¹ Eishi hweigo eimbasunda, mwaholo, huwusajilo zyakwe Oungouloubhei, gafumii amabeilei geinyu gabhe dhabihu yeili nyoumi, eimpepo humwoyo yeposhelelwa hwa Ngouloubhe. Einei ibada yenyu eiyei lyoli. ² Wala mugajehwazizye amambo geipa pansi eipa, huje tigaluzanyiwe abheihwe bhapya einseibho zyetu. Bhombaji eishi muposhele amanye oulugano lwa Ngouloubhe gagali miza, gagahukhodela na humalishilo. ³ Eshi eyanga, hwusababu yewene yepebhilwe, huje kila muntu wahweli pandwemo namwe sahwaziwa asebhe natele humwanya yakwe yuyo ashile sashihwaziwa asebhe. Huje, hahahwaziwa asebhaje hwunshinshi huje nashi Ongolobhe abhapiye kila omo hashe ahantu hee lweteho. ⁴ Hwa huje tine vintu vinji ashilile mbele gumo, lakini sevintu vyoti vine mbombo emo. ⁵ Shesho ate, tetilibhinji tilibele gumo ashilile uKilisiti, na evikhatazizyo kila omo hwawa mwabho. ⁶ Tiline kalama zyezili mjinjinyinji hwuwene yetipewilwe. Kebhabhe kalama eyamuntu okuwa, na ebhombeshe hwuwezo gwe lweteho lwakwe. ⁷ Kebhabhe ekalama ya muntu huduma, na abhombaje. Nkebhahe owenje ane kalama eyafundizye, hwa huje afudizyaje. ⁸ Nkebhabhe kalama eyamuntu falaja, hwa huje, abhafaliji. Nkebhabhe kalama eyamuntu hufumwe, abhombaje esho humwoyo gwoti. Nkebhabhe kalama ya muntu hulongozye, nalibhobheshe huwinza. Nkebhabhe ekalama ya mntu hubhoneshe esajilo, na ebhombeshe huhuseshelelo. ⁹ Aganane husibhe hwilenga. Vitwaji embibhi; mnkhatilile aminza. ¹⁰ Ahusu aganane hwaholo, mgananaje mwemwe hwa mwemwe. Ahusu nshinshi, enshinshi ebhehulimwe hwa hulimwe mubhene. ¹¹ Ahusu ubhomvi, mganjebhe bhayuzu. Ahusu ompepo, mbhanje muhusogwa. Ahusu Ogosi, hwitumaji. ¹² Shanji hwidandi lyamlinalyo ahusu ensiku zyezihwenza. Mubhe nagolele ashilile amayemba genyu. Mkhalaje apuute. ¹³ Mubhavaje ashile amashida agalokole. Azaji idala elya bhoneshe oluganano. ¹⁴ Bhalabhilaji aminza woti bhabha bhayevya amwe; mubhaputilaye aminza na mgaje bhaputile alogwe. ¹⁵ Shanji pandwemo nabhabha shaa, lilaji pandwemo nabhabha lila. ¹⁶ Mubhe nesebho zimo mwemwe hwa mwemwe mgajesebhe hwa hwilole, lakini bhetehaji abhantu abhehali eyapansi. Mubhanje nenshinshi humwanya yesebho zyenyu mbhene. ¹⁷ Msihusovye omuntu wowoti ibhibhi hwi bhibhi. Bhombaji aminza humaso gabhantu bhoti. ¹⁸ Nkashile ewezehana, nashi sashibhe shelwe hulimwi, mubhe neluseshele nabhantu bhoti. ¹⁹ Bheluganano, ugajelipizye eshisasi umwene, lakini ileshi ehasila ya Ngolobhe. Huje eyandihwe, "'eshisasi sha Ngolobhe; Nene embasombe,' ayanga Ugosi." ²⁰ "Lakini nkashile obhibhi waho ane zala, pele. Nkashile ayomele, mwelezye. Huje nkobhombo esho, ubhahumwoholele amakala age mwoto amwanya yitwe lyakwe." ²¹ Ogaje mwemwe nuubhibhi, heli oumene au bhibhi hwuminza.