¹ Kwi isambo idyo, u Herode wivwile imbola izyaka Yesu. ² Wawapozya achilongele wakwe, "Huyu mwine u Yohana umbatizyaji wazyuka kufuma kwa afwile. Kwine kukuti amaka eya yali palulu yakwe." ³ Vine u Herode alinge wandema u Yohana wambopa na kukunsumbila mwidyeselo kwa ajili ya Herodia, unka Filipo unkadyakwe. ⁴ Vine u Yohana wampozizye, "Kasi ivinonu kukunsenda umwene awe unchimakwe." ⁵ U Herode ngi wankominge watinile awandu vine wambine u Yohana kukuti umbwilagu. ⁶ Ipa lusiku idwa leliwa u Herode pene dwafikile umwalili wa Herodia wachinile pakasi ya awandu wanonelezya u Herode. ⁷ Katika kukunjibu kulilo wamwaidi kuchilapo kukuti akumpa chochosi chine achilenga. ⁸ Pine wayanguliwa nu umayakwe, watela wati, "Nimba unene epa muchikombe untwe wa Yohana umbatizyaji." ⁹ Umwene alinge amakwelenganya kulenga kwa mwalili, ila kulingana neichilapo chakwe, vine wosi wine linge walipachakudya papamu nakwe wawine kukuti imatakiwa lilongiwe. ¹⁰ Walagizye u Yohana aletwe kufuma mwidyeselo ¹¹ ngani atipiwe untwe wakwe uletwe nkasi ya sinia ngani ampe umwalili ngani atwale kwa mayakwe. ¹² Ngani alanganizi wakwe wiza wasenda umbili wakwe wawala wazyika, pine dyapita hili wawala wampozya u Yesu. ¹³ Nape u Yesu pine wivwile heyo, wipeula kufuma pene iza ali wazua mumashua wawala kukaya ine eipewile, pine iwungano dyamanile kwine alinge alikwali, wankongile idwa manama kufuma kukaya. ¹⁴ Ngani Uyesu wiza kumele yao waliona iwungano ikulu, wawaonela ingumbu wawapulusha ne imina zyao. ¹⁵ Pine yafika umangodwa, alanganizi wakwe wambalela wati, "Epa panyika nu ulusiku dwapita. Wasambanye iwungano wawale nkaya wakakale ihiliwa kwa ajili yawene. ¹⁶ U Yesu wawapozya, "Kasi kukuti wawuke. Wapi mwemwe ichiliwa." ¹⁷ Wampozya, "Epa tulini imikate isano ne iswi ziwili." ¹⁸ U Yesu wawapozya, "Ileti kulunene." ¹⁹ Ngani u Yesu wawapozya iwungano wikale pasi pisote. Wasenda imikate ila isano ne iswi ziwili. Walola kululu watimbana wamenya imikate wawapa alanganizi wakwe alanganizi wawapa iwungano. ²⁰ Wadya wosi wikuta, ngani waunganike chene cha shala wizuzya amakapo ikumi na yawili. ²¹ Wala wine wadile linge kuli achilume changati ielfu zisano bila kuwazya achichima na awana. ²² Isambo lilo wawawila alanganizi winjile nkasiya mashua, papo umwene wawalaya iwungano wawale kumiao. ²³ Pine wawalaya iwungano wawala idwao, wazua palulu ya chitunda adyimwi. Pine yafika umang'odwa alinge alikuko adyimwi. ²⁴ Epa imashua alingeili pakasi ya lukuwa yahingana yingana kwa ajili ya amawimbi, vine umweya alinge iwa mpisho. ²⁵ Pa usiku iwa zamu iya uni u Yesu wawapalamile, wenda palulu ya mazi. ²⁶ Pine alanganizi wakwe wambwine wakwenda palulu ya lukuwa, wachindwike wati, "Ili izimu," wapokwite kwilingo vine linge watina. ²⁷ Uyesu wawapozya lulumwi wati, "Ipi umoyo! Nene! Mutatine." ²⁸ U Petro wajibu wati, "Nkali, nge wewe mbozya nize kuluwewe palulu ya amazi." ²⁹ U Yesu watela, "Iza." U Petro wafuma nkasi ya mashua na wenda palulu ya mazi wawala kwa Yesu. ³⁰ U Petro pine wawine amawimbi, watinile, wazya kukwiwila, pasi wita kwilingo wati, "Nkali, navwa!" ³¹ Ichikarakashe u Yesu wagolosha unkono wakwe wamwinula u Petro, wampozya, "We mwine ulinizumilo iche, kuchiyi iza ulinu uwowa?" ³² Pine u Yesu nu Petro winjile mumashua, umweya watekama. ³³ Alanganizi mumashua wanzumila u Yesu wati, "Izya mwene uwewe wa mwana wa Mulungu." ³⁴ Na pine walambuka, wafikile ku ise iya Genesareti. ³⁵ Na awandu awapala pine wamanile kukuti u Yesu, watumile ujumbe cila upande iwa mbelo, na waleta chila mbinu. ³⁶ Wanfundile kukuti wapalakashe nanga ivazi dyakwe, na awinji wine wapalakishe waponile.