¹ Uyesu wagalogolaga amajowo aga; bahene wayinulaga ameho gakwe kilolela kushanya na waja, ''Baba, ilisala lwafikha; mtukusa umwanakho ili nu mwana nayumwene akutukuse owe- ² ngaja ndenela shini wamupela amamulakha ku fyona ifinya muvili ili avapele uusima wa shiluta vala wona vini wamupela. ³ Uwu ndiyo usima wa shiluta: kija vakumanye owe, Unguluvi wa kweli na mwini uli mwene, numwene mwini wamufilikha, Uyesu Kristo. ⁴ Nakutukusaga hapa padunia, na kuimala insengo yini wanipela niisenje. ⁵ Ino, Baba, unitukuse one bahamo nowe yumwe kwa uwutukufu wula wini nikhandi nawo bahamo nowe khabla ya uwulimwengu kuwumbwa. ⁶ Nalifufulaga ilitawa lyakho kwa vanu vini wanipelaga padunia. Vakhandi vanu vakho; lakini wanipelaga one. navene valikhata iliswi lyakho. ⁷ Isalisi vamanya kija shila shinu shini wanipela shihuma kunyakho, ⁸ kwa majowo gala gini wanipela one-- Sha navapela avene amajowo ago. Vagaposhelaga na kweli vamanyaga ya kija one nahuma kunyakho, na vayaminigi kija owe ndiyo mwini wanifilikha. ⁹ Nikivalombela avene. Nisikiulombela uwulimwengu ila vala vini wanipela kwa kiva avene vali vakunyakho. ¹⁰ Ifinu fyona fini fili fyangu fili fya kunyakho, na fila fini unafyo owe nayune fyangu; nayune ambi nikikutukusa kuifyo. ¹¹ One nikusina khanji kuulimwengu, ila avene vakwali kuulimwengu, nayune isalisi niyinsa kunyakho. Baba Mtakhatifu, vatunsa kwa litawa lyakho lila lini wanipela one ili avene vave nuumoja, ngaja shina one na yuwe shini tina umoja. ¹² Pini nikhandi nawo, navalindaga kwa litawa lini wanipela; Navalindaga, na kusina hata yumo wanave mwini wayagaga isipokiva umwana wa kiyaga, ili kija amaandikho gatimile. ¹³ Ino niyinsa kunyakho; lakini nilogola aga kuwulimwengu ili kija uushendefu wangu wukhamiliswe mukhati yanave vavene. ¹⁴ Navapela iliswi lyakho; uwulimwengu wavakhalalila kwa kiva avene vasili va wulimwengu, ngaja ndenela one shini nisili wa wulimwengu ¹⁵ Nisikivalombela kija uvahumye kuwulimwengu ila uvalinde nu yula umuvi. ¹⁶ Avene vasili va nyii ngaja ndenela one shini nisili wa wulimwengu. ¹⁷ Uvavishe wakfu kunyakho yuwe ku kweli; iliswi lyakhi ndiyo kweli. ¹⁸ Wanifilikhaga kuwulimwengu, nayune navafilikha kuwulimwengu. ¹⁹ Kwa ajili yanave one yune niihumya kunyakho ili kija na vene vaihumye kunyakho kwa yila ikweli. ²⁰ Sio ava tu vini nikivalombela,ila na vala vini ambi viyamini kishilila iliswi lyanave ²¹ ili kija avene navene vave nuumoja, ngaja ndenela owe Baba, shini uli mukhati yangu nayune mukhati yakho. Nikivalombela ili kija navene wope vawese kiva mukhati yesu ili uwulimwengu wuwese kiyamini kija owe ndiyo mwini wanifilikha. ²² Uwutukufu wula wini wanipela one - navapela avene, ili kija vawese kiva nuumoja, ngaja ndenela ose shini tili umoja - ²³ One mukhati yanave, nowe mukhati yangu, ili vawese kikhamiliswa kuumoja; ili uwulimwengu umanye kija hakika owe ndiyo mwini wanifilikha, na kivagana, ngaja ndenela owe shini wanidobokhaga, one. ²⁴ Baba, shila shini wanipela one - Nidobokha kija navene vope vawese kiva bahamo none amahala pini nikwali ili vawee kiwaga uutukufu wangu, wula wini wanipela: kwa kiva owe wanidobokhaga one khabla ya kiwumbwa kwa misingi ga wulimwengu. ²⁵ Ubaba umunya haki, uwulimwengu wusikhakumenye owe, lakini one nikumenye owe; na vamenye kija wanifilikhaga. ²⁶ Nalisengaga ilitawa lyakho limanyishe kunyanave, na nikhaligaha limanyishe ili kija wula uugani wini kwa uwo waniganaga one wuwese kiva mukhati yanave, nayune niwese kiva mukhati yanave.''