wa haki kochisamehe zambi zetu na kuchitakasa na ubananzi wose. ¹⁰ Chahalonga kwamba hachitendile zambi, chomtenda yeye kuwa mvwizi, na mbuli yake yamwabule mgati yetu.