¹ Lino, vanyalukolo viitu tulonda umue mukagule vule uNguluve afisungukiile ifipugha fya vitiiki ku makedonia. ² Un'siki ghwa ngelo imbaha sa mhumhuko, ulukeelo lwave uluvaha palikimo nu vukotofu vwake, kulyavapeleliile kuuva nu vumofu vuvaha vwa vukoola. ³ Nikuvavuula kuuti valyatavwile ifinu finga, kukila vule valyale. ⁴ Kange valatavwile mu vughane vwake na kukutupelepesia kuuti vavisaghe vuhangilanisi nusue mu mbombo ija kuvatanga avitiki. ⁵ Valyavombile uluo kukila vule tulyale tuhuviila. vakitavwile taasi kwa Mutwa, neke vakitavula vavuo kulyusue mu vughane vwa Nguluve. ⁶ Lino, tukampelepesia uTiito kuuti iise avatange kumala imbombo ijio, ulwakuva ghe juno akatengwile imbombo ijio kulyumue. ⁷ Ndavule muli vamofu mu sooni - mu lwitiko, mukipelua ikya kupulisia, mu vukagusi, kughimba, paliimo na mulughano lwinu kulyusue. Lino muvisaghe vamofu na mu mbombo iji ija kuvatanga avange. ⁸ Pano nijova isi nakwekuuti nilonda kukuvumulisia, ulwene nikuvavuula imhola isa vange ndavule vighimba, kange nilonda kulola ulughano lwinu ndave lwa kyang'haani. ⁹ Ulwakuva umue mukagwile vule uMutwa ghwitu u Teesu Kilisite alyavasungukile, na pano alyale mmhofu, akiviika n'kotofu vwimilaumue. Neke mu vukotofu vwake, umue muuve vamofu. ¹⁰ Lino, vwimila imhola iji nikuvavuula luno lunoghiile kulyumue umwaka ghuno ghwakila, namwakela kutengula kuvomba lumonga. u lwene mwava munoghelua kuvomba. ¹¹ Lino ndavule . Mukaale mu noghelua fiijo kuvomba uluo ye mutengula, mumale imbombo ijio. ¹² Ulwakuva muli nu vunoghelua vwa kuvomba imbombo iji, uluo lunofu kange lukwitikisivua. Neke lelo luvisaghe mulwa fino umuunhu alinafyo nakwekuti fino naalinafyo. ¹³ Uvufumbue vwa mbombo iji, nakwekuuti umue mudujue nu n'sigho ughwa kutanga avange.Neke aveene vavisaghe kwaki, ulwene tulonda mulig'hanaghe. ¹⁴ Un'siki ughu pano mulinifiinu finga.Muvatangaghe vano navali nafyo neke voope pano viliiva ni fiinu finga vilikuvatangagha umue, mu uluo muuva muling'hiine. ¹⁵ Ulu luli ndavule lulembilue," juno alinafyo finga, naakale ni fya kisighala, kange juno akale nafyo fidebe naakaghilue.'' ¹⁶ Nikumwongesia u Nguluve juno ampeliile uTiito umwojo ughwa kuhimba kukuvatanga umue, ndavule nili naghwo une. ¹⁷ Nakwekuti ye tukun'suma akakundile lwene, mu uluo ghwope akale nu vusyukue uvwa kwisa kukuvatanga. Akisile kulyumue nu vughane vwake jujuo. ¹⁸ Tukunsung'ha nu nyalukolo ghwitu ujunge juno ifipugha ifya vitiki fikumughinia mu mbombo ija kupulisia imhola inofu. ¹⁹ Nalwe lululuo lwene, looli kange ifipugha ifya vitiki fikansalwile unyalukolo ghwitu ujuo kuuti avisaghe palikimo nusue pano tutwala ulutango ku vaanhu. Imbombo ijio, jikumughinia uMutwa, kange jihufia vule tuhimba kukuvatanga avange. ²⁰ Natulonda tupikwaghe nu muunhu ghweni vwimila usue nambe ni mbombo jino tuvomba. ²¹ Tukulolelela fiijo kuvomba vunono, nakwekuti pa maaso gha Mutwa lwene, looli na pa maaso gha vaanhu. ²² Kange tukunsung'ha unyalukolo ghwitu ujunga aave palikimo navuo. Ke kinga tumwaghile kuuti ali ni kivavilisi kuvomba imbombo nyinga. Nambe lino alinikivavilisi fiijo ulwakuva ikuvahuviila umue. ²³ Lino nave umuunhu ilonda kukagula imhola sa Tiito, uju m'bomb mbombo n'jaango mulwa kuvatnaga umue. Neke nave ilinda kukagula imhola sa vange, avuo vanyalukolo vittu, vasung'hilue ni fipugha fya vitiki. Voope vukumughinia ukilisite. ²⁴ Lino, muvahufyaghe avaanhu avuo ulughano lwinu, neke ifipugha ifya vitiki fikagule kuuti sino tukughinia vwimila ume se seene.