¹ Lino ku mhola,ja kavalilo nu n'siki vanyalukolo, mulivasila vufumbue ku kinu kyokyoni kilembue kulyumue. ² Ulwakuva jumue mukagula muvunono kyongo kuti ikighono kya Mutwa kikwisa hene mulyasi panoikwisa pakilo. ³ Pala panoviti ''lutengano nu vuloleli'',pepano uvunangifu vwavukuvisila kukenyemukila. vuhene vuvafi vunovukumwisila umwakimama unya vukunue. Navalapunga kusila jojoni. ⁴ Neke umue,vanylukolo namulikung'isi nambe ikighono kila kilingise hene mulyasi. ⁵ Ulwakuva umue mweni mulivana va lumuli na vana va mwisi. usue natulivana vapakilo au vang'isi. ⁶ Lino natungaghonelelaghe ndavule avange finovighonelela. Pe tukeshaghe na piva vafwighu. ⁷ lwakuva vanovighona vighona pakilo na vanovighala vighala pakilo. ⁸ Ulwakuva usue tulivana va mwisi, tuvisaghe vafwighu. Tufwalaghe ingula ja lwitiko nulughano, ni kofila ja kyuma, jino je kyang'ani ja vupoki vwa n'siki ghunoghukwisa. ⁹ lwakuva u Nguluve nalyatusalwile muvutengulilo/muvwasio vwa ng'alasi, looli kupelue uvupoki musila ja Mutwa Yesu Kilisite. ¹⁰ Umwene ghwejuno alyatufwilile neke kuti, tungave maso au tughonelile, tulikukala palikimo nu mwene. ¹¹ Looli munyamasaniaghe na kukangasania jumue, ndavule tayale muvomba. ¹² Vanyalukolo, tukuvasuma muvakagule vala vanovivomba n'kate jinu navala vano valinkyanya jinu vikuvalongosia mwa Mutwa na vala vano vikuvaghigha. ¹³ Tukuvasuma kange muvakagule na kukupvapela uvwoghofua mulughano lwa mbombo javo. muve nulutengano n'kate jinu nujue. ¹⁴ Tukuvasuma vanyalukolo: muvavungaghe vanonaviluta muvutavike, muvakangasiaghe inmbula vanovasukunile, muvatangaghe vano vavotevote kange muve nulugudo ku voni. ¹⁵ Mulolaghe napweangavisaghe umunhu ghwoghwoni junoihomba uvuvivi kuvuvivi kwa munhu ghwoghwoni, muvombaghe ghano manono kulyumue mweni nakuvanhu voni. ¹⁶ Muhovokaghe ifighono fyoni. ¹⁷ Musumaghe kisila kudugha. ¹⁸ Mumuhongesiaghe uNguluve ku lyolyoni, lwakuva uluo lwelughano lwa Nguluve kulyumue mwa Yesu Kilisite/ ¹⁹ Namungan'simiaghe umhepo. ²⁰ Namungavubedaghe uvuvili. ²¹ Ughesiaghe imbombo soni, mukologhe lino linofu. ²² Museghukaghe ghoni ghanoghivonekela muvuhosi. ²³ U Nguluve ghwa lutengano avanyilisiaghe muvwimike. Umhepo, uluvelo num'bili mulwakwisa kwa mwene uMutwa ghwitu u Yesu kilisite. ²⁴ Umwene junoavakemelile mugholofu, umwene wenyakuvomba. ²⁵ Vanyalukolo mutusumilaghe kange. ²⁶ Muvahungilaghe avanyalukolo voni mulunonelo ulwimike. ²⁷ Nikuvasuma mwa Mutwa kuti ikalata iji jimbwaghe kuvanyalukolo voni. ²⁸ Ulusungu lwa Mutwa ghwitu u Yesu Kilisite luvisaghe palikimo numue.