¹ Lino lunono fiijo kulyune kukuvalembela vwimila, ulutango lwinu ku vitiki. ² Nikagwile umwojo ghwinu ughwa kuvatanga avange, ghuno najune nikughinia vwimila umue ku vaanhu ava ku Makedonia. nikavavulile kuuti, ikipugha ikya vitikiava kukighavo ikya Akaya vakiling'hanisie kuhuma umwaka ghuno ghwakila. umwojo ghwinu ughuo ghuvapeliile vinga mu veene kuuva nu mwojo ughwa kutavula. ³ Lino nivasung'hile avanyalukolo viitu ava kuuti, ulughinio lwitu vwimila umue luleke piiva lusila luvumbulilo, mu lwa kuuti mwale muuva muling'hanisie, ndavule nikajovile. ⁴ Ulwakuva nave nisiile ukuo palikimo nu muunhu ghweni ughwa ku makedonia na kuvona namuling'hanisie, mwale muuva mutukosekisie isoni --- nanijova kiinu kulyumue - ulwakuva nilin'kali fiijo vwimila umue. ⁵ Lino nivwene lunono nivasuume avanyalukolo viitu ava valongole ukuo kuuti, valing'hanikisie ng'haani uluvonolo ndavule luno mukalaghile. Mu uluo muuva mutavwile nu mwojo um'balafu, nakwekuti jumonga iiva avumilisie. ⁶ Mukumbukaghe kuuti, umuuhu juno ivyala fidebe, ipeta fidebe, juno ivyala vwimila uufumbue vwa lufunyo ikava ulufunyo. ⁷ Umuunhu ghweni atavulaghe ndavule alamwile mu mwojo ghwake.Alekaghe kutavula nu lusukunalo nambe kukwumilisivua. Ulwakuva u Nguluve ikumughana umuunhu juno itavula nu mwojo um'balafu. ⁸ Pe u Nguluve ikuvafunyagha mu nyinga kuuti jaatu muvisaghe ni finu fyoni fino mulonda, neke muvusaghe vaanhu va kuvomba inofu inyinga. ⁹ Ndavule lilembilue kuuti:'' Atavwile ikyuma kyake kukuvapeela avakotofu. Uvukoola vwake vwa fighono fyoni.'' ¹⁰ Ghwope juno ikumpeela umuunhu imbeju ija kuvyala nu n'kate ghwa kulia, ikuvapeela imbeju ija kuvyala na kukuvongelesia. umwene ilikwongelesia umpeto ghwinu ughwa mwojo ghwa vukoola. ¹¹ Ikupapelagha uvumofu mu sooni kuuti, muvisaghe vapeesi. Mu uluo vikumuhongesyagha uNguluve kukilila usue. ¹² Ulwakuva imbombo iji jino muvomba nakwekuti jitanga va vitiki vano vaghilue, looli jipelela avaanhu vinga vamhongesiaghe fiijo unguluve. ¹³ Imbombo iji jino muvomba jihufia kuuti umue muli vavombi vanofu mu uluo avaanhu vikumughinia uNguluve. Vikumughinia vwimila uvukundi vwinu uvwa kwitika imhola inofu ija Kilisite. kange vikumughinia pano vikuvwagha uvukoola vwinu mulwa kuhangilanila ifiinu palikimo na veene na vange vooni. ¹⁴ Vavasyukilue, kange vikuvasumila. vivomba uluo vwimila ulusungu uluvaha luno uNguluve avapeliile. ¹⁵ Tumuhongesiaghe uNguluve vwimila ikipelua ikivaha ikya kudegha, kino atupeliile!