¹ Upaulo nu Timotheo, avatumishi va Kristo Yesu, Kwa vala vabagulwa kushilila Ukristo vini vikhala ku Filipi, pamoja na valelelaji na mashemasi. ² Ineema na ive kunyenyu ni amani yiniyihuma kwa Nguluvi Wihesu wesu nu Mtwa wesu u Yesu Kristo. ³ Nihonjesa kwa Nguluvi wangu shila pini nikivasukwa omwe wona. ⁴ Shila mara mu shila ombi lyangu kwa ajili yenyu omwe wona, niva nishendevile pini nikivalombela. ⁵ Nina luhonjeso sana kwa kiva ya uungani wenyu mu mola kihuma uliusiku lwa kwansa mpakha ineng'uni. ⁶ Nina uhakika kija umwene mwini wayansinsaga insengo inofu mukhati yenyu akhayendelela kuikhamilisa mpakha ulusiku lwa Mtwa u Yesu Kristo. ⁷ Yili sawa kunyangu kuipulikha ndeni kihusu omwe wona kwa kiva nivavishile mu numbula yangu. Maana omwe mwava vashirika vayangu mu neema ya shipinyo shangu na mu utetezi nu uthibitishaji wangu wa mola. ⁸ Unguluvi yu shahidi wangu, shini nina shauku kunyenyu wona katika uukhati wa ugani wa Kristo Yesu. ⁹ Na nilomba kija: uugani wenyu wuyonjelele mandu na mandu mu maarifa nu luhala lona. ¹⁰ Nilomba kwa ajili ya hili ili muve nu uweso wa kipima na kihagula amambo gini manofu sana. Khanji nikivalombela ili muve vasafi bila kiva nilikhosa lyolyona ku lusiku lwa Kristo. ¹¹ Na khanji ili mumemesewe ni litunda lya haki lini lipatinkhana kwa Yesu Kristo, kwa wutukufu ni sifa ya Nguluvi. ¹² Ino vakhlo lwangu, nisikula mumanye kija, amajowo gini gahimilila kunyangu gaifanya imola yuiyendelele mandu. ¹³ Ndiyo maana ifipinyo fyangu kushilikla u Kristo, fyamanyikha kwa valinzi vapa utwa wona na kwa shila munu khanji. ¹⁴ Na vanyalukholo vinji kwa Mtwa, kwa kiva ya fipinyo fyangu, vashawishikha na kijesa kililogola Iliswi bila kitila. ¹⁵ Vamonga kweli hata vikimtangasa u Kristo kwa fitina nu ukholofi, na khanji avamonga kwa mahiva manofu. ¹⁶ Vala vini vikimutangasa u Kristo kwa ugani vamenye kija nivishile panu kwa ajili ya utetelaji wa mola. ¹⁷ Khanji avamonga vikimutangasa Ukristo kwa ubinafsi na mahiva mavi. vihiva kija visababisha amatatiso kunyangu mu mumanyololo gangu. ¹⁸ Kwa hiyo? Nisihiva, hata insila yive ya hila au kwa ukweli, Ukristo itangaswa, na kushilila ili nishendeva! Ndiyo, nikhashendeva. ¹⁹ kwa kiva nimenye kija ila likhaleta kudindulilwa kunyangu. Ilijowo ili likhatokela kwa sababu ya maombi genyu na kwa msaada gwa Numbula ya Yesu Kristo. ²⁰ Kilingana na mahiva gangu ga uhakika nu ukweli ni kija, nisikhawona nsoni. Badala yakwe, kwa ukhangafu wona, ngaja shina insiku sona ni isalisi, nihivilila kija Ukristo akhayinuliwa mu mvili gwangu, hata ive mu usima na mu mufwa. ²¹ Kwa maana kunyangu one, kikhala yu Kristo na kifwa ni faida. ²² Lakini, nda kikhala kwa mvili kwisava ilitunda mu nsengo yangu, kwa hiyo nisiyelewa lilikwi lya kihagula. ²³ Maana nibunkhwa mandu na mahiva aga gavili. Nina hamu ya kugulekha umuvili na kiva pamo nu Kristo, ishinu shina sha maana mandu. ²⁴ Kwa kiva, kisigala mu mvili ugu ni lujowo lwa maana mandu kwa ajili yenyu. ²⁵ Kwa kiva nina uhakika kihusu ili, nimenye nikhasigala na kuyendelela kiva pamo nomwe wona, kwa ajili ya maendeleo nu ushendefu wa lihuvi lyenyu. ²⁶ Na iyi ikhaleta ulushendefu lwenyu lukhome kushilila Ukristo Yesu, kwa sababu yangu ikhayonjelela, kwa sababu ya ukhalo wangu papamo nomwe. ²⁷ Msakulwa kikhala amakhalo genyu mu lujendo lunofu wini wusakulwa mu mola ya Kristo. gahi ndeno ili pini nikhayinsa kivaga na pini nisikhayinsa, nipulishe kina muyimile kwa ukhangafu kwa numhula yimo. nidobokha kipulikha kija muli numbula yimo, mkiikhasanila ilihuvi lya mola kwa pamo. ²⁸ Na msikhatisiwagwa ni shinu shoshona shini shisengwa na maadui venyu. iyi kunyanave ni ishara ya unangaji. Ili kunyenyu ni ishara ya ukulusaji kihuma kwa Nguluvi. ²⁹ Kwa kiva omwe mwapelwa kwa ajili ya Kristo, siyo kumuyamini tu, ili na kilavisiwa khanji kushilila umwene. ³⁰ Kwa kiva muna lwowo lilila ngaja lini mwalyagaga kunyangu na mupulikha kija mnawo mpakha isalisi.