¹ Petro na Yohana baliko bagenda kwikanisa kusenga isaha mwenda. ² Halu muntu yamugaye kuva akivuka bala mutelula kila musi baka mudyamika kumudyango wi kanisa witwa dyiza kugila asege abantu bingila mwikanisa. ³ Abonye Petro na Yohana begeye kwingila mwikanisa ya baseze bamuhe. ⁴ Petro amuhanga amaso hamwe na Yohana alamubwila tulabe twebwe. ⁵ Ikimuga kila balaba kilegeleje kulonka ikintu kuva kuli bene. ⁶ Aliko Petro avuga, "Amahela ni zahabu njewe simfihse aliko cho mfishe ndakuha mwizina dya Yesu Klisto wa Nazareti tambula." ⁷ Petro amufata ukuboko kwiwe kuburyo, alamuhagulucha, ahonyene amagulu yiwe ni ngingo za magufa yiwe bicha bila lonka inguvu. ⁸ Ala simba hejuru, umuntu wikimuga yala hagaze atangula kutambula acha yingila mwikanisa hamwe na Petro na Yohana, atambula asimba ashimila Imana. ⁹ Abantu bose babonye atambula ashimila Imana. ¹⁰ Bacha bala menya yuko yali wa muntu yikala kumunyango dyiza wikanisa asega balumigwa balatangala kubela kidya kibaye kuliwe. ¹¹ Uko yali yafashe Petro na Yohana abantu bose hamwe bilukila munyindinzu yitwa ya Suleimani, batangaye chane. ¹² Petro abonye ivyo, wene alishula abantu, "mwebwe bantu ba Israeli, ni kuki mutangala? Ni kubeliki mutuhanga amaso nkiko twebwe alitwe twatumye uyu atambula kunguvu zachu au Ubutakatifu bwachu?" ¹³ Imana ya Ibrahimu, niya Isaka nya Yakobo yaba Daha bachu, yashimagije umukozi wayo Yesu. Uyu niwe mwatanze Mula mwihakana imbele ya Maso pilato, niho wene yali yamuwe kumulekula. ¹⁴ Mwanse umutakatifu kandi mugololochi hunyuma yaho musega abalekulile umwichanyi. ¹⁵ Mwebe mwalishe umwami wubu zima wimana yazuye kuva mubapfuye twebwe tulivyabona kwiyo. Kukwizera mwizina dyiwe, uyu muntu mubona mumenya, yahawe inguvu. ¹⁶ Kukwizera kuhitila kuli Yesu kwa muhaye wene ubuzima bukwiye imbele yanyu mwese. ¹⁷ None bagenzi ndamenya yuko mwakoze kubufela, iko kandi bakoze abatwazi banyu. ¹⁸ Aliko ibintu vyi Mana yaba bwiye kela kuminwa ya bavugishwa bose, yuko uyo Klisto aloteseka, none yabosohoje. ¹⁹ None ubu, mwihane muhindukile, kugila ngo ivyaha vyanyu biveho kabisa kugila haze ikihe cho kunezegwa kukuza kumwami. ²⁰ Kugila ashobole kumutima Klisto yamaze kushigwaho kubela mwebwe Yesu. ²¹ Wene niwe alilazima ijuru limwakile mpaka kushicha ikihe bilogaluzwa ibintu vyose, Imana yavuze kuva kela kuminwa ya bavugishwa batakatifu. ²² Ukuli Musa yalavuze, "Umwami Imana lilo hagulucha umuvugishwa nkange kuva mulibene wanyu. Mulo mwumviliza kila kintu alobabwila mwebwe. ²³ Hazogelaho kila muntu atumviliza uyo muvugishwa uyo azolandugwa kabisa avehagati ya bantu. ²⁴ Abavugishwa bose kuhela kuli Samweli na badya bakulikiye hanyuma yiwe balavuze batangaza izi misi. ²⁵ Namwe mulabana babavugishwa na bisezelano Imana yakoze hawa na bababu, nkiko yavuze na Abrahamu kumbuto yawe imidyango yose yo musi izohezagigwa. ²⁶ Imana imaze kuhagalicha umukozi wayo bwambele ya mutumye iwanyu kugila abahezagile mwebwe kukuhindukila muve mububi bwanyu.