¹ Paulona Timotheo, na varundi va Kristo Yesu, kwa vala vandelakaniswa na Kristo varule Filipi. Kyimwi na vasalalia na vashili. ² Mbora ive kwanu na unambwe luukyie kwa Iruva ndee yeeru na Ndumi weeru Yesu Kristo. ³ Nkaana Iruva wakwa malika nngevakumbua ini moose. ⁴ Matika woose kila kitereo kyakwa kyiimba kyanu moose, linkyi mfuraa ili mmuvatereviyaa. ⁵ Nkemwana nnu kyiimba kya siri yeenu karika injili kubokyie nkonu wa mbooko kumandi nnu. ⁶ Nkusurie sheeli ito andebooka mashora masha kari kanu asongovaa imarisia kumandi nkonu wa ndumi Yesu Kristo. ⁷ Nsasava kwakwa ikuita kuri kwale yaanu ini moose kyiimba murwaaye nrimen wakwa. Amu ini mwanua siri vyenkyi karika mbora karika kyifungo kyakwa na karika ishiliya na ilunganisio lakwa la injili. ⁸ Iruva ni nshaidi wakwa, Sheeli nngenaifura kwaale yaanu muoose karika kari ikunda la Kristo Yesu. ⁹ Na nngetereva kyiimba ikunda laanu likwenkyerie mmwasi na mmwasi karika urango na imanya foose. ¹⁰ Nngetereva kyiimba kyaiki amu muve na imakyii ipima naisauwa mboni tike shisha nnu. Linkyi nngemutereviaya amu muve veelwa mutaare idoa loose kari karikonu wa Kristo. ¹¹ Na linkyi muishurwa na nunda la udede likoikaa kari ka Yesu Kristo, kwa usongori na unini iwa Iruva. ¹² Ali vafari wakwa, nuuri mimanye kuri,mboni tindelokyia kwakwa tindeitobiria injili yeendeleennu. ¹³ Nkyo kiimba fifungo fakwa kari ka Kristo,vinde manyikwa varinkyi va ikulu yoose na kwa kila nndu. ¹⁴ Na vafari venkyi katika Ndumi, kyiimba kya fifungo fakwa, Vandeirikyia na ikaria yuhubiri kirero vataare weerei. ¹⁵ Venkyi vao udede vakerambua Kristo kwa usanduru na nnkuru, na linkyi venkyi kwa nrima nsha. ¹⁶ Vala vakerambua Kristo kwa ikunda veeshi sheeli vanderao iya kyiimba kya ishiliya injili. ¹⁷ Kyasia venkyi vakarembua Kristo kwa unyuku na nrima nkasha. Kwiishi sheeli vakekanyia nngatara kwakwa kari ka minyonyoro yakwa. ¹⁸ Kwekyio? Nndikyiendi, ana shiya ikava ya uresi ana ya udede, Kristo akarembulwa na karika ikyi nngekunda! Eenngefura. ¹⁹ Fula nniishi sheeli ikyi kyikennde irulwa lakwa. Mboni tii ikeshi kyiimba kya viterero faanu na kwa eelekwa la nrima wa Yesu Kristo. ²⁰ Kyiimba kya maariya akwa asumani na udede nkwa kyiimba, nnloliya usutu nndi. Numa yao,kwa uami loose , sheeli kyikii mikonu yoose na ally nveriye sheeli Kristo ashiimboo kari ka nvili wakwa , nnke kari ka ikyia ana kari kaufu. ²¹ Amu kwakwa nnii, ikyiya Kristo na ufu mbusha, ²² Kake, Kyikakoya ikyia kari kanvili ukinnde nunda kari kamashoora akwa kwaikyo kya isauwa nndi. ²³ Amu nngekunwa nnu na makasaro iva avili. Uwarwa nngura ya ireyafo nvili kyimwi na Kristo, kindo kyikekya maaru aringeu mmwasi na mniwasi nnu. ²⁴ Kyisia, isaa kari kanvili uu kindo kyiseyie nnu kwa kyiimba nnu kwa kyiimba kyanu. ²⁵ Fula noore udede kwaale ya ikyi, niishi sheeli nsaana ngeendelea iva kyimwi neeni muoose, Kyiimba kya maendeleo a ikunda na ikusura laanu. ²⁶ Neekyi kyinde ikunda laani inini kari ka Kristo Yesu,Kyiimba kyakwa ikwenkyeriaa, Kyiimba kya imakyii lakwa linkyi kyimwi neeni. ²⁷ Mtinyie murie maisha aanu kari ka mikaae misha isenyie injili ya Kristo, rundei kuro amu ilinshaa ishemulolia ana ntashaa, niite sheeli mmselele kyumu karika nrima umwi, muikabania ikusura la injili andoemwi ana muke kyimwi. ²⁸ Ana matumalulwa kindo kyoose kyetobiriwa na vakasha vaanu. Ikyi kwao miorosie mikasha. Ikyi kwao miorosie mikasha. Kake kwanu miorisie ya ukofu kuka kwa Iruva. ²⁹ Amu inni mundeningwa kwa kyiimba kya Kristo, ana kyiimba kya ikusura nndi, kake nkyiimba kya iliswa ukyiva kari kamwi. ³⁰ Amu muoore manunua ala ala sheeli mundealolia kwakwa na muisile sheeli noore kumandi alii.