¹ Baada ya Yesu kilogola amajowo aga, wawukhaga na vanafunsi vakwe kiluta ibonde lya Kidron, kwini kukhandi ni bustani, kwini umwene na vanafunsi vakwe vayinjilaga mukhati yakwe. ² Ino yula Uyuda, mwini akhandi isakula kimusetukha, numwene walimanyaga ilieneo ilyo, kwa kiva Uyesu akhandi iluta umuda gumonga pini ali na vanafunsi vakwe. ³ Numwene Uyuda, baada ya kiva wapata ishipuga sha vasulukhali na maofisa kihuma kwa vakhome va makuhani, vayinsaga kuno vali ni tala, ikurunzi ni silaha. ⁴ Numwene Uyesu, kuno amenye shila shinu shini shikhandi shisenjekha kihusu umwene, waiwonensaga pamwandi na wavaposa, ''Yu nanimwini mukimusakula? ⁵ Navene vajibu, ''Uyesu Mnazareth.'' Uyesu wavajovel, ''One ndiye'' Numwene Uyuda mwini wamusetukhaga, akhandi ayimile bahamo na vala avasulukhali. ⁶ Bahene pini wavajovelaga, ''One ndiye.'' vatinaga munyuma na kigwa pansi. ⁷ Khanji wawaposaga khanji, ''Yu nani mwini mukimusakula? Navene vajibu khanji ''Uyesu mnazareth.'' ⁸ Uyesu wavajivu, ''Sha tayari navajovela kija One ndiye; ino nda mukinisakula one, valeshi ava avanji valute.'' ⁹ Aga gakhandi ndeno ili lila iliswi litimile; pala pini wajovaga; ''Ku vala vini wanipela, nisikhamuyasise hata yumo.'' ¹⁰ Bahene Usimon Petro, mwini akhandi nuupanga, waufutaga na kimudumula ilikutu lya kulia umtumishi wa Kuhani mukhome. Nilitawa lyakwe umtumishi yula likhandi Malko. ¹¹ Uyesu wamujovela Upetro, ''Tiniya uupanga wakho ku luvishilo lyakwe. Kwanshi nileshe kushing'wela ishikhombe shila shini wanipela Ubaba?'' ¹² Basi shila ishipuga sha musulukhali nu jemedari, na vatumishi va Vayahudi, vamukhataga Uyesu na kimupinya. ¹³ Navene vamulongosaga tangusina mpakha ku Anasa, kwa kiva umwene akhandi mkwe wakwe wa Kayafa, mwini ndiyo akhandi Kuhani mukhome kwa mwakha ugo. ¹⁴ Isalisi Ukayafa ndiyo mwini akhandi wavapela uushauri wa Vayahudi ya kija yamupasa umunu yumo afwe kwa ajili wa vanu. ¹⁵ Usimon Petro wamufwataga Uyesu, na shisho umwanafunsi uyunji. Nu yula umwanfunsi akhandi imanyikha kwa kuhani mukhome, numwene wayinjilaga bahamo nu Yesu ku behewa lya Kuhani mukhome; ¹⁶ lakini Upetro akhandi ayimile kunja ya mlyango. Ino yula umwanafunsi mwini akhandi imanyikha kwa kuhani mukhome, wapolaga kunja walutaga kilogola nu yula umudala umtumishi mwini akhandi ilinda umulyango na kimuyinjisa Upetro mukhati. ¹⁷ Basi yula umufanyakasi mwini akhandi ilinda umulyango, wamujovelaga Upetro, ''Wuli owe usi yumo wa vafuasi va huyu umunu?'' Numwene wajovaga, ''One siyo.'' ¹⁸ Na vala avatumishi na vakhome vakhandi vayimile amahala pala; vapembile umoto kwa kiva, kukhandi ni mepo, na vakhandi viyota umoto ili kipata ijoto. Numwene Upetro akhandi nawo, iyota umoto kuno ayimile. ¹⁹ Ukuhani mukhome wamuposaga Uyesu kihusu avanafunsi vakwe na mafundiso gakwe. ²⁰ Uyesu wajibu, ''Naujovela pavalafu uwulimwengu; One nafundisaga mara kwa mara mumasinagogi na muhekalu amahala pini avayahudi vitanganaga. Nayune nisikhalogwele lyolyona kwa kuifiha. ²¹ Kwa nshii mwaniposaga? Vaposa vini vanipulisaga kihusu shila shini nalogolaga. Ava avanu vamenye amajowo gala gini nagalogolaga ²² Uyesu pini wamalaga kija ndeno, yumo wa vakhome mwini akhandi ayimile wamutovaga Uyesu kwa liwokho lyakwe na bahene kija, ''Wuli, ndeno ndiyo shini wupaswa kumujibu ukuhani mukhome?'' ²³ Numwene Uyesu wamujibu, ''Nda nalogola ulujowo lolona luvi basi uve shahidi kwa ajili ya uvi, na nda nalogola unofu kwanshi kunikunikhana? ²⁴ Bahene Uanasi pini wamutwalaga Uyesu kwa Kayafa ukuhani mukhome kuno apinyilwe. ²⁵ Ino Usimoni Petro akhandi ayimile akiipela ijoto yumwene. Bahene vala avanu vamujovela. ''Wuli, owe newe si uli yumo wa vanafunsi vakwe?'' Wakhana ija ''Nisili one.'' ²⁶ Yumo wa vatumishi va kuhani mukhome, mwini akhandi munyalukholo wamyula umugosi mwini Upetro wamukhataga ilikutu, wajivaga, ''Wuli usili owe mwini nakwaga numwene kula kubustani?'' ²⁷ Upetro wakhana khanji, na baho Injogolo yavikha. ²⁸ Bahene vamutola Uyesu kihuma kwa Kayafa mpakha ku Praitorio. Yikhandi asubuhi na mapema. Avene vavene vasikhayinjile yila Ipraitorio ili kija vasikhananjikhaga na kiilya ipasakha. ²⁹ Bahene Upilato wavalutila ija, ''Lisitakha lishi lini likimuhusu uyu umunu?'' ³⁰ Vamujibu na kumujovela, ''Nda umunu uyu wa ave asili musenga mavi, nda tisamuleta kunyakho.'' ³¹ Upilato wavajovela, ''Mutoli omwe yumwe, mumuhije kilingana ni sheriya yenyu.'' Navene Avayahudi vamujovela, ''Isheriya yisikitiyitikha ose kimubuda umunu yeyona.'' ³² Valogolaga aga ili iliswi lya Yesu litimilishe, iliswi lini akhandi sha tayari walogola kihusu iaina ya nfwa yakwe. ³³ Basi Upilato wahulutaga khanji Kupraitorio wamushemela Uyesu; wamujovela, ''Wuli, owe uli mfalme wa Vayahudi?'' ³⁴ Uyesu wajibu, ''Wuli, owe ukiniposa iliswali ili kwa Kiva wusakula kimanya au kwa kiva avanji vakufilikha ili unipose one?'' ³⁵ Numwene Upilato wajibu, ''One nisili Muyahudi, au yisili ndeno?''Itaifa lyakho nu kuhani mukhome ndio vakuleta kunyangu; owe wagaha nshii? ³⁶ Uyesu wajibu; ''Uufalme wangu asili wa wulimwengu uwu, nda umufalme wangu wa uve ni sehemu kuulimwengu uwu avafilikhwa vinji nda vaivalava ili nisikhahumisiwagwa kwa vayahudi. Kwa kweli uutwa wangu wusihuma panu'' ³⁷ Basi Upilato wamujovelaga, ''Wuli, owe basi uli mfalme?'' Uyesu wajibu, ''owe ndiyo shini wija kija one nili mfalme, Kwa sababu iyi one nayinsa kuwulimwengu ili nive shahidi wa yila ikweli. Yeyona mwini ali wa hiyo ikweli asikiipulisa ishauti yangu. ³⁸ Upilato wamujovela, ''Ikweli ndiyo nshii?'' Numwene pini wamalaga kijova aga waluta kwa Vayahudi na kivajovela ''Nisikilwaga kulyolyona umunu uyu. ³⁹ Omwe muna utamaduni wini ukinigaha nimudindulile umfungwa yumo uluhavi lwa Pasakha. Wuli musakula nimudindulile umfalme wa vayahudi.'' ⁴⁰ Bahene vatovaga ilyowo vija, siyo uyu, tidindulila Baraba.'' Numwene Ubaraba akhandi mupokhaji.