¹ Hu uzi ula wa buluu ne sufu ye rangi ye zambarau ne shitambala she rangi ensamwamu ye kochinili bhahatabha amenda wha bhomvi wa pala pa ngolobhe. Bhahatabha amenda aminza ga Aruni, neshi oYahweh yabholele oMusa. ² Ahabheha enaivera ye dhahabu, ouzi we buluu ne sufu ye rangi ye zambarau ne shitambala eshi shamwamu she kochinili ne kitani enyinza eya shonwe/entabhe. ³ Bhahalenganya amabamba ge dhahabu gabhe manyela, wape ahabhola owuzi wa tabhe pandwemo no ula we buluu ne sufu ye zambarau na shila eshitambala eshishamwamu she kochinili ne kitani enyinza, neshi embombo ya zenje. ⁴ Bhahalenganyizya evipande vya mshipongo vyavikhatene. Yaghatene mmiisho gakwe gabhele. ⁵ Gwope omshipi, gwahali pamwanya yakwe aifunje, wahali we shitambala shashila alengane no lenganyo wakwe, ne dhahabu, o uzi we buluu, ne sufu ye rangi ye zambarau ne shitambala eshelangi enshamwamu ne kochinili ne kitani enyinza yatabhe, neshi oYahweh shabholele oMusa. ⁶ Bhahalenganya amawe ge shohamu gabhehwele shinza mmapambo ge dhahabu, gachongwilwe humicholo ge muhuli alengane na matawa gabhe Israeli. ⁷ O Bezaleli ahabheha mvipande mshipungo vye naivera gabhe mawe gakombohwe hu bhana bhe Israeli, neshi oYehova shalajizizye oMusa. ⁸ Ahalenganya afuko hapashifubha hu mbombo yazenje, neshi ula we mbombo ye naivera, ne dhahabu, ouzi we buluu ne sufu ye rangi ye zambarau ne shitambala eshi shamwamu she kochinili ne kitani tabhe. ⁹ Shahalengane hwonti pashahali shipinta. Bhahalenganya afuko hapashifubha, pashipintwa, eshiburi emo otali wakwe ne shubiri emo ovilima wakwe. ¹⁰ Bhahashimenya amastali gane ge mawe. Ostari owe zabarijadi, topazi ne zumaridi wahali wa kwanza. ¹¹ Ositali gwa bhele wahali feruzi, yakuti ne yaspi. ¹² Wope ositali wa tatu gwahali liwe lye leshemi, eakiki ne amethisti. ¹³ Gwope ositali gwa une gwahali krisolito ne shohamu ne yashefi. Gabhehwehwe mmapambo ge dhahabu esehe ela. ¹⁴ Na mawe ego gahali alengane na matawa gabhana abhahu Israeli. Gahal kumi na mbili alengane na matawa gabho, humichango ge muhuli, ola muntu alengane ni tawa lyakwe hu gala amakabela kumi na mbili. ¹⁵ Bhope bhahalenganya aminyololo gagali na mashada pamwanya pafuko hapashifubha, osokoto/otabhilo we kamba, we dhahabu enyinza. ¹⁶ Bhahalenganya amapambo gabhele ge dhahabu ne pete zibhele zye dhahabu na bheshe ezyo epete zibhele mgala amiisho gabhele ga shila eshifuko sha pashifubha. ¹⁷ Baada yelyo bhahashizya zila ekamba zibhele zye dhahabu mwa zila epete zibhele zyazili mmiisho gafuko hapashifubha. ¹⁸ Bhope bhahashizya gala amiisho gabhele ge kamba zibhele mgala amapambo gabhele, Alafu bhahabheha mwanya mvipande vya mshiungo vyenaivera, hwitagalila lyakwe. ¹⁹ Esho bhahalenganya epete zibhele zye dhahabu na zibheshe mmiisho gabhele ga shila eshifuko shapashifubha mupinto wakwe wauli opande wela efodi opande wa muhati. ²⁰ Alafu bhahalenganya epete zibhele zye dhahabu na zibheshe pamwanya pa vipande vibhele vya mshipongo vye efodi opande wa pansi, hwitagalila, jilani na pakhomanila, pamwanya pa mshipi we naivera. ²¹ Hu mwisho bhahagalila eshifuko sha pashifubha ne pete zyakwe hupete zye efodi no uzi we buluu, ili zibhe pamwanya pa mshipi gwe efodi na hala afuko hapashifubha hasihwepe pamwanya pa efodi neshi oYahweh yalajizizye oMusa. ²² O Bezaleli ahalenganya ikoti lye naivera, lyonti lye uzi we zambarau, embombo ya watabha. ²³ Ne sehemu yeli wene ye lyo ikoti yahali pahati yakwe, neshi esehemu ye welele ye mwenda gwe chuma. Esehemu yayali pa welele yahali ne shenje aizyongole epande zyonti zigandezembushe. ²⁴ Alafu bhahalenganya amakomamanga mu pindo wikoti ge uzi we buluu ne sufu ye rangi ye zambarau neshi tambala she langi enshamwamu she kochinili, vyavyalabhilwe pandwemo. ²⁵ Bhahalenganya amajomvu zye dhahabu enyinza nazibheshe amajomvu ezyo pahati pamakomamanga hwi pinto lyo koti azyongole epande zyonti, pahati pa makomamanga; ²⁶ ijomvu ne komamanga, ijomvune kommanga hupinto wi koti azyongole epande zyonti, kwa ajili yabhombe, shila oYahweh yalajizizye oMusa. ²⁷ Bhahalenganya ekamba zye kitani enyinza, zya Haruni na bhana bhakwe. ²⁸ Na shila eshilemba she kitani enyinza na gala amakwatilo ga hwitwe na mapambo ge kitani enyinza na zila esulubhale zye kitani eniza shashitabhilwe, ²⁹ na ula ukumbuu we kitani enyinza ya tabhe hu uzi we buluu, ne sufu ye rangi ye zambarau ne shitambala she langi enshamwamu ye kochinili, embombo ya watabha, shila oYahweh shabholele oMusa. ³⁰ Hu mwisho bhahalenga ibamba lyalihwahah/lipendezya, bhonesyo owinza owakfu, hu dhahabu enyinza na simbe pamwanya yakwe enongwa hu mchongo we muhuri: "Winza hwa Yahweh. " ³¹ Bhahabheha ouzi we buluu ili bhalibheshe pamwanya pashilemba. Shila oYahweh shajile bhombe oMusa. ³² Embombo yela emaskani yi hema lya khomanile yahafiha omwisho wakwe, maana abhana bhahu Israeli yahendelela abhomba shila Ongolobhe shayanjile no Musa. ³³ Bhope bhahatwala emaskani hwa Musa, lila ihema pandwemo ne vyelelo vyakwe vyonti, ekulabu zyakwe, eviunzi vyakwe vye mbabho, amakwi gakwe, ne nguzo zyakwe ne vikhalilo vyakwe, ³⁴ ne shigubiho shakwe she ngola zye ngole-endobhi zye langi enshamwamu ne shigubiho shakwe she ngola sheli ni pazia lyapafise, ³⁵ ni sanduku lye nongwa na makwi gakwe ni gubiho lyakwe. ³⁶ Bhahaleta emeza, evyelelo vyakw evyonti, ni bumunda lye wonyesho, ³⁷ shila eshinara she taa she dhahabu enyinza, etaa zyakwe, gula ositali gwe taa, ne vyelelo vyakwe na gala amafuta gawanzizye etaa, ³⁸ na madhabahu ye dhahabu na mafuta gagabhombela abheshe amafuta no uvumba waubhehwelwee manukato na shila eshafise huwinjililo wi hema, ³⁹ ela emadhabahu ye shaba na shila eshiunzi shakwe she shaba, amakwi gakwe ne vyelelo vyakwe vyonti, lila ibakuli ne shinala shakwe, ⁴⁰ Bhahatwala amapazia ge ua, enguzo zyakwe ne vikhalilo vyakwe na shila eshafise+ hu lyango gwe ua, empinyilo zyakwe zyi hema ne nsumali zyi hema ne vyelelo vyakwe vyonti hu bhomvi we khaya, hwi hema lya khomanile. ⁴¹ Bhahatwala gala amenda amatabhe abhombele embombo apinza pa Ngolobhe, gala amenda aminza ga Aruni okuhani na menda gabhana bhakwe gabhombele pabhali bhakuhani. ⁴² Alengane no Ngolobhe shayanjile no Musa, esho shabhabhombile embombo a Ngolobhe abhana bhe Israeli. ⁴³ Wape oMusa ahailola embombo yonti ela, na bhahali bhabombile shashila oYahweh shajile bhabhombe. Esho shabhabhombile. Esho oMusa ahabhalabhila aminza hwa Ngolobhe.