¹ Alinge ili wuli u Melkizedeki, umwene wa Mulungu yene ali kululu yene akomengine nu Abrahamu wasula kufuma kuwakomanga amwene na kuwatimbanila. ² Abrahamu uwampile idyimu iyi ikumi iya chila chindu chine alinge alinacho, itawa dyakwe'' Melkizedeki amanakwe umwene uwa utimu na umwene uwa Salemu yene umwene wizumilo.'' ³ Atakola utayi, atakola umayi, atakola asungi, atakola uwandilo nanga ulusiku nanga usililo wa wikalo wakwe. Ulo washale, kukuwa umweene uwa siku zyesi, changati umwana wa Mulungu. ⁴ Epa nakwelenganya une undu uyu unkulu. Unsungi witu Abrahamu wampile idyimu iikumi ya vindu ivinonu vine wavisendile kuluu. ⁵ Uluko udwa Walawi wine watangine lafisi izya chimwene alinge wali na amaka kufuma kumasunde kulonganya idyimu iyi kumi kufuma kuwandu, ine, kufuma kwa Aisrael amyao, papamwi na kuti awene, nanga ulo uluko kufuma kwa Abrahamu. ⁶ Nanga ulo Melkizedeki, yune kasi uwaluko kufuma kwa Walawi, watangine idyimu iyi kumi kufuma kwa Abrahamu, wantimbanila, umweene yene alinge alinulufingwa. ⁷ Nepo itakaniwa kukuti undu untiti atimbaniwa yanu nkali. ⁸ Kulili undu yuna watangana indyimu iyi kumi akufwa ulusiku lulumwi, nanga ulo kuchindu ichinji adyumwi yuna atangine idyimu iyi kumi Abrahamu itwaliwe changati yene alinu wikalo. ⁹ Na kwipangwe, Ulawi yuna watangine idyimu iyi kumi, ulo walipile idyamwi iyi kumi kwa Abrahamu, ¹⁰ vino Ulawi alinge alimunsana mwatayi wakwe Abrahamu pine Umelkizedeki wakomengine nu Abrahamu. ¹¹ Epa ngi usokofu wawonike kuwamwene wa Lawi, ulo pasi yakwe awandu watanganaya amasunde alinge kuti lina livwambiwachi kwa mweene uwinji kukwimilila kumasunde aya Melkizedeki, na kasi kukwitwa pimye wilinganya kwa Haruni? ¹² Vino umweene wagelwike yavwambiwa amasunde nape yagoluke. ¹³ Kwandu adyamu yeneya yateliwe kukabila idyinji kufuma kukwakwe kutalinda yene walongela pachili mbano. ¹⁴ Eoa iya mwene kukuti utayi witu wafumila kwa u Yuda, ikabila yene u Musa ataitaka izya mwene. ¹⁵ Neya yene tutela mmwene ngi umwene uwinji afumila kuufalinganye uwa Umelkizedeki. ¹⁶ Umwene uyu umpya kwi adyumu yene amakwe umwene, palulu iyamfula iya masunde zyane zilipapipi mululelo wandu, nanga pamfula uwa maka yawikala yene yatawezya kuluwangika. ¹⁷ Ulo amaandiko yalindikisha kulumwene: ''Uwewe wa mwene isiku zyosi kumasinda iya Umelkizedeki.'' ¹⁸ Vino amasunde yene kali yawikwa kumbalo vino alinge indokataka ne itafwaya. ¹⁹ Ulo amasinde alinge yafwaya chochosi ichinonu ngani alinge kulina uyivu unonu kuyayo tuku nsundila Umulungu. ²⁰ Nu uyivu huu unonu alinge utafwamila pene kasi apapanga aichilapo kutili amwene awanji alinge watasende ichilapo chochosi chila. ²¹ Umulungu wasendile ichilapo isembo dyane watanile kwa u Yesu, ''Utayi walapa na atakagelusha amelenganyo yakwe uwewe wa mwene isiku zyosi.'' ²² Kulili u Yesu wiza kukuwa idhamana iya ulufingwa unonu. ²³ Mwene ifwa ilimbaya amwene kulonga isiku zyani vine alinge wakweli amwene awinji, adyamu ngani nu winji. ²⁴ Nanga ulo u Yesu alinu wikalo uwa isiku zyosi, umwene wakwe utagelukaya. ²⁵ Vine vyivyo umwene awezyizye ku usokofu kulindikisha kuwapalusha wene wakumpalamila Umulungu kupitila kukwakwe, vine umwene alinu uwikalo kulanga kuwao. ²⁶ Chavino umwene unkulu uwa uli wavwambiwa kumiti yene atakota imbi yene atakata iwi unsaza yune apeliwe kufuma kwa wene wanimbi, na wawapalulu kupita kululu. ²⁷ Umwene alinge atawamba ufwavinganya uwa amwene akulu kufunya nidopo chila yalo, kumbi zyakwe unkala, nukwisambo kumbi zya wandu. Awikili lulumu kuwosi, pene wifunyizye wene unkala. ²⁸ Ku amasinde wawapile awandu atokatoka kukuwa amwene akulu, nanga ulo inongwa iya ilapo lene lizile kumbele ya masinde, wanyewile umwana yune awekiwe kukuwa unsokofu isiku zyosi.