¹ Ili ikisee mikonu ivili kisuku kya Pasaka kive na kyeeri kya mikate itadookie. vakohani vanini na vaaria va mitisirie veekee iruia mwaanya wa iwara Yesu kwa ntambwe na iwwaa. ² Amu vanumbua. ''kitaare nkyeeri ki kya kisuku, vandu vatashe yaarua mwaandu.'' ³ Na ili Yesu akee Bethania nkyen kwa simoni mkoma. neeli yenda shongen, nka umwi kasha kwamwi na kawembe ka mafura a kisaamu a uuru unini nnu, kafunua kiwembe kilya kalletia nrwen wamwi. ⁴ Kake veeyoo kiindi kyawo vandesua. vakakuia veni kwa veni, Nkiki kiimba kya ureti lu? ⁵ Mafura va eemakii ikumbwa kwa ule ya shilingi mayana araru, na vaniingwa vakiva,'' nawo vakanaya. ⁶ Kake Yesu kanumbua, ntien ye muni. Nkiki ili mukee imwatarisa? Arunda ishora isha kwakwa. ⁷ Mikonu yoose vakiva nkyeeri kyoose mulangie mumakii ivatania fisha wo, kake mukooya mukee nabn mikonu yoose ndi. ⁸ Atana kilya amakii; aamba vvili wakwa mafura kiimba kya irikwa lyakwa. ⁹ Udede namuia, kilya andu nrumi shisha ikee ikwaniswa isangen koose, kilya atana nka uu kirerwaa kwa ikumbulwa lyamwi ¹⁰ Kyasia Yuda Iskariote, umwi wa valya ikumi na vavili, kaenda kwa vanini va vakohani amu amakii inrambikia kwawo. ¹¹ Ili vanini va vakohani vandeita kuro, vakafura na vakanrekia inniinga fesa, kabooka iruia mwaanya wa inrambikia kwawo. ¹² Kyasia nkonu wa mbele wa nkate utadookie, vaniingia yaanri lya pasaka vanalosho vamwi vakamwia, kufurie teende kwi tindesongosia amu kundela shoonga ya pasaka?'' ¹³ Aruma vanalosho vamwi vavili na kavaia, '' Enden murin, na mukwania na nsero arie nungu akwania na ini. Nsoren. ¹⁴ Numba aakiaa, nsoren na ien muni numba yo, ' Llosha akuia, nkwi numba ya veeni ikai andu lliyaa pasaka na vanalosho vakwa?'' ¹⁵ Amoorusaa kiri kya ringewu kinini kikee kisongosie. songosien kwa kiimba kyeeri alya.'' ¹⁶ Vanalosho vakakwimboo vakaenda mirin vakakooya kilya kindo shalia andevaia, na vakasongosia wo shoonga pasaka. ¹⁷ Ili kundeva ukwawun kasha na valya ikumi na vavili. ¹⁸ Na ili vakee serikia mesen na vale Yesu kanumbua, kya dede namuia, umwi kari kanu akee ilya andu emwi nanashiriingaa.'' ¹⁹ Woose vakariika, na umwi na imwura umwi umwi kya dede nnin ndi?'' ²⁰ Yesu kaarua na ivaia, Ni umwi wa ikumi na vavili karika nu, ni ito akee iliana nan kyashon kimwi. ²¹ Amu mwana wa nndu aendaa kasa mitisirie ya rera kiimba kyamwi. kake ushi nlwa nndu ulya kitaare iiria ye mwana wa nndu asheriingwaa! kiikee kinuru nnu kwamwi kwakooya kitaare nndu to awonika.'' ²² Neeli veelyaa, Yesu kaimboo nkate, kaana Iruva, kaufukya fukya. kavaniingia kanumbua, ''Ngyen uu ni vvili wakwa.'' ²³ Kaimboo umbata, kaana Iruva, kavaniingia, na woose vakalunwa. ²⁴ Kavaia, ''Ilu ni usao lwakwa luvaa mma shiia, usao lwintwaa kiimba kya veengi. ²⁵ Udede namuia, nkinwaa lingi minuiye ii ya nsabibu ndi kumande nkonu ulya nndenwaa muiya ifo umangin lwa Iruva. ²⁶ Ili vandemaa iimba kiimbo, vakasomuka wooro alya uron lwa misenefu. ²⁷ Yesu kavaia '' Ini mu woose mununua kwaasha kiimba, amu kyakwa fulya kikee kitisire, nkabaa mwisi manrii anyanyakaa.' ²⁸ Kake numa nammaa iruka lyakwa, mwiriaa mbele yanu Galilaya.'' ²⁹ Petro kamwia, Na kwakooya woose vakutiaa nin nkutiaafo ndi.'' ³⁰ Yesu kamwia, ''Udede nakuia, kio ki kya nnu, kitaare nguku ya shawu yamiikoro kavili, kukooya kwanshikana kararu.'' ³¹ Kake Petro kanumbua, ''Na akwaa kyawara mfwe andu emwi nawe, nkutiaafo ndi.'' ³² Vakasha taari ivaangwa Gethsemane, na Yesu kaia vanalosho vamwi, kaani ia ili niiterevaa.'' ³³ Kaimboo Petro, Yakobo, na Yohana andu emwi nae, kabooka inaria na isavaa nnu. ³⁴ Kavaia, nrima wakwa uwore unaari nnu, kamande ifwa, saan ia mulale rembo.'' ³⁵ Yesu kaenda mbele kinnya, kawa si, katereva, kwakooya kivaa saa ii imwiire mbaai. ³⁶ Kanumbua, Abba, nde, findo foose fimakii iva. shiuta umbata lu. kake nkwa mifurie yakwa ndi, kake kwa mifure yafo.'' ³⁷ Kauya kakooya valele, na kavaia Petro, ''Simoni, A kulele? kwa makii ilala rembo nta saa imwi se? ³⁸ Laten rembo mwiterevaa amu mutawe nreyon kya dede ngoo yo itomaa kake vvili ilemwa.'' ³⁹ Kaenda lingi na katereva, na eereraa firero filya fen. ⁴⁰ Kasha lingi kavakooya valele, amu miso awo eemeemeriswaa nruo ana vamanya nkiki kya imuia ndi. ⁴¹ Kasha lya kararu kavaia, mukiseere ilala na imuya da? kifule! saa yammaa ifika. Lla! mwana wa nndu arawa maakon a varekwa. ⁴² Kwimboon, nndefon, lla ulya akeshiriinga akee kufui.'' ⁴³ Liaeni akiseere irera, Yuda, umwi wa valya ikumi na vavili, kasha, na syamu nini kuuka kwa vanini va vakohani, vaaria va mitisirie na vasuri varie varie shombo na ndata. ⁴⁴ Kwa saa yo ndiingi wamwi eemmaa ivaniingia myorusie, kanumbua, ulya mmwongaa miimo, yye. wwaren na munrwaa kwa si ya uringi.'' ⁴⁵ Ili Yuda andefika, kaserekia na kulya Yesu akai kanumbua, ''Llosha,'' kamwonga miimo. ⁴⁶ Kyasia vakanrwaa kwasi ya uringi na iwwara. ⁴⁷ Kake umwi karikawo eeselele kufui nae kasomua shombo yamwi kakaba iketi lya nkohani nnini na kamminya kuri. ⁴⁸ Yesu kavaia, mwasha ishiwara kwa shombo na ndata sha kisoki? ⁴⁹ Na kilya nkonu niikee neeni niiloshaa ifo numba ya Iruva, nta ishiwara. kake kyatanika amu mitisirie yawukie. ⁵⁰ Na valya woose veekee na Yesu vakantiawo vakarisha. ⁵¹ Nsero umwi kansora yeree urubeka da eekusikiee nalo inlengetia; vaka wwara kake. ⁵² Kavakuuta kavaotoria urubeeka lua karisha akee kya nnu. ⁵³ Vakakurika Yesu kwa nkohani nnini. Alya vakakusandia andu emwi nae vakohani vanini woose, vasuri, na vaaria va mitisirie. ⁵⁴ Petro nae kasora Yesu kwa kwaasha, yenda kulya wooro kwa nkohani nnini. kakaa rembo andu emwi na varingi, veekee kufui na veoraa muro amu vakooya ngumio. ⁵⁵ Feeri fo vakohani vannini woose na kikwenu kyoose vakee iruia kindo kya fingia Yesu amu vakooye mwaanya wa iwwaa. kake vakatura. ⁵⁶ Amu vandu veengi vannde findo fa wongo kiimba kyamwi, kake uriingi lwawo lwave lumwi ndi. ⁵⁷ Kiindi vasalala vakamfingia findo fa wongo kwa kiimba kyamwi; venumbaa, ⁵⁸ ''Tindemwita anumbua, mburuaa numba ii ya Iruva indetanwa kwa maako na karika mikonu iraru ntanaa ingi kitaare yatanwa na maako.'' ⁵⁹ Kake nta uriingi lwawo lwavakana ndi . ⁶⁰ Nkohani nnini kasalala karikari yawo na kamwura Yesu, ''A, nta yarua? vandu va vakeriinga kiki kiimba kyafo?'' ⁶¹ Kake Yesu kasiado nta yarua kindo kyoose.Liaeni nkohani nnini kamwura lingi, ''A iwe ni kristo, mwana wa aarafumwa?'' ⁶² Yesu kanumbua, ''Nnin ye. na kulolia mwana wa nndu akee rembo uko usha lwa finya eeshaa na marumbe a Iruvewu.'' ⁶³ Nkohani nnini karandaranda miseto yamwi na kanumbua ''A tiseere iruia vakureki? ⁶⁴ Mwamiita firumu. mwalolia are ini?'' Na woose vakanriinga sha umwi kyawara awalwa. ⁶⁵ Na kiindi vakabooka immishia manyiiri na insikia miso na inkaba na imuia, '' Ringisia!'' vasikari vakankurika na inkaba. ⁶⁶ Na Petro ili akee rembo si wooro ndundi umwi wa kika wa nkohani nnini kasha kwamwi. ⁶⁷ Alolia Petro aselele eeoraa muro na kamulla kwa inserikia. kyasia kamwia, nawe da kukee na munasareti, Yesu.'' ⁶⁸ Kake kaleya, eenumbuaa, ''Niishi ndi ana niisile filya kukee irera ndi! kyasia kasomuka kaenda wooro ngirin. ⁶⁹ Kake ndundi wa kika alya, kallolia na kabooka ivaia lingi valya veeselele alya, Nndu uu ni umwi wawo!'' ⁷⁰ Kake kakana lingi. Numa kinnya valya veeselele alya vakaia Petro, ''udede iwe kukee umwi wawo, amu nawe da kukee mgalilaya.'' ⁷¹ Kake kabooka ikurwaa muni kwa si ya fidengo na ilya ikite, Niishi nndu uu mukee inumbua ndi.'' ⁷² Kyasia nguku ya shawu ikaikoro lya kavili. Llo Petro akunumbua firero filya Yesu eemuiaa: ''kitaare nguku ya shawu yamiikoro kavili kushikanaa karani.'' na kawa si kaiya.