¹ Nkesho whayibha na amalumbano kati ya lume na bhabhala whibaraza, na bhamuzi bhabhahukumu, basi bhanzahuneshele ufinjele na humukumu umibhi. ² Nkesho unume watule awhanziwa akhomwe, basi umwamuzi anzahumombe agone pansi na khomwe whilongolela lyakwe huidadi yiyangilwe alengane ni kosa lyakwe. ³ Umwamuzi awezya hupele ihomo arobaini, lakini sagaawhanziwa afwemele iidadi eyo na hukhome hu homo iya mwawo hani, basi Umuisraeli awamwenyu ayibha asosezye whilongolela li maso genyu. ⁴ Sagauwhanziwa ahuyipinye indogobhi yaho impulo ni lomu lyayilima mugonda gwaho. ⁵ Nkesho ukaka bhakhala pamoja na weka wawo afwa bila abhe nu mwana, basi oshe wa malehemu sagaahanziwa awhegwe nu muntu hunze yi familia. Badala yakwe, ukaka wakwe wanume wakwe awhanziwa agone nawo na humweje abhe she wakwe natekelezye uwajibu wa kaka wa nume hu kwakwe. ⁶ Ene huje umwana wa whande wayipapwa apyana pansi yi tawa lya kaka wakwe unume wafwiye, ili itawa lyakwe lisateje mukasi yi Israeli. ⁷ Lakini nkesho unume sagawhanza humweje oshe wa kaka wakwe abhe wakwe, basi oshe wa kaka wakwe awhanziwa abhale panylango hadi whazehe na yanje, "Ukaka wa nume wane akhanile awhajibishe hu niaba litawa lya kaka wakwe amu Muisraeli; sagawhanza awombe uwajibu wa kaka wa nume wane". ⁸ Tena azehe bhi khaya yakwe bhahanziwa hu kwizye na yanje anawo. Lakini tiyanje abhasisitizye na yanje, "Sagaiwhanziwa humweje". ⁹ Basi oshe wa kaka wakwe awhanziwa ahwenze hu kwakwe whilongolela lya zehe, ahukole indara zyakwe mumanama gwakwe, na huswelele umaso. Ahanziwa ajibu na yanje, "Esho shesho shishiwombeha wha nume wasagawhanza azenje inyumba ya kaka wakwe". ¹⁰ Itawa lyakwe hu Israeli lyayikwiziwa, "Inyumba ya muntu wakolewelwe indala zyakwe". ¹¹ Nkesho alume bhakhomene bhewo kwa bhewo, nashe wa weka wawo ayenza hugombole unume dhidi yola wakhomile, nape agolosya inyobhe yakwe na huneme isehemu zi hoyi, ¹² basi uhanziwa huyiteme inyobhe yakwe; iliso lyaho sagaliwhanziwa abhe ni nkombo. ¹³ Sagauwhanziwa abhe ni mizani yi mwamu tofauti mwifuko lyaho, igosi ni dodo. ¹⁴ Sagawhanziwa abhe ni vipimilo tofauti mukasi yi nyumba yaho, ivigosi ni vidodo. ¹⁵ Uwhanziwa abhe nu mwamu kamili na wihaki; uwhanziwa abhe ni vipimilo kamili ni vi haki, ili insiku zyaho zibhe ntali huns ya Yahwe Ungolobhe waho ahupela. ¹⁶ Kwa maana wonti bhawomba ivintu evi wonti bhabhabudula ihaki, luvisyo wha Yahwe Ungolobhe waho. ¹⁷ Komboha lijambo wele uAmeleki lyawombile huliwe mwidala lwawafumile hu Misri, ¹⁸ jinsi lwatanganile nawe mwidala na hubhashambulile amwe sha whisinda, bhala bhabhali bhanyongonyeye whisinda, lwamwali bhadhaifu na lite, sagaamwishimule Ungolobhe. ¹⁹ Whesho, uYahwe Ungolobhe waho lwayihubhapela ulotoyo wha bhibhi bhaho kila sehemu, hunse ya Yahwe Ungolobhe waho ahubhapela atabhale hansi upyano, sagauhanziwa awhewe aje uwhanziwa afute inkomboho ya Bhamaleki pansi yimwanya.